దసరా, దీపావళికి శ్రీకాకుళం రూట్లో 12 ప్రత్యేక రైళ్లు

దసరా, దీపావళి పండుగల నేపథ్యంలో దక్షిణ మధ్య రైల్వే.. ప్రయాణికులకు శుభవార్త చెప్పింది. సికింద్రాబాద్ నుంచి ఆంధ్రప్రదేశ్‌లోని వివిధ ప్రాంతాలకు ప్రత్యేక రైళ్లు నడపనున్నట్టు ప్రకటించింది. అక్టోబరు 2 నుంచి నవంబరు 7 మధ్య ఈ రైళ్లను సికింద్రాబాద్- శ్రీకాకుళం మార్గంలో నడుపుతామని పేర్కొంది. ప్రతి బుధ, గురువారాల్లో బయలుదేరే ఈ రైళ్లకు నల్గొండ, మిర్యాలగూడ, నడికుడి, పిడుగురాళ్ల, సత్తెనపల్లి, గుంటూరు, విజయవాడ, ఏలూరు, తాడేపల్లిగూడెం, నిడవోలు, రాజమండ్రి, సామర్లకోట, అన్నవరం, యలమంచిలి, అనకాపల్లి, దువ్వాడ, పెందుర్తి, కొత్తవలస, విజయనగరం, చీపురుపల్లి స్టేషన్లలో హాల్టింగ్‌ ఉంటుందని దక్షిణ మధ్య రైల్వే సీపీఆర్‌వో శ్రీధర్‌ పేర్కొన్నారు. ఈ ప్రత్యేక రైళ్లకు అన్నీ త్రీటైర్‌ ఏసీ కోచ్‌లే ఉంటాయని ఆయన చెప్పారు.

కాగా, సికింద్రాబాద్ నుంచి తిరుపతి, శ్రీకాకుళం నుంచి తిరుపతికి దసరా, దీపావళి పండుగలకు అక్టోబరు 5 నుంచి నవంబరు 12 మధ్య 24 ప్రత్యేక రైళ్లు నడుపుతామని తెలిపింది. సికింద్రాబాద్-తిరుపతి మధ్య అక్టోబరు 5 నుంచి నవంబరు 9 మధ్య ప్రతి శనివారం.. తిరుపతి-సికింద్రాబాద్ మధ్య అక్టోబరు 8 నుంచి నవంబరు 12 వరకు ప్రతి మంగళవారం ప్రత్యేక రైళ్లు అందుబాటులో ఉంటాయి. అలాగే, తిరుపతి-శ్రీకాకుళం మధ్య అక్టోబరు 6 నుంచి నవంబరు మధ్య ప్రతి ఆదివారం .. అక్టోబరు 7 నుంచి నవంబరు 11 వరకు ప్రతి సోమవారం శ్రీకాకుళం-తిరుపతి మధ్య ప్రత్యేక రైలు నడుపుతున్నట్టు వెల్లడించారు. ఈ రైళ్లు చీపురపల్లి, విజయనగరం, కొత్తవలస, పెందుర్తి, దువ్వాడ, అనకాపల్లి, యలమంచిలి, సామర్లకోట, రాజమండ్రి, నిడదవోలు, తాడేపల్లిగూడెం, ఏలూరు, విజయవాడ, తెనాలి, గుంటూరు, బాపట్ల, ఒంగోలు, వెంకటగిరి, గూడూరు, రేణిగుంట స్టేషన్లలో ఆగుతాయి.

ఇక, దసరా, దీపావళి, సంక్రాంతి పండగ సమయంలో రైల్వే స్టేషన్లు, బస్టాండ్లు ప్రయాణికులతో కిటకిటలాడుతాయి. రెగ్యులర్ సర్వీసులతో పాటు ఆర్టీసీ, రైల్వేలు ప్రత్యేక బస్సులు, ప్రత్యేక రైళ్లు నడుపుతుంటాయి. దీని వల్ల ప్రభుత్వానికి దండిగా ఆదాయం సమకూరుతుంది. ఆర్టీసీ బస్సుల్లో అయితే అదనపు ఛార్జీలను వసూలు చేస్తారు.