అలా చేస్తే.. హైడ్రా కమిషనర్ రంగనాథ్ స్ట్రాంగ్ వార్నింగ్

గ్రేటర్ హైదరాబాద్ పరిధిలో చెరువులు, కుంటలు, నాలాలు ఆక్రమించి ఎఫ్‌టీఎల్, బఫర్ జోన్లలో నిర్మించిన అక్రమ కట్టడాలను హైడ్రా కూల్చివేస్తున్న సంగతి తెలిసిందే. హైడ్రా కమిషనర్ ఏవీ రంగనాథ్ ఎలాంటి ఒత్తిళ్లకు లోను కాకుండా కూల్చివేతలు చేపడుతున్నారు. ఇదే అదనుగా కొందరు కేటుగాళ్లు అక్రమ వసూళ్లకు పాల్పడుతున్నారు. తాజాగా.. అమీన్‌పూర్ పోలీస్ స్టేషన్ పరిధిలోని ఓ ప్రాజెక్ట్ నిర్మిస్తున్న బిల్డర్‌ను హైడ్రా పేరిట బెదిరింపులకు పాల్పడ్డారు. డాక్టర్ బండ్ల విప్లవ సిన్హా అనే వ్యక్తి సోషల్ యాక్టివిస్ట్, సోషల్ వర్కర్ అని బోర్డు పెట్టుకొని నిర్మాణం పనులు చూడడానికి వస్తున్న కస్టమర్లకు అసత్య ప్రచారం చేస్తున్నారు.

  హైడ్రా కమిషనర్ రంగనాథ్‌తో మంచి పరిచయం ఉందని చెప్పి ఆయనతో కలిసి దిగిన ఫోటోలు చూపించి బెదిరింపులకు పాల్పడుతున్నారు. రంగనాథ్ తనకు బాగా దగ్గరని అమీన్‌పూర్‌లో ఎలాంటి విషయమైనా తననే అడుగుతారని బిల్డర్‌ను డబ్బలు డిమాండ్ చేశాడు. మీ నిర్మాణం జోలికి రావద్దనుకుంటే రూ. 20 లక్షలు ఇవ్వాలని డిమాండ్ చేశాడు. లేదంటే హైడ్రాకు ఫిర్యాదు చేయటంతో పాటు అక్రమ కట్టడాలపై మీడియాలో వార్తలు రాయిస్తానని బెదిరించాడు. దీంతో బిల్డర్ పోలీసులను ఆశ్రయించగా.. బెదిరింపులకు పాల్పడిన విప్లవ సిన్హాపై కేసు నమోదు చేశారు.

ఈ వ్యవహారంపై తాజాగా హైడ్రా కమిషనర్ రంగనాథ్ స్పందించారు. హైడ్రా పేరుతొ డబ్బు వసూళ్లకు ఉపేక్షించేది లేదని హెచ్చరించారు. అలాంటి వారిని జైలుకు పంపుతామని వార్నింగ్ ఇచ్చారు. హైడ్రా పేరుతో ఎవరైనా డబ్బులు డిమాండ్ చేస్తే తమ దృష్టికి తేవాలని రంగనాథ్ కోరారు. బఫర్ జోన్, సామాజిక కార్యకర్తల ముసుగులో ఎవరైనా తన పేరుతో కానీ.. హైడ్రా పేరుతో కానీ డబ్బు వసూళ్లకు పాల్పడితే ప్రభుత్వ విభాగానికి చెందిన అధికారులు, సిబ్బందికి సమాచారం ఇవ్వాలన్నారు. డబ్బు వసూళ్లకు పాల్పడితే వారిపై చట్టపరమైన తీసుకుంటామని కమిషనర్ రంగనాథ్ హెచ్చరించారు. హైడ్రా అక్రమ కట్టడాలు మాత్రమే కూలుస్తుందని.. ప్రజలు అనవసరంగా ఆందోలళ చెందాల్సిన పని లేదని అన్నారు. కేటుగాళ్ల మాటలు నమ్మి మోసపోవద్దని సూచించారు.