'ఐ డ్రాప్స్‌'తో దృష్టి లోపం సమస్యకు చెక్.. ఇక కళ్లజోడు అవసరమే లేదు

మన శరీరంలో సున్నితమైన ఇంద్రియం కళ్లు. అందుకే సర్వేంద్రీయానం నయనం ప్రధానం అంటారు. మనిషి కళ్లు తెరిచిన దగ్గర నుంచి తిరిగి మూసేవరకు నిత్యం కళ్లతోనే పని. మనకు గుండె ఎంత ముఖ్యమో, కళ్లు కూడా అంతే ముఖ్యం. అయితే ఇటీవల కాలంలో చాలామంది కంటి సమస్యలతో బాధపడుతున్నారు. చిన్న పిల్లల నుంచి పెద్దవారి వరకు దృష్టిలోపంతో ఇబ్బందులు పడుతున్నారు. చిన్న పిల్లలు సరైన వెలుతురు లేకుండా పుస్తకాలు చదవటం.. పెద్దలు కంప్యూటర్ స్క్రీన్‌ను తదేకంగా చూడటం వలన కంటిపై ఒత్తిడి పడి సమస్యలకు దారి తీస్తుంది.

ఇక చాలా మందికి 40 ఏళ్లు దాటగానే.. ప్రెస్బియోపియా వస్తుంది. అలాంటి వారు కళ్లజోడు లేకుండా పుస్తకాలు చదవలేరు. ఇక నుంచి ఆ అవసరం లేదు కళ్లజోడు లేకుండానే ఏం చక్కా పుస్తకాలు చదివేయవచ్చు. చుక్కల మందుతో కంటి సమస్యలకు చెక్ పడనుంది. కళ్లజోడు అవసరం లేకుండా చేసే చుక్కల మందు మరో నెల రోజుల్లో మార్కెట్‌లోకి అందుబాటులోకి రానుంది. ముంబైకి చెందిన ఎన్‌టాడ్‌ ఫార్మా కంపెనీ 'ప్రెస్‌వూ' పేరిట చుక్కల మందును తయారు చేయగా.. దానికి భారత ఔషధ నియంత్రణ సంస్థ అనుమతిచ్చింది.

అక్టోబరు మొదటివారంలో ఈ మందును ప్రజలకు అందుబాటులోకి తీసుకొస్తామని ఆ సంస్థ వెల్లడించింది. 40 నుంచి 55 ఏళ్ల వయసువారిలో.. కొద్దిపాటి నుంచి ఓ మోస్తరు ప్రెస్బియోపియాతో బాధపడుతున్నవారు ఈ ఐ డ్రాప్స్ కంట్లో ఒక్క చుక్క వేస్తే చాలు 15 నిమిషాల్లోనే పనిచేయడం ప్రారంభిస్తుందని సంస్థ సీఈవో నిఖిల్‌ మీడియాతో వెల్లడించారు. ఒక్క డ్రాప్ వేస్తే చాలు ఆరు గంటల దాకా.. పని చేస్తుందని.. రెండు చుక్కలు వేస్తే మరింత ఎక్కువ సమయం పనిచేస్తుందని ఆయన వివరించారు. రానున్న నెల రోజుల్లో దీన్ని 

కాగా, అమెరికాలో ఇటువంటి డ్రాప్స్ ఇప్పటికే అమల్లో ఉన్నాయి. 'వ్యూటీ' పేరుతో 2022లోనే ఈ తరహా ఐ డ్రాప్స్‌ను అందుబాటులోకి తీసుకొచ్చారు. 'ప్రెస్‌వూ' ఇండియాలో తయారైన మొట్టమొదటి ప్రెస్బియోపియా ఐ డ్రాప్స్ కానుంది. ఈ చుక్కల మందు వల్ల ఎలాంటి దుష్ప్రభావాలూ ఉండవని ఎన్‌టాడ్‌ ఫార్మా కంపెనీ సీఈవో నిఖిల్‌ వెల్లడించారు. ఈ డ్రాప్స్‌ తయారీలో ‘పైరోకార్బన్‌’ మాలిక్యూల్‌ను ఉపయోగించినట్లు ఆయన చెప్పారు. ఈ చుక్కలు వేయగానే.. అందులోని మెడిసిన్ కనుపాపలు కుచించుకుపోయేలా చేస్తుందన్నారు. దానివల్ల 'డెప్త్‌ ఆఫ్‌ ఫీల్డ్‌' పెరిగి కంటిచూపు నిశితమవుతుందని తెలిపారు. ఈ డ్రాప్స్ అందుబాటులోకి వస్తే కళ్లజోడు అవసరం లేకుండానే పనులు చేసుకోవచ్చునని అన్నారు.