టాప్ 3 డేంజర్ స్ట్రీట్ ఫుడ్స్.. బీ కేర్ ఫుల్, తింటే ప్రాణాలే పోవచ్చు

హైదరాబాద్ నందినగర్ ప్రాంతంలో మోమోస్ తిని ఓ మహిళ మృతి చెందిన విషయం తెలిసిందే. వీక్లి మార్కెట్‌లో మోమోస్ తిన్న ఓ మహిళ ప్రాణలు కోల్పోగా.. మరో 50 మంది అస్వస్థకు గురయ్యారు. వారం క్రితం సికింద్రాబాద్ ఏరియాలో షవర్మా మయోనైజ్ తిని నలుగురు వాంతులు, విరేచనాలతో అస్వస్థతకు గురయ్యారు. ఇటీవల కాలంలో స్ట్రీడ్ ఫుడ్, హోటల్ ఫుడ్ తిని చాలా మంది ఆసుపత్రుల పాలయ్యారు. అయితే ఇలా రుచికరంగా లభించే కొన్ని స్ట్రీట్ ఫుడ్ ప్రమాదకరమని వైద్య, ఆరోగ్య నిపుణులు చెబుతున్నారు. కొన్ని రకాల ఫుడ్స్ ఆరోగ్య సమస్యలను తీసుకొస్తాయని అంటున్నారు. అందులో ఉండే సాధారణ బ్యాక్టీరియా, సూక్ష్మజీవులు ప్రాణాలు తీస్తాయని అంటున్నారు. అలా ప్రజల ప్రాణాలకు హానికరమైన టాప్ 3 స్ట్రీడ్ ఫుడ్స్ ఏంటో ఇప్పుడు తెలుసుకుందాం.

పానీ పూరి/గోల్‌గప్పా

పానీ పూరి అంటే తెలియని వారుండరు. సాయంత్రం అయిందంటే చాలు చాలామంది పానీ పూరి బండ్ల వద్ద ఈగల్లా మసురుతారు. పానీ పూరిని ఇష్టంగా తింటుంటారు. ప్రజల ఆరోగ్యాన్ని పాడు చేసే స్ట్రీట్ ఫుడ్స్‌లో పానీ పూరి ఒకటి డాక్టర్లు హెచ్చరిస్తున్నారు. అపరిశుభ్రంగా పానీ పూరి తయారు చేయటం వల్ల ప్రజల ప్రాణాలకు ముప్పు వాటిల్లుతుందని చెబుతున్నారు. పానీ పూరీలో రసాయనాలు, బ్యాక్టీరియా ఉన్నట్లు గుర్తించారు. పానీ పూరీలో సాధారణంగా ఉపయోగించే ఫిల్టర్ చేయని విబ్రియో కలరాకు దారి తీస్తుందని అంటున్నారు. అందులో సాల్మోనెల్లా, ఇ.కోలి వంటి వ్యాధి కారక బాక్టీయారాలు ఉంటాయని చెబుతున్నారు. ఈ బ్యాక్టీరియా వాంతులు, తిమ్మిర్లు, అతిసారం వంటి తీవ్రమైన లక్షణాలను కలిగిస్తుందని నిపుణలు హెచ్చరిస్తున్నారు. కొన్ని సందర్భాల్లో ప్రాణాలు సైతం పోవచ్చునని అంటున్నారు. మసాలా నీటిలో ఉపయోగించే సింథటిక్ రంగులు ఆరోగ్యానికి హానీ చేస్తాయని చెబుతున్నారు. పరిశుభ్రమైన వాతావరణంలో తయారు చేసిన పానీపూరి మాత్రమే తినటానికి ప్రయత్నించాలని సూచిస్తున్నారు.

షవర్మా

ఈ మధ్య కాలంలో చాలా మంది షవర్మా తిని అస్వస్థతకు గురయ్యారు. షవర్మా తయారీకి ఉపయోగించే మాంసాన్ని నిల్వ చేసి ఆహారంగా తయారు చేసినప్పుడు బ్యాక్టీరియా తయారవుతుందని ఆరోగ్య నిపుణులు చెబుతున్నారు. ఫుడ్ పాయిజనింగ్ అవుతుందని.. మరణాలకు కూడా దారి తీస్తుందని హెచ్చరిస్తున్నారు. షవర్మాలో కనిపించే సాధారణ బాక్టీరియాలలో సాల్మొనెల్లా, స్టెఫిలోకాకస్ ఆరియస్, ఇ.కోలి ఉన్నాయని గుర్తించారు. ఇవి సరిగ్గా వండని లేదా నిల్వ చేసిన మాంసంలో వృద్ధి చెందుతాయని చెబుతున్నారు. ఈ బ్యాక్టీరియా వాంతులు, విరేచనాలు, పొత్తి కడుపు నొప్పి వంటి తీవ్రమైన లక్షణాలను కలిగిస్తుందని అంటున్నారు. సరైన సమయంలో చికిత్స అందించకపోతే ప్రాణాలు కూడా పోవచ్చునని హెచ్చరిస్తున్నారు. తాజాగా తయారుచేసిన షవర్మాను మాత్రమే తినాలని సూచిస్తున్నారు. అందులో ఉపయోగించే మయోనైజ్ సైతం తయారు చేసిన రెండు గంటల్లోనే తినాలని సూచిస్తున్నారు.

ప్రమాదకరమైన స్ట్రీట్ ఫుడ్స్

మోమోస్

దక్షిణాసియాలో ప్రసిద్ధి చెందిన మోమోస్ అపరిశుభ్రమైన వాతావరణంలో తయారు చేసినా నిల్వ చేసినా ఆరోగ్య ప్రమాదాలకు దారి తీస్తుందని అంటున్నారు. స్ట్రీట్ వెండెడ్ మోమోస్‌లో తరచుగా ఇ.కోలి, లిస్టెరియా మోనోసైటోజెన్‌, బాసిల్లస్ సెరియస్ వంటి బాక్టీరియా ఉన్నట్లు గుర్తించారు. ఇవి సాధారణంగా పచ్చి మాంసం, ఉడకని కూరగాయలపై కనిపిస్తుంది. కలుషితమైన చట్నీలు, చెడిపోయిన పదార్థాలతో తయారు చేసిన మోమోస్ చాలా డేంజర్ అని అంటున్నారు. ఇవి తీవ్రమైన జీర్ణక్రియకు సంబంధించిన సమస్యలు కలిగిస్తాయని చెబుతున్నారు. కొన్నిసార్లు ప్రాణాలు సైతం కోల్పోయే ప్రమాదం ఉందని హెచ్చరిస్తున్నారు. కాబట్టి పరిశుభ్రమైన వాతావరణంలో లభించే తాజా ఆహార పదార్థాలు మాత్రమే తీసుకోవాలని చెబుతున్నారు. బయట ఫుడ్ తీసుకోకపోవటమే ఉత్తమమని ఇంట్లో వండే పదార్థాలు తీసుకోవాలని సూచిస్తున్నారు.