అమ్మ బాబోయ్, వీళ్లు మామూలోళ్లు కాదు.. యూట్యూబ్‌లో చిట్కాలు చెప్తూ 10 కోట్లు నొక్కేశారు

పిచ్చి పలు రకాలు అనటం విన్నాం కానీ.. ఇప్పుడు మోసాలు పలు రకాలు అనటం సమంజసమేమో అనిపిస్తోంది. ఇలా అలా అని చెప్పలేం.. ఎలా అయినా మోసాలు చేయొచ్చు. మాయ మాటలు చెప్పి బుట్టలో వేసుకోవటం ఇప్పటి వరకు చూశాం. కానీ.. వీళ్లు మరీ ఘోరం.. చిట్కాలు చెప్తూనే ఏకంగా 10 కోట్లు వసూలు చేశారు. అసలు విషయమేమిటంటే.. ఈ మోసం చేసినవాళ్లు డైరెక్టుగా చిట్కాలు చెప్పటం కాదు.. యూట్యూబ్ ద్వారా చెప్పటం కొసమెరుపు. హైదరాబాద్‌లో మంచి భూమ్‌లో రియల్ ఎస్టేట్ రంగాన్నే ఎంచుకుని.. ఓ యూట్యూబ్ ఛానెల్ ద్వారా రియల్ ఎస్టేట్‌లో సులభంగా ఎలా సంపాదించాలి, రియల్ ఎస్టేట్ రంగంలో పెట్టుబడులు ఏలా పెట్టాలంటూ సలహాలు, చిట్కాలు ఇస్తూ.. సుమారు 30 నుంచి 40 మంది నుంచి రూ.10 కోట్లకు పైగా వసూలు చేసిన ఘటన వెలుగులోకి వచ్చింది.

ఈ కేసులో మొల్ల శివయ్య, అతని భార్య స్వర్ణ లత, కుమారుడు జశ్వంత్, న్యాయవాది శ్రీనివాస్ రావులను హైదరాబాద్ సీసీఎస్ పోలీసులు అరెస్ట్ చేశారు. ఈ కేసు దర్యాప్తులో భాగంగా నిందితులకు సంబంధించిన బ్యాంక్ ఖాతాలను ఫ్రీజ్ చేసి.. వారి ఆస్తులను అటాచ్ చేసినట్లు సీసీఎస్ పోలీసులు వెల్లడించారు. శివయ్య అనే వ్యక్తి.. మీమాంస యూట్యూబ్ ఛానెల్ ద్వారా మీమాంస వెల్ నెస్, రిసార్ట్స్ పేరుతో.. బీపీ, డయాబెటీస్, థైరాయిడ్ ఇలా అనేక రోగాలను నయం చేస్తున్నట్లు ప్రచారం చేసుకుంటన్నాడు. తాను నేచురోపతి డాక్టర్ అంటూ చలామణీ అవుతున్నాడు. దీనిపై ఆరా తీస్తే.. శివయ్యకు ప్రభుత్వపరంగా ఎలాంటి గుర్తింపు సర్టిఫికెట్‌లు గానీ, అర్హతలు లేవని పోలీసులు తేల్చారు.

శివయ్య, అతని కుటుంబం రియల్ ఎస్టేట్‌కు సంబంధించి వాణిజ్యపరమైన స్థలాల్లో 50 శాతం పెట్టుబడి పెట్టి.. మిగతా 50 శాతం పెట్టుబడిని అతని కంపెనీల ద్వారా పెడితే 200 శాతం లాభాలు ఇస్తానని నమ్మించి మోసం చేస్తున్నాడు. ఈ నేపథ్యంలో.. శివయ్య అతని కుటుంబ సభ్యులపై సీసీఎస్‌తో పాటు, కేపీహెచ్‌బీ, బాచుపల్లి, ఎల్బీనగర్ పోలీసు స్టేషన్‌లలో కూడా పలు కేసులు నమోదైనట్లు పోలీసులు పేర్కొన్నారు. ఇలా యూట్యూబుల్లో చెప్పే మాటలు గుడ్డి నమ్మి.. పెట్టుబడులు పెట్టి ప్రజలు మోసపోవద్దని పోలీసులు కోరుతున్నారు. ఇలాంటి మోసపూరిత ప్రచారానికి సంబంధించిన విషయాలు గమనించినా, అనుమానం వచ్చినా.. వెంటనే పోలీసులకు సమాచారం ఇవ్వాలని సీసీఎస్ డిటెక్టివ్ విభాగం డీసీపీ కోరారు.