మెట్రో ప్రయాణికులకు షాక్.. ఇక ఆ కార్డులు, ఆఫర్ రద్దు..

హైదరాబాద్ మెట్రో ప్రయాణికులకు షాకింగ్ న్యూస్. వేసవి నేపథ్యంలో ట్రైన్లలో రద్దీ పెరగటంతో మెట్రో అధికారులు కీలక నిర్ణయం తీసుకున్నారు. సూపర్ సేవర్ హాలీడే కార్డును రద్దు చేశారు. అలాగే డిమాండ్ తక్కువగా ఉండే సమయాల్లో ఇచ్చే పది శాతం రాయితీని కూడా ఎత్తేశారు. మెట్రో అధికారుల నిర్ణయం పట్ల ప్రయాణికులు ఆగ్రహం వ్యక్తం చేస్తున్నారు. అసలే ఎండలు, ఆపై అన్ని నిత్యవసర ధరలు పెరుగుతుంటే.. తక్కువ టికెట్ ధరతో మెట్రోలో ప్రయాణం సాగిద్దామంటే ఇలాంటి నిర్ణయం తీసుకుంటారా? అని ప్రశ్నిస్తున్నారు. రద్దీని దృష్టిలో ఉంచుకొని మెట్రో ట్రైన్ల సంఖ్యను పెంచాలని డిమాండ్ చేస్తున్నారు.

 కాగా, సూపర్ సేవర్ హాలీడే కార్డులను రద్దు చేస్తున్నట్లు ఈనెల 2న హైదరాబాద్ మెట్రో ప్రకటన విడుదల చేసింది. సూపర్ సేవర్ హాలిడే మెట్రో కార్డ్, మెట్రో స్టూడెంట్ పాస్, సూపర్ పీక్ అవర్ ఆఫర్‌లు మార్చి 31, 2024న ముగిశాయని ట్వీట్ చేసింది. స్టూడెంట్ మెట్రో కార్డ్‌తో ప్రయాణాలు 30 ఏప్రిల్ 2024 వరకు చెల్లుబాటులో ఉంటాయని చెప్పింది. అయితే ఇవాళ ఆదివారం కావటంతో చాలా మంది సూపర్ సేవర్ కార్డు రీఛార్జ్ చేసుకోవటానికి ప్రయత్నించారు. మెట్రో సిబ్బంది మాత్రం ఆఫర్ లేదని చెప్పటంతో ప్రయాణికులు ఖంగుతున్నారు. సిబ్బందిపై అసహనం వ్యక్తం చేస్తూనే టికెట్ తీసుకున్నారు.

సూపర్ సేవర్ మెట్రో హాలిడే కార్డు అంటే..

సూపర్ సేవర్ మెట్రో హాలిడే కార్డును రూ. 59 రీప్-అప్‌తో ఒక కార్డ్‌కు ఒకసారి రూ. 50 (మెుత్తంగా రూ. 109) చెల్లించడం ద్వారా అందుబాటులోకి తీసుకొచ్చారు. దీని ద్వారా ప్రయాణికులు తమ సూపర్ సేవర్ మెట్రో హాలిడే కార్డ్‌ను కేవలం రూ. 59తో రీఛార్జ్ చేయడం ద్వారా ఆదివారాలు, ప్రభుత్వ సెలవు దినాల్లో అపరిమిత మెట్రో రైడ్‌లను పొందేవారు. మెట్రోలో నగరంలో ఏ మూల నుంచి ఏ మూలకైనా అపరిమతంగా ప్రయాణం చేసే సౌలభ్యం ఉండేది. నగరం మెుత్తం చుట్టేయాలనుకునేవారికి ఇది ఎంతగానో ఉపయోగపడేది.

ఇక సూపర్ ఆఫర్ పీక్ అవర్ ఆఫర్ అంటే ఉదయం 6 నుంచి 8 వరకు, రాత్రి 8 నుంచి చివరి మెట్రో వరకు ఈ ఆఫర్ ఉండేది. ఈ ఆఫర్ కింది సాధారణ కార్డు ద్వారా టికెట్ తీసుకుంటే 10 శాతం రాయితీ ఇచ్చేవారు. ఉదాహరణకు ఎల్బీ నగర్ నుంచి ఎస్సాఆర్ నగర్ టికెట్ రూ. 50 ఉంటే ఈ ఆఫర్ కింద రూ. 45 చెల్లిస్తే సరిపోయేది. ప్రస్తుతం ఈ ఆఫర్లు ఎత్తేయటంతో మెట్రో ప్రయాణికులు అసహనం వ్యక్తం చేస్తున్నారు.