మరో మూడ్రోజులు వర్షాలు..తెలంగాణలో ఈ జిల్లాలకు ఆరెంజ్ అలర్ట్

తెలంగాణలో గతకొన్ని రోజులుగా ఎడతెరిపిలేకుండా వర్షాలతో రాష్ట్రంలో వాగులు, వంకలు పొంగి పొర్లుతున్నాయి. జలాశయాలు, ప్రాజెక్టులు నిండుకుండలా మారాయి. అయితే ఇప్పట్లో వర్షాలు తగ్గేలా కనిపించటం లేదు. మరో మూడ్రోజులపాటు రాష్ట్రంలో వర్షాలు కురుస్తాయని హైదరాబాద్ వాతావరణ కేంద్రం అధికారులు వెల్లడించారు. బంగాళాఖాతంలో ఏర్పడిన అల్పపీడనం వాయుగుండంగా బలపడటంతో రాష్ట్రంలో వర్షాలు కురుస్తాయన్నారు. పలు జిల్లాల్లో భారీ వర్షాలకు ఛాన్స్ ఉందని తెలిపారు.

కరీంనగర్‌, కుమ్రం భీం ఆసిఫాబాద్‌, నిజామాబాద్‌, సిరిసిల్ల, జగిత్యాల, మంచిర్యాల, జగిత్యాల, జయశంకర్‌ భూపాలపల్లి, పెద్దపల్లి తదితర జిల్లాల్లో అతి భారీ వర్షాలు కురుస్తాయన్నారు. ఈ మేరకు ఆయా జిల్లాలకు ఆరెంజ్ అలర్ట్ జారీ చేశారు. మరికొన్ని జిల్లాలకు ఎల్లో అలర్ట్‌ జారీచే శారు. ప్రజలు అప్రమత్తంగా ఉండాలని వర్షాలు కురిసే సమయంలో అవసరం అయితేనే బయటకు రావాలని సూచించారు. ఉరుములు, మెరుపులకు తోడు పిడుగులు పడే ఛాన్స్ ఉన్నందున జాగ్రత్తగా ఉండాలన్నారు.

ఇక ఎగువ ప్రాంతాల్లో కురుస్తున్న భారీ వర్షాలకు గోదావరిలో నీటిమట్టం క్రమంగా పెరుగుతుంది. కిన్నెరసాని, తాలిపేరు, ప్రాణహిత, ఇంద్రావతి వంటి ఉపనదుల నుంచి గోదావరికి వరద భారీ వచ్చి చేరుతోంది. దీంతో సోమవారం మధ్యాహ్నం భద్రచాలం వద్ద నీటి మట్టం 48 అడుగులకు చేరుకుంది. ఈ మేరకు అధికారులు రెండో ప్రమాద హెచ్చరిక జారీ చేశారు. సాయంత్రం 6 గంటలకు 49.10 అడుగులకు చేరుకుంది. నేడు 53 అడుగులు దాటే అవకాశం ఉండటంతో మూడో ప్రమాదక హెచ్చరిక జారీ చేసేందుకు సిద్ధమయ్యారు.

భారీ వర్షాల నేపథ్యంలో అప్రమత్తంగా ఉండాలని అన్ని జిల్లాల కలెక్టర్లను సీఎస్‌ శాంతికుమారి ఆదేశాలు జారీ చేశారు. వరదలు, వర్షాల ప్రభావంపై డీజీపీ జితేందర్‌, ప్రణాళికశాఖ ముఖ్యకార్యదర్శి సందీప్‌ సుల్తానియాతో కలిసి ఆమె అన్ని జిల్లాల కలెక్టర్లు, సీపీలు, ఎస్పీలతో టెలీకాన్ఫరెన్స్‌ నిర్వహించారు. జిల్లాల్లో ఏవిధమైన ప్రాణ, ఆస్తి నష్టం జరగకుండా చర్యలు తీసుకోవాలని ఆదేశాలు జారీ చేశారు. పునరావాస కేంద్రాల ఏర్పాటుపై చర్యలు తీసుకోవాలన్నారు.