ఎయిర్‌పోర్టు నుంచి ఫోర్త్‌ సిటీకి మెట్రో రైలు.. రెండు మార్గాలు, రెండేసి ఆప్షన్లు

హైదరాబాద్ నగర అభివృద్దిపై రేవంత్ సర్కార్ స్పెషలో ఫోకస్ పెట్టింది. ఇప్పటికే హైదదరాబాద్, సికింద్రాబాద్‌, సైబరాబాద్ ఉండగా.. ఫ్యూచర్ సిటీ పేరుతో ఫోర్త్ సిటీ నిర్మిస్తామని సీఎం రేవంత్ రెడ్డి ఇది వరకే ప్రకటించారు. రంగారెడ్డి జిల్లా ముచ్చింతల ప్రాంతాల్లో ఫోర్త్ సిటీని అభివృద్ధి చేస్తామని చెప్పారు. అంతర్జాతీయ సంస్థలను ఆకర్షించటం, స్పోర్ట్స్, మెడికల్ హబ్‌గా ఈ ప్రాంతాన్ని డెవలప్ చేయనున్నట్లు సీఎం రేవంత్ వెల్లడించారు.

తాజాగా..ఫ్యూచర్‌ సిటీకి హైదరాబాద్ నగరం నుంచి రాకపోకలపై రేవంత్ ప్రభుత్వం దృష్టి సారించింది. అందుకోసం ఉన్నతాధికారులు నాలుగు విధాలుగా మార్గాలను సూచించారు. ఈ మార్గాలను శంషాబాద్‌ రాజీవ్ గాంధీ ఎయిర్‌పోర్ట్ ఫ్యూచర్ సిటీకి చేరుకునేలా ప్రణాళికలు సిద్ధం చేశారు. ఇందులో రెండు మార్గాలు మెట్రో ట్రైన్‌కు సంబంధించినవి కాగా... మరో రెండు ఎలక్ట్రిక్‌ బస్‌ రోడ్‌ ట్రాన్స్‌పోర్ట్‌ సిస్టంకు సబంధించినవి ఉన్నాయి. 69 కి.మీతో మూడు కారిడార్లలో మెట్రో ట్రైన్ మొదటి దశ నిర్మాణం పూర్తయ్యి ప్రస్తుతం నగర ప్రజలకు అందుబాటులో ఉంది.

మెట్రో ట్రైన్ రెండో దశ ప్రాతిపాదించగా.. 78.4 కి.మీ.తో ఐదు కారిడార్లు అందుబాటులోకి రానున్నాయి. ఇందులో శంషాబాద్‌ ఎయిర్‌పోర్టుకు హైదరాబాద్ నగరంలోని మెట్రో రహదారులతో కనెక్ట్ చేయనున్నారు. నగరం భవిష్యత్‌ అవసరాల్ని దృష్టిలో పెట్టుకుని రేవంత్ ప్రభుత్వం ఫోర్త్‌ సిటీ అభివృద్ధిపై ఫోకస్ పెట్టింది. అక్కడే స్కిల్‌ యూనివర్సిటీ నిర్మిస్తామని కూడా ప్రకటించారు. ఎయిర్‌పోర్టు నుంచి ఫ్యూచర్‌సిటీకి మెట్రో ట్రైన్ మార్గం ఆప్షన్లను అధికారులు ఇటీవల ప్రభుత్వానికి నివేదించారు. శంషాబాద్‌ ఎయిర్‌పోర్టు నుంచి రావిర్యాల మీదుగా ఒక మార్గం సూచించగా.. తుక్కుగూడ మీదుగా శ్రీశైలం మార్గంలో మరో మార్గాన్ని ఆప్షన్లుగా డీపీఆర్ సిద్దం చేశారు.

ఎయిర్‌పోర్టు నుంచి ఫోర్త్‌ సిటీ (స్కిల్‌ యూనివర్సిటీ) వరకు వయా శ్రీశైలం రోడ్డు మీదుగా 32 కి.మీ దూరంతో ఓ మార్గాన్ని ప్రతిపాదించారు. మెుత్తం స్టేషన్ల సంఖ్య 12 కాగా.. నిర్మాణ వ్యయం రూ. 6,173 కోట్లుగా నిర్ణయించారు. ఎయిర్‌పోర్టు నుంచి ఫోర్త్‌ సిటీ (స్కిల్‌ యూనివర్సిటీ) వరకు వయా రావిర్యాల మీదుగా మరో మార్గాన్ని సూచించారు. మెుత్తం దూరం 32.4 కి.మీ కాగా.. 10 స్టేషన్లు ప్రతిపాదించారు. నిర్మాణ వ్యయం: 5,216 కోట్లుగా నిర్ణయించారు. త్వరలోనే వీటిపై ప్రభుత్వం ఓ అంచనాకు రానున్నట్లు సమాచారం.