పర్యాటక క్షేత్రంగా సర్వాయి పాపన్న సొంత గ్రామం,,,,భారీగా నిధులు మంజూరు

కరీంనగర్ జిల్లాలోని సైదాపూర్ మండలంలోని సర్దార్ సర్వాయి పాపన్న గౌడ్ సొంత గ్రామమైన.. సర్వాయిపేట రూపురేఖలు మారబోతున్నాయి. సర్వాయిపేటను పర్యాటక క్షేత్రంగా మార్చేందుకు ప్రభుత్వం నడుం బిగించింది. ఈ మేరకు.. మొదటి దశలోనే.. ఏకంగా 4.70 కోట్లు మంజూరు చేసింది. సర్వాయిపేట్ కోట అభివృద్ధితో పాటు సర్వాయిపేట నుంచి కిలాష్ పూర్ కోట వరకు సర్దార్ సర్వాయి పాపన్న గౌడ్ ఉన్న ప్రాంతాలన్నింటినీ పర్యాటక క్షేత్రాలుగా అభివృద్ధి చేసేందుకు ప్రభుత్వం నిర్ణయించింది.

బీసీ సంక్షేమ శాఖ ఆధ్వర్యంలో సర్దార్ సర్వాయి పాపన్న 374 వ జయంతి వేడుకలు రవీంద్రభారతిలో ఘనంగా నిర్వహించారు. ఈ కార్యక్రమానికి ముఖ్య అతిథిగా విచ్చేసిన డిప్యూటీ సీఎం మల్లు భట్టి విక్రమార్క.. సర్దార్ సర్వాయి పాపన్న జీవితం ఇందిరమ్మ రాజ్యానికి ఆదర్శమని చెప్పుకొచ్చారు. పాపన్న జయంతి రాష్ట్ర వ్యాప్తంగా నిర్వహించడం బలహీనవర్గాల పట్ల రాష్ట్ర ప్రభుత్వ చిత్తశుద్ధికి నిదర్శనమన్నారు. బలహీన వర్గాలకు స్ఫూర్తినిచ్చేలా ఉండాలని రాష్ట్ర ప్రభుత్వం ఈ కార్యక్రమాన్ని చేపట్టిందని పేర్కొన్నారు. ప్రజా ప్రభుత్వంలో బలహీన వర్గాలకు పెద్ద ఎత్తున బడ్జెట్ కేటాయించి కార్యక్రమాలను ముందుకు తీసుకుపోతున్నామని భట్టి పేర్కొన్నారు.

హక్కులు, కోర్టులు, చట్టాలు లేని సమయంలోనే సర్వాయి పాపన్న ఎన్నో విజయాలు సాధించి.. అందరికీ ఓ స్ఫూర్తిగా నిలిచారని కొనియాడారు. పాపన్న జీవిత చరిత్రను ప్రచారం చేయడానికి నిధుల కొరత లేదని.. బీసీ సంక్షేమ శాఖ మంత్రి ప్రణాళికలు రూపొందిస్తే వాటిని ఆమోదిస్తామన్నారు. హైదరాబాద్‌ నగర నడిబొడ్డులో సర్వాయి పాపన్న విగ్రహం ఉండాలని పెద్దలు కోరుతున్నారని.. మంత్రి పొన్నం ప్రభాకర్‌కు ఆ బాధ్యతను అప్పగిస్తున్నామని తెలిపారు. స్థలం గుర్తింపు, ఏర్పాట్లకు ప్రణాళిక సిద్ధం చేసి తీసుకు వస్తే ఏర్పాటు చేయడానికి ప్రభుత్వం సిద్ధంగా ఉందని ప్రకటించారు.

అనంతరం మాట్లాడిన మంత్రి పొన్నం ప్రభాకర్.. సర్వాయి పేట గ్రామాభివృద్ధికి నిధుల విడుదలకు సహకరించిన సీఎం రేవంత్ రెడ్డి, డిప్యూటీ సీఎం భట్టి విక్రమార్క, టూరిజం శాఖ మంత్రి జూపల్లి కృష్ణారావుకు ధన్యవాదాలు తెలిపారు. సర్వాయి పాపన్న గౌడ్ నడియాడిన ప్రాంతాలను టూరిజంగా అభివృద్ధి చేసుకుంటే దేశ విదేశాలకు కూడా ఆయన జీవిత చరిత్ర తెలుస్తుందని మంత్రి పొన్నం ప్రభాకర్ తెలిపారు. నేటి యువతకు సర్వాయి పాపన్న గౌడ్ జీవిత చరిత్ర స్ఫూర్తి దాయకంగా ఉంటూ ఆ ప్రాంతాలు టూరిజంగా మరింత అభివృద్ధి చెందుతాయని ఆశాభావం వ్యక్తం చేశారు.