సర్పంచ్ ఎన్నికలకు సర్కార్ రెడీ.. బీసీ రిజర్వేషన్లకు డెడికేటెడ్ కమిషన్, ఎలక్షన్ ఎప్పుడంటే..?

స్థానిక సంస్థల (సర్పంచ్ ఎంపీటీసీ, జడ్పీటీసీ) బీసీ రిజర్వేషన్లకు న్యాయపరమైన చిక్కులు తలెత్తకుండా తగిన జాగ్రత్తలు తీసుకోవాలని సీఎం రేవంత్ రెడ్డి ఆదేశాలు జారీ చేసిన సంగతి తెలిసిందే. బీసీ రిజర్వేషన్లకు సంబంధించి భవిష్యత్తులో ఎలాంటి ఇబ్బందులు రాకుండా.. న్యాయపరమైన చిక్కులు తలెత్తకుండా ఉండేందుకు కోర్టు తీర్పులను తప్పకుండా అనుసరించాలన్నారు. సీఎం ఆదేశాల మేరకు ప్రత్యేకంగా డెడికేటెడ్ కమిషన్ ఏర్పాటు చేశారు. దీనికి ఛైర్మన్‌గా రిటైర్డ్ ఐఏఎస్‌ అధికారి బూసాని వెంకటేశ్వరరావును నియమించారు. కమిషన్ కార్యదర్శిగా బీసీ గురుకుల సొసైటీ కార్యదర్శి బి.సైదులు వ్యవహరించనున్నట్లు చెప్పారు.

తెలంగాణలోని స్థానిక సంస్థల్లో బీసీల వెనకబాటుతనం, స్వభావం, చిక్కులపై లోతైన సమకాలీన అధ్యయనం చేయాలని ప్రభుత్వం కమిషన్‌కు సూచించింది. రాజ్యాంగంలోని నిబంధనలు, సుప్రీంకోర్టు తీర్పు, మార్గదర్శకాలకు లోబడి స్థానిక సంస్థల వారీగా రిజర్వేషన్లను ప్రతిపాదించాలని రేవంత్ సర్కార్ కమిషన్‌కు. నెల రోజుల్లో సమగ్ర నివేదికను అందించాలని కోరుతూ ఉత్తర్వులు జారీ చేశారు. అవసరమైన సిబ్బంది నియామకం, ఇతర మౌలిక సదుపాయాల కల్పనకు ప్రత్యేకంగా ఉత్తర్వులు జారీ చేస్తామని చెప్పింది. నివేదిక రూపకల్పనకు... గత, ప్రస్తుత బీసీ కమిషన్‌ సమీకరించిన డేటాను పరిగణనలోకి తీసుకోవాలని చెప్పింది.

ఇక డెడికేటెడ్ కమిషన్ ఏర్పాటుతో స్థానిక సంస్థల ఎన్నికల నిర్వహణకు వేగంగా అడుగులు పడుతున్నాయి. ఈ ఏడాది చివర్లో అంటే డిసెంబర్‌లో చివరి మాసంలో ఎన్నికలు నిర్వహించాలని ప్రభుత్వం భావిస్తున్నట్లు తెలిసింది. ఈ మేరకు మంత్రి పొంగులేటి శ్రీనివాస్ రెడ్డి ఇటీవల కీలక ప్రకటన చేశారు. సంక్రాంతిలోపు గ్రామాల్లో సర్పంచ్‌లు కొలువుదీరుతారని చెప్పారు. ఈ నేపథ్యంలో డిసెంబర్ చివరి వారంలో లేదా జనవరి మెుదట్లో స్థానిక సంస్థల ఎన్నికలు జరిగే అవకాశాలు కనిపిస్తున్నాయి.

ఇక న్యాయపరమైన ఇబ్బందులు తలెత్తకుండా స్థానిక సంస్థల్లో బీసీ రిజర్వేషన్లు అమలయ్యేందుకు వీలుగా డెడికేటెడ్ కమిషన్‌ను ఏర్పాటు చేసినందుకుగాను ముఖ్యమంత్రి రేవంత్ రెడ్డికి బీసీ సంఘాలు కృతజ్ఞతలు తెలియజేశాయి. డెడికేటెడ్ కమిషన్ ఏర్పాటు చేయాలన్న ప్రభుత్వ నిర్ణయాన్ని స్వాగతిస్తున్నామని బీసీ సంఘం జాతీయ్ అధ్యక్షుడు ఆర్.కృష్ణయ్య అన్నారు. బీసీ రిజర్వేషన్లపై కాంగ్రెస్ పార్టీ ఇచ్చిన మాట నిలబెట్టుకుంటుందని, ఆ ప్రక్రియలోనే డెడికేటెడ్ కమిషన్ ఏర్పాటు చేశామని ఈ సందర్భంగా సీఎం వెల్లడించారు.