తెలంగాణకు మళ్లీ రెయిన్ అలర్ట్.. నేడు ఈ జిల్లాల్లో భారీ వర్షాలు

తెలంగాణలో వర్షాలపై హైదరాబాద్ వాతావరణ కేంద్రం అధికారులు కీలక అప్డేట్ ఇచ్చారు. నేడు, రేపు రాష్ట్రంలో వర్షాలు కురిసే అవకాశం ఉందని అన్నారు. బంగాళాఖాతంలో ఏర్పడిన ఉపరితల ఆవర్తన ద్రోణి క్రమంగా బలపడుతోందని చెప్పారు. ఈ ద్రోణి ప్రభావం కారణంగా రెండు తెలుగు రాష్ట్రాల్లోనూ మరో రెండు రోజులు పాటు వర్షాలు కురుస్తాయన్నారు. నేడు తెలంగాణలోని పలు జిల్లాల్లో ఓ మోస్తరు వర్షాలకు అవకాశం ఉన్నట్లు పేర్కొన్నారు.

కొన్ని జిల్లాల్లో అక్కడక్కడ మాత్రం భారీ వర్షాలు కురిసే అవకాశం ఉందని తెలిపారు హైదరాబాద్ వాతావరణ కేంద్రం అధికారులు. నేడు ఆదిలాబాద్‌, ఆసిఫాబాద్‌, యాదాద్రి, మహబూబాబాద్‌, నల్లగొండ, సూర్యాపేట, ఖమ్మం, భద్రాద్రి కొత్తగూడెం, వరంగల్‌, నారాయణపేట, మహబూబ్‌నగర్‌, వనపర్తి, జోగులాంబ గద్వాల, వికారాబాద్‌ జిల్లాల్లో వర్షాలకు ఛాన్స్ ఉందన్నారు. ఈ మేరకు ఈ జిల్లాలకు ఎల్లో అలెర్ట్‌ జారీ చేశారు.

ఇక భారీ వర్షాలతో పాటుగా ఉరుములు, మెరుపులు ఉంటాయన్నారు. పలు చోట్ల పిడుగులు కూడా పడే అవకాశం ఉందని అన్నారు. ఈ మేరకు పొలం పనులకు, బయటకు వెళ్లేవారు జాగ్రత్తగా ఉండాలని సూచించారు. గంటలకు 30-40 కిలోమీటర్ల వేగంతో బలమైన ఈదురు గాలులు కూడా వీస్తాయన్నారు. ఇక నేడు హైదరాబాద్ నగరంలో పొడి వాతావరణం ఉంటుందని చెప్పారు. ఉదయం కాస్త ఎండ కాసినా.. సాయంత్రానికి మేఘాలు కమ్ముకొని పలు ప్రాంతాల్లో వర్షాలు కురిసే అవకాశం ఉందన్నారు. ఈ నేపథ్యంలో నగర ప్రజలకు జీహెచ్‌ఎంసీ అధికారులు హెచ్చరికలు జారీ చేశారు.

ద్రోణి ప్రభావంతో ఏపీలోని పలు జిల్లాల్లో సైతం వర్షాలు కురుస్తాయని అమరావతి వాతావరణ కేంద్రం అధికారులు వెల్లడించారు. ఏపీలో నేడు కర్నూలు, నంద్యాల, అనంతపురం, అల్లూరి, ఎన్టీఆర్, ప్రకాశం, శ్రీసత్యసాయి, YSR కడప, చిత్తూరు, తిరుపతి, అన్నమయ్య జిల్లాల్లో తేలికపాటి నుంచి ఓ మోస్తరు వర్షాలు కురుస్తాయన్నారు. ఈ మేరకు ఆయా రాష్ట్రాలకు ఎల్లో అలర్ట్ జారీ చేశారు. మత్స్యకారులు సముద్రంలో వేటకు వెళ్లొద్దని వాతావరణ శాఖ అధికారులు సూచించారు.