తాను ఆగ్ని పర్వతంలా ఉన్నానంటూ ,,,,కవిత అరెస్టుపై బావోద్వేగానికి లోనైన గులాబీ బాస్

దేశ వ్యాప్తంగా సంచలనంగా మారిన ఢిల్లీ లిక్కర్ స్కాం కేసులో గులాబీ బాస్ కేసీఆర్ ఇప్పటికే పలుమార్లు స్పందించగా.. మరోసారి కీలక వ్యాఖ్యలు చేశారు. తెలంగాణ భవన్‌లో మంగళవారం జరిగిన బీఆర్ఎస్‌ఎల్పీ సమావేశంలో కవిత అరెస్టుపై స్పందించారు. రాజకీయ కక్షతోనే తన కూమార్తెను జైలులో పెట్టారని కేసీఆర్ ఆరోపించారు. కూతురు జైలులో ఉంటే కన్న తండ్రిగా బాధ ఉండదా అంటూ భావోద్వేగానికి లోనయ్యారు. ప్రస్తుతం తాను సలసల మరిగిపోయే అగ్ని పర్వతంలా ఉన్నానని కేసీఆర్ ఇంట్రెస్టింగ్ వ్యాఖ్యలు చేశారు.

అయితే.. జైలులో ఉన్న కవిత కొన్ని రోజులుగా అనారోగ్యానికి గురైనట్టు తెలుస్తోంది. కొంతకాలంగా జ్వరంతో బాధపడుతున్న కవిత.. లోబీపీ కారణంగా ఆమె కళ్లు తిరిగి పడిపోగా.. వెంటనే ఆస్పత్రికి తరలించి చికిత్స అందించారు. అయితే.. కవిత జైలులో నాలుగు నెలలుగా ఉంటుండగా.. ఆమె 10 కిలోల వరకు బరువు తగ్గినట్టు సమాచారం. ఈ క్రమంలో.. కేసీఆర్ కూతురి విషయంలో కాస్త భావోద్వేగానికి లోనైనట్టు తెలుస్తోంది.

మరోవైపు.. ఎమ్మెల్యేలు వరుసగా పార్టీ వీడటంపై కూడా కేసీఆర్ స్పందించారు. ఎమ్మెల్యేల వలసలతో బీఆర్ఎస్ పార్టీ క్లిష్ట పరిస్థితుల్లో ఉందన్న వ్యాఖ్యలపై స్పందించిన కేసీఆర్.. విమర్శలు చేసే నేతలకు కౌంటర్ ఇచ్చారు. బీఆర్ఎస్‌ పార్టీ్కి క్లిష్ట పరిస్థితులు ఏమి లేవని, ఇంతకంటే ఇబ్బందికర పరిస్థితుల్లోనే ప్రత్యేక తెలంగాణ రాష్ట్రం సాధించినట్టు కేసీఆర్ చెప్పుకొచ్చారు. మళ్లీ బీఆర్ఎస్‌కు మంచి రోజులు రానున్నాయని కేసీఆర్ ఆకాంక్షించారు. నలుగురు ఎమ్మెల్యేలే ఉన్న కాంగ్రెస్ మొన్నటి అసెంబ్లీ ఎన్నికల్లో గెలిచి అధికారంలోకి రాలేదా అని కేసీఆర్ వివరించారు. అధికారంలో కంటే అపొజిషన్‌లో ఉన్నప్పుడే ఎమ్మెల్యే బాగా ఎదుగుతారని పేర్కొన్నారు. ఎక్కడో ఉన్న వారిని చేరదీసి మంచి నేతలను చేసి పదవులు ఇస్తే.. వాళ్లు మాత్రం పదవులు అనుభవించి పార్టీ వీడుతున్నారని ఆగ్రహం వ్యక్తం చేశారు. పార్టీ వదిలి వెళ్లే వారి గురించి ఆలోచించాల్సిన అవసరం లేదని.. కేసీఆర్ తేల్చి చెప్పారు.

అధికారంలోకి వచ్చి 7 నెలలైనా కాంగ్రెస్ సర్కారు.. పాలనపై పట్టు సాధించలేకపోయిందన్నారు. పాలనపై దృష్టి పెట్టకుండా.. గత ప్రభుత్వాన్ని అభాసుపాలు చేసే పనిలోనే ఉన్నారని కేసీఆర్ చురకలంటించారు. మొన్నటి వరకు ప్రశాంతంగా ఉన్న తెలంగాణలో శాంతిభద్రతలు ఎందుకు తప్పుతున్నాయని నిలదీశారు.