రైతులూ, నిర్మాతలు ఇలా చావకూడదు
cinema | Suryaa Desk | Published : Wed, Nov 22, 2017, 02:03 PM
ప్రముఖ తమిళ దర్శక, నిర్మాత బి.అశోక్ కుమార్ బలవన్మరణానికి పాల్పడ్డారు. చెన్నైలోని అళ్వార్ తిరునగర్ లోని తన నివాసంలో ఆయన ఆత్మహత్య చేసుకున్నారు. గత ఏడేళ్లుగా ఆయన సినిమాలకు ఫైనాన్సియర్ గా వ్యవహరిస్తున్న వ్యక్తులు తమ డబ్బులు తిరిగివ్వాల్సిందిగా బెదిరిస్తుండటమే ఈ ఆత్మహత్యకు కారణంగా తెలుస్తోంది.అశోక్ కుమార్ ప్రముఖ నటుడు, దర్శకుడు, నిర్మాత శశికుమార్ కు బంధువు. శశికుమార్ నిర్మాణంలో తెరకెక్కిన ఇసన్, పొరలి సినిమాలకు సహ నిర్మాతగా కూడా వ్యవహరించారు.
వీరి నిర్మాణంలో తెరకెక్కిన కోడి వీరం రిలీజ్ సిద్ధంగా ఉంది. అశోక్ కుమార్ మృతి పట్ల పలువురు తమిళ సినీ ప్రముఖులు సంతాపం వ్యక్తం చేశారు.అప్పు ఇచ్చిన వ్యక్తులు తిరిగి చెల్లించమని వేధిస్తుండడంతో మనస్తాపానికి గురై బలవన్మరణానికి పాల్పడినట్లు పోలీసుల ప్రాథమిక విచారణలో తెలిసింది. స్థానిక పోలీసులు కేసు నమోదు చేసుకుని సూసైడ్ నోట్ ఆధారంగా విచారణ చేపడుతున్నారు.ఇక ప్రముఖ నటుడు సిద్ధార్ద్ తన ట్విట్టర్ వేదికగా .. రైతన్న కాని , మరో నిర్మాత కానీ ఇలా ఆత్మహత్య చేసుకొని చనిపోకూడదని ఆవేదన వ్యక్తం చేశాడు. యువ నిర్మాత అప్పుల కారణంగా ఆత్మహత్య చేసుకోవడం వినడానికి బాధగా ఉంది.
|
|