పేదలకు డబుల్ బెడ్ రూం ఇండ్లు.. మంత్రి పొంగులేటి కీలక ఆదేశాలు

గత బీఆర్ఎస్ ప్రభుత్వం పేదల కోసం డబుల్ బెడ్‌ రూం ఇండ్లను నిర్మించిన సంగతి తెలిసిందే. ఇప్పటికే ఇండ్ల నిర్మాణం పూర్తి కాగా.. అర్హులైన లబ్ధిదారులకు అందించాల్సి ఉంది. ఈ నేపథ్యంలో డబుల్ బెడ్ ఇండ్ల కోసం ఆశావాహులు ఎదురు చూస్తున్నారు. ఎప్పుడెప్పుడు ఇస్తారా అని ఆశగా చూస్తున్నారు. ఈ నేపథ్యంలో మంత్రి రెవెన్యూ, గృహనిర్మాణ శాఖ మంత్రి పొంగులేటి శ్రీనివాస్ రెడ్డి అధికారులకు కీలక ఆదేశాలు జారీ చేశారు. ఇప్పటికే నిర్మాణం పూర్తయిన డబుల్ బెడ్ రూం ఇండ్లను లబ్ధిదారులకు అందించాలన్నారు. దసరాలోపు లబ్ధిదారులను ఎంపిక చేసి వారికి గృహాలు అప్పగించాలన్నారు. ఈ మేరకు కలెక్టర్లు చర్యలు తీసుకోవాలని నిర్దేశించారు. లబ్ధిదారుల ఎంపిక కోసం జిల్లా ఇన్‌ఛార్జి మంత్రి ఛైర్మన్‌గా, కలెక్టర్‌ కన్వీనర్‌గా కమిటీలను ఏర్పాటు చేస్తామని మంత్రి స్పష్టం చేశారు.

స్మార్ట్‌ కార్డులు, ఎల్‌ఆర్‌ఎస్, రెండు పడక గదుల ఇండ్లు, అర్బన్‌ డెవలప్‌మెంట్‌ అథారిటీ (యూడీఏ)లు, ధాన్యం కొనుగోళ్లు తదితర అంశాలపై మంగళవారం అధికారులతో మంత్రి సమీక్ష నిర్వహించారు. కుటుంబ డిజిటల్‌ హెల్త్‌ కార్డు ప్రొఫైల్‌ రూపకల్పన ప్రక్రియను చాలా జాగ్రత్తగా నిర్వహించాలని సూచించారు. ప్రతి కుటుంబానికి హెల్త్‌ ప్రొఫైల్‌ రూపొందించాలని సూచించారు. ప్రతి కుటుంబానికి ప్రత్యేక నంబరుతో స్మార్ట్‌ కార్డులివ్వనున్నట్లు స్పష్టం చేశారు. ఇందుకోసం అక్టోబర్ 3 నుంచి 7 వరకు అన్ని నియోజకవర్గాల్లో 238 ప్రాంతాల్లో పైలట్‌ సర్వే నిర్వహిస్తున్నామని స్పష్టం చేశారు. ఎటువంటి పొరపాట్లకు తావు లేకుండా కార్డులు జారీ చేయాలని సూచించారు.

ఇక రైతులకు కూడా మంత్రి పొంగులేటి తీపి కబురు చెప్పారు. ఈ వానాకాలం సీజన్ నుంచే 35 సన్న రకాల వడ్లకు క్వింటాలుకు రూ.500 బోనస్‌ ఇవ్వనున్ననట్లు చెప్పారు. ధాన్యం కొనుగోళ్లకు రాష్ట్రవ్యాప్తంగా 7144 కేంద్రాలు ఏర్పాటు చేస్తామన్నారు. సన్న, దొడ్డు రకాలకు వేర్వేరుగా కేంద్రాలు ఏర్పాటు చేయనున్నట్లు వెల్లడించారు. వరదలతో దెబ్బతిన్న ప్రాంతాల్లో వెంటనే మరమ్మతులు పూర్తి కావాలని అధికారులను ఆదేశించారు. పాఠశాలలు, ఆస్పత్రులు, అంగన్‌వాడీ కేంద్రాలకు ప్రాధాన్యమివ్వాలని వారికి సూచించారు.