ఇదెక్కడి ఇచ్చంత్రం సామీ.. నడిరోడ్డుపై భర్తను వదిలేసి భార్యాపిల్లల్ని కొట్టేసిన దొంగలు

అప్పుడప్పుడు మన చుట్టూ కొన్ని ఇచ్చంత్రాలు జరుగుతుంటాయి. హవ్వా.. ఇలా కూడా జరుగుతాయా అని ముక్కున వేలేసుకునే సన్నివేశాలు చోటుచేసుకుంటూ ఉంటాయి. అలాంటి ఘటనే జరిగింది హైదరాబాద్‌లో. ఓ కుటుంబంలోని భర్త తప్ప.. మిగతావారంతా మాయం అయ్యారు. భార్యతో పాటు ఇద్దరు పిల్లల్ని దొంగలు ఎత్తుకుపోయారు. అదేంటీ.. దొంగలంటే డబ్బో, నగలో లేదంటే ఏమైనా వస్తువులో ఎత్తుకుపోతార కానీ.. మనుషుల్ని ఎత్తుకుపోవటమేంటీ అనుకుంటున్నారా..? అక్కడే ఉంది అసలు ముచ్చట.. దొంగలు ఎత్తుకెళ్లింది భార్యాపిల్లల్నే.. కానీ మనుషులను కాదు విగ్రహాలను. ఈ ఆసక్తికర సన్నివేశం హైదరాబాద్‌లోని జూబ్లీహిల్స్‌లో జరిగింది. అందులోనూ.. ఆ విగ్రహాలు ఏదో దుకాణం నుంచి కొట్టేశారా అంటే అది కూడా కాదు.. రోడ్డు మీద జీహెచ్ఎంసీ ఏర్పాటు చేసిన విగ్రహాలను ఎత్తుకెళ్లారు.

హైదరాబాద్‌లోని జూబ్లీహిల్స్ నర్నే రోడ్డులో జీహెచ్‌ఎంసీ.. 2021లో ఒక మోడ్రన్ ఫ్యామిలీ విగ్రహాలను ఏర్పాటు చేశారు. ఒక భర్త, ఓ భార్య.. వాళ్లకు కొడుకు, కూతురు ఇద్దరు పిల్లలు ఉండగా.. వాళ్లు సరదాగా షాపింగ్ చేస్తున్నట్టుగా ఆ విగ్రహాలు ఏర్పాటు చేశారు. చూసేందుకు ఎంతో క్యూట్‌గా ఉన్న ఆ విగ్రహాలు చూపరులను ఆకట్టుకునేవి. ఈ విగ్రహాలతో చాలా మంది సెల్ఫీలు కూడా తీసుకునేవారు. ఆ ఫ్యామిలీ మీద ఎవరి కన్నుపడిందో కానీ.. భార్య ఇద్దరు పిల్లలు మాయం అయ్యారు. అదేనండి భార్యాపిల్లల విగ్రహాలను ఎవరో ఎత్తుకెళ్లిపోయారు. భర్త విగ్రహాన్ని మాత్రం అక్కడే వదిలేశారు.

కాగా.. ఈ విషయం ఇప్పుడు నెట్టింట చర్చనీయాంశంగా మారింది. ఇందుకు సంబంధించిన ఫోటోలు సోషల్ మీడియాలో వైరల్‌గా మారాయి. ఇంతకు ఆ విగ్రహాలు ఎలా మిస్ అయ్యాయని నెటిజన్లు డౌటనుమానం వ్యక్తం చేస్తున్నారు. మరోవైపు.. భర్తను వదిలేసి.. భార్య, కూతురు, కొడుకు కలిసి షాపింగ్‌కి వెళ్లారేమో అంటూ సరదా కామెంట్లు చేస్తున్నారు. దీన్ని దొంగతనం అనేదానికంటే కిడ్నాప్ అనుకోవాలేమోనని అంటూ మరికొందరు సెటైర్లు వేస్తున్నారు.