ప్రభాస్ తో సినిమా ఖచ్చితమే...కానీ.., - డైరెక్టర్ మారుతి
cinema | Suryaa Desk | Published : Fri, Jun 17, 2022, 10:25 AM
రెబల్ స్టార్ ప్రభాస్, వినోదాత్మక చిత్రాల దర్శకుడు మారుతి కాంబోలో సినిమా నిజంగా ఉంటుందో లేదో తెలియదు కానీ ఈ సినిమాపై వచ్చే వార్తలు మాత్రం అన్నీ ఇన్నీ కావు. ఈ సినిమాపై రోజుకొక కొత్త వార్త పుడుతూనే ఉంది. ఈ సినిమాకు టాలీవుడ్ సెన్సేషన్ మ్యూజిక్ డైరెక్టర్ తమన్ బాణీలు సమకూరుస్తారని, హార్రర్ కామెడీ నేపధ్య చిత్రంగా ఉంటుందని, ఈ సినిమా కోసం కోట్లు ఖరీదు చేసే ఒక భారీ సెట్ ను కూడా నిర్మించబోతున్నారని, మూవీ నేమ్ రాజా డీలక్స్ అని... ఇలా పలు రకాల వార్తలు మీడియాలో హల్చల్ చేస్తున్నాయి. ఈ ప్రాజెక్ట్ పై వస్తున్న వార్తలను అటు ప్రభాస్ గానీ, ఇటు మారుతీ గానీ ఇప్పటివరకు ఎలాంటి క్లారిటీ ఇవ్వలేదు. కానీ మొట్టమొదటి సారి మారుతీ ప్రభాస్ సినిమాపై నోరు విప్పారు.
యాక్షన్ హీరో గోపీచంద్ తో మారుతీ డైరెక్ట్ చేసిన సినిమా "పక్కా కమర్షియల్". ఈ మూవీ జూలై 1వ తేదీన విడుదలకాబోతుంది. ఈ నేపథ్యంలో జరిగిన మూవీ ప్రమోషన్స్ లో మారుతీ ప్రభాస్ సినిమాపై ఓపెన్ అయ్యారు. ప్రభాస్ తో సినిమా ఇంకా ఖరారు కాలేదని, ప్రస్తుతానికి చర్చలు జరుగుతున్నాయని, కంఫర్మ్ అవ్వడం మాత్రం పక్కా అని చెప్పారు. ప్రభాస్ తో తాను తీసే సినిమా మాములుగా ఉండదని, ప్రభాస్ లాంటి బిగ్ హీరో నుండి ప్రేక్షకాభిమానులు ఎలాంటి సినిమానైతే కోరుకుంటారో, అలాంటి పక్కా కమర్షియల్ ఎలిమెంట్స్ ఉన్న సినిమాను తీస్తానని ప్రభాస్ అభిమానులకు మారుతీ మాట ఇచ్చారు. మారుతీ తన స్టైల్ నేరేషన్ తో ప్రభాస్ ను ఏమేరకు ఒప్పించగలుగుతాడో చూద్దాం.
|
|