ఏపీలో కొత్త ప్రభుత్వం.. తెలంగాణ మందుబాబులకు కష్టాలు, పేలుతున్న మీమ్స్

'తెలంగాణలో తాడుగు వ్యసనం కాదు.. అలవాటు పడిన సంప్రదాయం' దసరా మూవీలో హీరో నాని డైలాగ్ ఇది. నింజంగానే తెలంగాణలో తాగుడును ఓ సంప్రదాయంగా భావిస్తారు. వేడుక ఏదైనా చాలా వరకు ఇంట్లో అందరూ కలిసే తాగుతారు. ఈ నేపథ్యంలో ఇప్పుడు తెలంగాణలో మందుబాబులకు టెన్షన్ పట్టుకుంది. ఏపీలో కొత్త ప్రభుత్వం కొలువుదీరటంతో మద్యం ప్రియులకు కొత్త కష్టాలు మెుదలయ్యాయి. తెలంగాణలో ఎంట్రీ ఇస్తున్న కొత్త బ్రాండ్‌ బీర్లు సోషల్‌ మీడియాలో హల్‌చల్‌ చేస్తున్నాయి. మద్యం ప్రియులకు అలవాటైన పాత బ్రాండ్ల కొరత ఏర్పడింది. దేశంలో పాపులర్ బ్రాండ్‌గా ఉన్న కింగ్ ఫిషర్ బీర్లు తెలంగాణలో దొరకటం లేదు.

అదే సమయంలో ఒకప్పుడు ఏపీలో నాన్ బ్రాండెడ్ లిక్కర్‌కు దొరికేది. భూంభూం, ప్రెసిడెంట్ మెడల్, త్రీ క్యాపిటల్స్, స్పెషల్ స్టేటస్ పేరుతో బీర్లు, లిక్కర్ అందుబాటులో ఉండేది. కానీ ప్రస్తుతం ప్రభుత్వం మారటంతో కింగ్ ఫిషర్ బీర్లతో పాటు బ్రాండెడ్ లిక్కర్ కంటైనర్లలో ఏపీకి తీసుకువచ్చి గోడౌన్‌లలో నిల్వ చేస్తున్నారు. అందుకు సంబంధించిన వీడియోలు సోషల్ మీడియాలో ప్రస్తుతం వైరల్ అవుతున్నాయి. త్వరలోనే ఏపీ వ్యాప్తంగా బ్రాండెడ్ మద్యం విక్రయాలు ప్రారంభం కాబోతున్నాయని.. అక్కడి మద్యంప్రియలు సంబరాలు చేసుకుంటున్నారు. ఏపీకి మళ్లీ మంచి రోజులొచ్చాయంటూ సోషల్ మీడియాలో మీమ్స్, సెటైర్లు పేలుస్తున్నారు.

ఏపీ మద్యం ప్రియులు ఆనందంలో మునిగి తేలుతుంటే.. తెలంగాణ మందుబాబులు మాత్రం గగ్గోలు పెడుతున్నారు. తెలంగాణ బీర్లను ఏపీకి తరలిస్తున్నారని ఆవేదన వ్యక్తం చేస్తున్నారు. ఒకప్పుడు ఏపీ ప్రజలు బ్రాండెడ్ బీర్ల కోసం తెలంగాణ సరిహద్దు జిల్లాలకు వచ్చే వారు. ఇప్పుడు పరిస్థితి పూర్తిగా తారుమారైంది. తెలంగాణలో బ్రాండెడ్ బీర్లు దొరకటం లేదని.. 'బిర్యానీ' పేరుతో కొత్త బీర్లు తీసుకొచ్చారని మండిపడుతున్నారు.

ఇప్పుడు తాము ఏపీకి వెళ్లి మద్యం కొనుక్కోవాల్సిన పరిస్థితి వచ్చిందని వాపోతున్నారు. కొత్త బ్రాండ్ల పేరుతో కల్తీ మద్యం తీసుకురావొద్దని ప్రభుత్వాన్ని వేడుకుంటున్నారు. అలాగే తమకు అలవాటైన ప్రముఖ కంపెనీలకు చెందిన మద్యాన్ని, బీర్లను అందుబాటులో ఉంచాలని సోషల్ మీడియా వేదికగా డిమాండ్‌ చేస్తున్నారు.