'హైడ్రా' భయంతో తగ్గిన ఇండ్ల కొనుగోళ్లు.. బిల్డర్ల సరికొత్త ఆలోచన, అదిరే ఆఫర్లు

హైదరాబాద్ నగరంలో 'హైడ్రా' పేరు చెబితే బిల్డర్లు, ఇండ్ల కొనుగోళ్లదారులు హడలిపోతున్నారు. చెరువులు, కుంటలు, ప్రభుత్వ స్థలాలు, పార్కులు, నాలాలు కబ్జా చేసిన కట్టిన నిర్మాణాలను హైడ్రా కూల్చేస్తోంది. గత 100 రోజుల వ్యవధిలో వందల నిర్మాణాలు నేలమట్టం చేశారు. అక్రమంగా నిర్మించిన నిర్మాణాలపై ఉక్కుపాదం మోపుతున్నారు. హైడ్రా ప్రభావం హైదరాబాద్ రియల్ ఎస్టేట్‌పై పడిందని కొందరు నిపుణులు తమ అభిప్రాయాలు వ్యక్తం చేస్తున్నారు. హైడ్రా భయంతో నగరంలో ఇళ్లు కొనాలంటేనే గృహ కొనుగోలుదారులు వెనకడుగు వేస్తున్నారు. కొన్ని ప్రాజెక్టులకు నిర్మాణ అనుమతులు ఉన్నప్పటికీ ఇండ్లు కొనే సాహసం చేయలేకపోతున్నారు.

హైడ్రా అధికారులు ఎప్పుడు ఏ భవనాన్ని కూల్చేస్తున్నారో తెలియక ప్రాపర్టీల కొనుగోళ్లకు వెనుకడుగు వేస్తున్నారు. గంతలో ఇండ్ల కోనుగోళ్లకు 10 పర్సంట్ డౌన్‌ పేమెంట్‌ కట్టిన కస్టమర్లు డెవలపర్లతో ఒప్పందాలు రద్దు చేసుకుంటున్నారు. మరికొందరైతే గృహ కొనుగోలు నిర్ణయాలను దీర్ఘకాలం వాయిదా వేసుకుంటున్నారు. ఇటువంచి సమయంలో కస్టమర్లును ఆకర్షించం రియల్టర్లకు పెను సవాల్‌గా మారింది. ఈ క్రమంలో సరికొత్త ఆలోచనలు, ఆఫర్లతో ముందుకొస్తున్నారు. ప్రీ–ఈఎంఐలు, ఉచిత రిజిస్ట్రేషన్లు, లక్కీ డ్రాలతో కస్టమర్లను ఆకర్షించే ప్రయత్నం చేస్తున్నారు.

వెంచర్ల ముందు 'మా వెంచర్‌కు హైడ్రా భయం లేదు. క్లియర్ టైటిల్స్‌తో విక్రయిస్తున్నాం.. మా ప్రాజెక్టులో దయచేసి ఇళ్లు కొనుగోలు చేయండి.' అని సరికొత్తగా ఫ్లెక్సీలు ఏర్పాటు చేస్తున్నారు. కొందరు బిల్డర్లు ప్రత్యేకంగా టెలికాలర్లను ఏర్పాటు చేసుకొని కస్టమర్లకు ఫోన్లు చేయిస్తున్నారు. హెచ్‌ఎండీఏ, జీహెచ్‌ఎంసీ పరిధిలో నిర్మించే తమ ప్రాజెక్టులు/వెంచర్లకు ‘హైడ్రా అప్రూవల్‌’ ఉందంటూ వారికి వివరిస్తున్నారు. ప్రీ–ఈఎంఐ, రిజిస్ట్రేషన్‌ ఛార్జీలు ఉచితం, కారు బహుమతి, ఫారెన్ టూర్ వంటి ఆఫర్లతో కస్టమర్లను ఆకర్షించేందుకు నానా ప్రయత్నాలు చేస్తున్నారు. ఆదాయంతో ఎలాంటి సంబంధం లేకుండా 90 శాతం వరకూ బ్యాంక్‌ లోన్లు ఇప్పిస్తామని హామీ ఇస్తున్నారు.

 ఇక రియల్ ఎస్టేట్ వ్యాాపారుల కన్ను ప్రస్తుతం ఫోర్త్ సిటీ వైపు పడింది. హైదరాబాద్ నగరంలో నాలుగో సిటీ ఏర్పాటు చేస్తామని సీఎం ప్రకటించటంతో ముచ్చర్ల వైపు రియల్ ఎస్టేట్ వ్యాపారం పుంజుకుంటుంది. సీఎం ప్రకటనలను బ్రౌచర్లుగా ప్రింట్ చేయించి అక్కడ భూములు కొనుగోలు చేయాలని బిల్డర్లు కస్టమర్లను ఆకర్షిస్తున్నారు.