తెలంగాణకు రెయిన్ అలర్ట్.. నేడు ఈ జిల్లాల్లో అతి భారీ వర్షాలు

తెలంగాణలో వర్షాలపై హైదరాబాద్ వాతావరణ కేంద్రం అధికారులు కీలక అప్డేట్ ఇచ్చారు. రాష్ట్రంలో నేడు, రేపు వర్షాలు కురుస్తాయని చెప్పారు. అరేబియా సముద్రంలో ఒక అల్పపీడనం బలపడుతోందని అన్నారు. ప్రస్తుతం అది కర్ణాటక, గోవాకి దగ్గర్లో కేంద్రీకృతమై ఉందని చెప్పారు. మరో 2 రోజుల్లో ఇది వాయుగుండంగా మారే ఛాన్స్ ఉన్నట్లు వెల్లడించారు. దీంతో పాటుగా నైరుతి బంగాళాఖాతంలో ఒక ఆవర్తనం ఏర్పడినట్లు చెప్పారు. ప్రస్తుతం అది తమిళనాడు తీరానికి దగ్గర్లో కేంద్రీకృతమై ఉన్నట్లు స్పష్టం చేశారు. మరో ఆవర్తనం అక్టోబర్ 12న దక్షిణ బంగాళాఖాతానికి పశ్చిమం వైపున ఏర్పడే అవకాశం ఉన్నట్ల హైదరాబాద్ వాతావరణ కేంద్రం అధికారులు వెల్లడించారు.

వీటి ప్రభావంతో తెలంగాణ, ఏపీ రాష్ట్రాల్లో వర్షాలు కురుస్తాయని అన్నారు. ఓ మోస్తరు నుంచి అతి భారీ వర్షాలు కురిసే అవకాశం ఉన్నట్లు అధికారులు వెల్లడించారు. నేడు నల్లగొండ, సూర్యాపేట, రంగారెడ్డి, ఖమ్మం, భద్రాద్రి కొత్తగూడెం, మహబూబ్ నగర్, సంగారెడ్డి, మెదక్, ఆదిలాబాద్, ఆసిఫాబాద్, యాదాద్రి, నారాయణపేట, వనపర్తి, గద్వాల జిల్లాల్లో అతి భారీ వర్షాలు కురుస్తాయని చెప్పారు. ఈ మేరకు ఆయా జిల్లాలకు ఎల్లో అలర్ట్ జారీ చేశారు. వర్షంతో పాటుగా ఈదురు గాలులు కూడా వీచే అవకాశం ఉందన్నారు. తెలంగాణలో గంటకు 13 కిలోమీటర్ల వేగంతో గాలులు వీస్తాయన్నారు. ఉరుములు మెరుపులతో పాటుగా పిడుగులు కూడా పడే ఛాన్స్ ఉందని అప్రమత్తంగా ఉండాలని సూచించారు.

ఇక హైదరాబాద్ నగరంలో నేడు పొడి వాతావరణం ఉంటుందని సాయంత్రం తర్వాత వర్షాలు కురిసే అవకాశం ఉన్నట్లు వెల్లడించారు. గురువారం సాయంత్రం నగరంలోని పలు ప్రాంతాల్లో భారీ వర్షం కురిసింది. పగలు తీవ్రంగా ఎండకాసినా.. సాయంత్రానికి వర్షం కురిసింది. నారాయణగూడ, హిమాయత్ నగర్, కోఠి, జూబ్లీహిల్స్, మాదాపూర్, యూసఫ్ గూడ, మెహదీపట్నం, దిల్‌సుఖ్ నగర్, ఫిల్మ్ నగర్, బంజారాహిల్స్, షేక్‌పేట, కీసర, ఘట్‌కేసర్, సరూర్ నగర్, కొత్తపేట, మలక్‌పేట, బషీర్‌బాగ్, అబిడ్స్ తదితర ప్రాంతాల్లో ఉరుములు మెరుపులతో కూడిన భారీ వర్షం కురిసింది. వర్షం కారణంగా పలు ప్రాంతాల్లో భారీగా ట్రాఫిక్ స్తంభించింది.