సామాన్యులకు దడపుట్టిస్తోన్న ఉల్లి, టమోటా... 15 రోజుల్లోనే అమాంతం పెరిగిన ధరలు

వేసవిలో అదుపులో ఉన్న కూరగాయలు ధరలు... వర్షాకాలం మొదలవగానే రాకెట్ వేగంతో దూసుకెళ్తున్నాయి. కేవలం 15 రోజుల వ్యవధిలోనే ఉల్లి, టమాట సహా అన్ని కూరగాయల ధరలు 60% వరకు అధికంగా పెరిగాయి. మే మూడో వారంలో కిలో రూ.20 పలికిన ఉల్లి.. ప్రస్తుతం రూ.40కి చేరింది. ఇక, టమాటా ధర కూడా రెండింతలు పెరిగిపోయింది. ప్రస్తుతం కిలో టమాటా రూ.50కిపై మాటే పలుకుతోంది. వంకాయలు, బీన్స్, క్యారట్, బీట్‌రూట్, క్యాప్సికం, సొరకాయ, కాకరకాయ తదితరాలతోపాటు పచ్చిమిర్చి, పుదీనా, కొత్తిమీర ఇతర ఆకుకూరల ధరలు రెట్టింపయ్యాయి.

కూరగాయల ధరలు పెరగడానికి వేసవిలో అధిక ఉష్ణోగ్రతలు కూడా ఓ కారణం. వడగాల్పుల కారణంగా రైతులు, వ్యాపారులు కూరగాయలను ఎక్కడికక్కడే అమ్ముకోవడంతో మార్కెట్‌పై కూరగాయల కొరత ఏర్పడుతుంది. ఈ క్రమంలో టమోటాలు, ఉల్లి దిగుమతి తగ్గి ధరలు పెరిగాయి. అలాగే, స్థానికంగా కూరగాయల ఉత్పత్తి 20% వరకు తగ్గింది. జూన్ మొదటి వారంలో వర్షాలు ప్రారంభం కావడంతో ఇతర ప్రాంతాల నుంచి తీసుకొస్తున్న కూరగాయలు తడిసి, త్వరగా కుళ్లిపోతున్నాయి. దీంతో వ్యాపారులు దిగుమతులను తగ్గించారు. హైదరాబాద్‌ నగర జనాభాకు రోజుకు దాదాపు 3,300 టన్నుల కూరగాయలు అవసరం. వారం రోజులుగా అన్ని హోల్‌సేల్‌ మార్కెట్లకు 2,800 టన్నులు మాత్రమే వస్తున్నాయి.

అయితే, ఒక్క హైదరాబాద్ మాత్రమే కాకుండా దేశవ్యాప్తంగా అనేక చోట్ల ఇదే పరిస్థితి నెలకొందని నిపుణులు చెబుతున్నారు. పరిస్థితి ఇలా ఉంటే మరికొన్ని రోజుల్లో కూరగాయల ధరలు ఇంకా పెరిగితే వంటింటి బడ్జెట్ మరింత పెరగనుందని ప్రజలు భయాందోళన చెందుతున్నారు. కొత్తపంట వచ్చే వరకూ ధరలు ఇలాగే కొనసాగుతాయని అంటున్నారు. మే నెలలో బోర్లు, చెరువుల కింద సాగుచేస్తోన్న పంట.. ఈ నెలాఖరుకు కొంతమేరకు దిగుబడులు వచ్చే వీలుంది. అలాగే, వర్షాకాలం సీజన్‌ పంటల సాగు కూడా ప్రారంభమైంది. ఇవి జులై, ఆగస్టు నెలల్లో వచ్చే అవకాశం ఉంది. ఆయా ఉత్పత్తులు మార్కెట్లలోకి వస్తే ధరలు తగ్గుతాయని అధికారులు తెలిపారు.