వావ్ అనేలా హైటెక్ సిటీ రైల్వే స్టేషన్.. ప్రతిపాదిత డిజైన్ రిలీజ్ చేసిన కేంద్రమంత్రి

అమృత్‌ భారత్‌ స్టేషన్‌ పథకం కింద తెలంగాణలోని పలు రైల్వే స్టేషన్లను కేంద్రం ఆధునీకరిస్తోన్న సంగతి తెలిసిందే. హైదరాబాద్ చర్లపల్లి, సికింద్రాబాద్ వంటి పెద్ద స్టేషన్లతో పాటుగా నగరంలోని మరో ఆరు చిన్న స్టేషన్లకు కొత్త రూపును తీసుకొచ్చేందుకు రైల్వే శాఖ సిద్ధమైంది. ఈ స్టేషన్లలో అభివృద్ధి పనులకు సంబంధించి దక్షిమ మధ్య రైల్వే అధికారులు రూ.170.61 కోట్ల నిధులు సైతం మంజూరు చేసింది. బేగంపేట, మల్కాజిగిరి, ఉప్పుగూడ, మలక్‌పేట, యాకుత్‌పుర, హైటెక్‌సిటీ స్టేషన్లను ఆధునీకరిస్తున్నారు.

హైటెక్ సిటీ రైల్వే స్టేషన్‌ను రూ.26.6 కోట్ల అంచనా వ్యయంతో రీడెవలప్ చేయబడుతోన్నట్లు కేంద్రమంత్రి కిషన్ రెడ్డి వెల్లడించారు. అందుకు సంబంధించిన ప్రతిపాదిత డిజైన్‌ను ట్విట్టర్ వేదికగా రిలీజ్ చేశారు. వావ్ అనేలా హైటెక్ హంగులతో హైటెక్ సిటీ రైల్వే స్టేషన్‍ను రీడెవలప్చేస్తున్నారు. ఆధునిక మౌలిక సదుపాయాలు, మెరుగైన సౌకర్యాలు కల్పించేందుకు సిద్ధమైనట్లు కిషన్ రెడ్డి వెల్లడించారు. స్టేషన్‌ను ఆధునిక రవాణా కేంద్రంగా మార్చడానికి ప్రయత్నిస్తున్నామని చెప్పారు.

హైదరాబాద్ నగర ట్రైన్ ప్రయాణికులతో పాటు నగరశివారుల్లో ఉండే ప్రజల సౌకర్యార్థం.. చర్లపల్లి రైల్వే టెర్మినల్ నిర్మిస్తున్న సంగతి తెలిసిందే. ఎయిర్‌ పోర్టును తలదన్నేలా అత్యాధునిక హంగులు, సకల వనతులతో ఈ టెర్మినల్ నిర్మిస్తున్నారు. ఈ రైల్వే టెర్మినల్ ప్రారంభోత్సవం పైనా కిషన్ రెడ్డి కీలక అప్డేట్ ఇచ్చారు. త్వరలోనే స్టేషన్ ప్రారంభించనున్నట్లు వెల్లడించారు. రూ.428 కోట్లతో ఈ టెర్మినల్ నిర్మించినట్లు చెప్పారు. కొత్త శాటిలైట్ టెర్మినల్‌కు తగిన పార్కింగ్ సౌకర్యాలతో పాటుగా.. పెద్ద సర్క్యులేటింగ్ ప్రాంతం ఏర్పాటు చేసినట్లు చెప్పారు.

స్టేషన్‌లోని అన్ని ప్లాట్‌ఫారమ్‌లను కలుపుతూ 5 లిఫ్టులు, 5 ఎస్కలేటర్లు, వాష్ రూమ్స్, వెయిటింగ్ లాంజ్‌లు, పార్శిల్ బుకింగ్ సౌకర్యాలతో పాటుగా.. ఎయిర్‌పోర్టును తలదన్నేలా అన్ని ఆధునిక సౌకర్యాలు ప్రయాణికులకు కొత్త అనుభూతిని కలిగిస్తాయని చెప్పారు. ఈ స్టేషన్ నుంచి ప్రస్తుతం నుడుస్తున్న ట్రైన్లతోపాటుగా.. కొత్తగా 25 జతల ట్రైన్లనను నడపనున్నట్లు వెల్లడించారు. మొత్తం 19 లైన్ల సామర్థ్యంతో 10 కొత్త ట్రైన్ లైన్లు నిర్మించినట్లు తెలిపారు. త్వరలోనే ప్రధాని నరేంద్ర మోదీ కొత్త రైల్వే స్టేషన్ ప్రారంభిస్తారని కేంద్రమంత్రి కిషన్ రెడ్డి స్పష్టం చేశారు.