తెలంగాణకు రెయిన్ అలర్ట్.. నేడు ఈ జిల్లాల్లో భారీ వర్షాలు, జాగ్రత్తగా ఉండండి

తెలంగాణకు హైదరాబాద్ వాతవారణ కేంద్రం అధికారులు రెయిన్ అలర్ట్ జారీ చేశారు. నైరుతి రుతపనాల ప్రభావంతో కురుస్తాయని చెప్పారు. నేడు 13 జిల్లాల్లో భారీ వర్షాలు కురుస్తాయని హెచ్చరికలు జారీ చేశారు. ములుగు, భద్రాద్రి కొత్తగూడెం, మహబూబాబాద్, నిజామాబాద్, రాజన్న సిరిసిల్ల, కరీంనగర్, జయశంకర్‌ భూపాలపల్లి, వరంగల్, హనుమకొండ, వికారాబాద్, సంగారెడ్డి, మెదక్, కామారెడ్డి, సిద్దిపేట, రంగారెడ్డి, మేడ్చల్‌ మల్కాజిగిరి జిల్లాల్లో భారీగా వర్షాలు కురుస్తాయని చెప్పారు. ఈ మేరకు ఎల్లో అలర్ట్ జారీ చేశారు.

ఉమ్మడి ఖమ్మం, మహబూబ్‌నగర్, రంగారెడ్డి, ఆదిలాబాద్, వరంగల్ జిల్లాల్లో ఈదురు గాలులతో కూడిన తేలికపాటి వర్షాలు కురిసే ఛాన్స్ ఉందన్నారు. ఇక గురువారం (జూన్ 13) ఉమ్మడి మెదక్, రంగారెడ్డి, ఆదిలాబాద్, కరీంనగర్, వరంగల్ జిల్లాల్లో పలు చోట్ల ఓ మోస్తరు వర్షాలు కురిసే సూచనలు ఉన్నట్లు వాతావరణశాఖ అధికారులు తెలిపారు. భారీ ఈదురు గాలులతో పాటు ఉరుములు మెరుపులకు ఛాన్స్ ఉందని జాగ్రత్తగా ఉండాలని సూచించారు.

ఇక మంగళవారం రాష్ట్రవ్యాప్తంగా పలు జిల్లాల్లో వర్షాలు కురిశాయి. అత్యధికంగా యాదాద్రి భువనగిరి జిల్లా బొమ్మల రామారంలో 6.9 సెంటీ మీటర్ల వర్షపాతం నమోదైనట్లు వాతావరణశాఖ అధికారులు తెలిపారు. సిద్దిపేట జిల్లా తొగుట మండలం వెంకట్రావ్‌పేటలో 6.5 సెం.మీ, మేడ్చల్‌ మల్కాజిగిరి జిల్లా మేడిపల్లి మండలం పీర్జాదిగూడలో 6.5 సెం.మీ, మెదక్‌ జిల్లా ఎల్దుర్తిలో 6 సెం.మీ, తూప్రాన్‌ మండలం ఇస్లాంపూర్‌లో 5.8 సెం.మీ, శంకరంపేటలో 5.1 సెం.మీ. వర్షం కురిసింది. హైదరాబాద్‌లోని పలు ప్రాంతాల్లోనూ వర్షం కురిసింది. రోడ్లపైకి భారీగా వరద నీరు చేరటంతో వాహనదారులు ఇబ్బందులుపడ్డారు.