ట్రాఫిక్ వాలంటీర్లుగా ట్రాన్స్‌జెండర్లు... తొలిరోజు 44 మంది ఎంపిక

సమాజంలో వివక్ష ఎదుర్కొంటున్న ట్రాన్స్‌జెండర్లను.. సమాజ సేవకు ఉపయోగించుకోవాలని.. వారికి సమాజంలో గౌరవం దక్కేలా చూడాలనే తెలంగాణ ప్రభుత్వం లక్ష్యంగా అడుగులు పడుతున్నాయి. ట్రాన్స్‌జెండర్లకు ఉపాధి కల్పించడంతో పాటుగా, గౌరవమైన స్థానాన్ని అందించాలనే ఉద్దేశంతో సీఎం రేవంత్ రెడ్డి.. ట్రాన్స్‌జెండర్లను ట్రాఫిక్ వాలంటీర్లుగా తీసుకోవాలని గతంలో పోలీసులను ఆదేశించారు. సీఎం సూచన మేరకు హైదరాబాద్ పోలీసులు చర్యలు చేపడుతున్నారు. అందులో భాగంగా గోషామహల్ ట్రాఫిక్ ట్రైనింగ్ ఇన్‌స్టిట్యూట్‌లో బుధవారం ట్రాన్స్‌జెండర్లకు ఈవెంట్లు నిర్వహించారు. రన్నింగ్, హైజంప్, లాంగ్ జంప్ వంటి పరీక్షలు నిర్వహించిన అధికారులు.. ఉత్తమమైన ప్రతిభ కనబరిచి ఎంపిక చేశారు. బుధవారం జరిగిన ఈవెంట్లలో మొత్తం 44 మంది ట్రాన్స్‌జెండర్లను ట్రాఫిక్ వాలంటీర్ల కోసం ఎంపిక చేశారు.

బుధవారం ఈవెంట్స్‌లో 58 మంది ట్రాన్స్‌జెండర్లు పాల్గొనగా.. 44 మంది ఎంపికయ్యారు. ఎంపికైన వారిలో 29 మంది ఉమెన్స్, 15 మంది మెన్ ట్రాన్స్ జెండర్ అభ్యర్థులు ఉన్నారు. ఈవెంట్లలో భాగంగా వంద మీటర్ల రన్నింగ్, 800 మీటర్ల రన్నింగ్, షార్ట్ పుట్, లాంగ్ జంప్ వంటి పోటీలు నిర్వహించారు. ఈవెంట్స్‌కు హాజరయ్యేందుకు కొన్ని అర్హతలను కూడా అధికారులు నిర్దేశించారు. 18 ఏళ్లు పూర్తయ్యి ఉండాలి. అలాగే పదో తరగతి ధ్రువపత్రం, ట్రాన్స్‌జెండర్ సర్టిఫికేట్ తప్పకుండా ఉండాలి. ఈ పత్రాల ఆధారంగా అధికారులు ఈవెంట్స్ నిర్వహిస్తున్నారు. ఈవెంట్లలో అర్హత సాధించి, ఎంపికైన వారికి ట్రాఫిక్‌ నిబంధనల అమలుపై శిక్షణ ఇవ్వనున్నారు. ఆ తర్వాత ట్రాఫిక్ వాలంటీర్లుగా విధుల్లోకి తీసుకోనున్నారు. వీరికి ప్రత్యేక యూనిఫాం, ప్రతి నెల నిర్దేశిత స్టైఫండ్ అందించనున్నారు.

మరోవైపు హైదరాబాద్ పోలీస్ కమిషనర్ సీవీ ఆనంద్ బుధవారం ఈవెంట్లను స్వయంగా పరిశీలించారు. ఈ సందర్భంగా అధికారులతో చర్చించారు. ట్రాన్స్ జెండర్లతోనూ సీవీ ఆనంద్ కాసేపు ముచ్చటించారు. హైదరాబాద్‌లో రోజురోజుకూ ట్రాఫిక్ సమస్య పెరుగుతోందన్న సీపీ సీవీ ఆనంద్.. ప్రస్తుతం హైదరాబాద్ నగరంలో 85 లక్షల వరకూ వాహనాలు ఉన్నాయని చెప్పారు. ప్రతిరోజూ 1500 వరకూ కొత్త వాహనాలు వస్తున్నాయని.. దీంతో ట్రాఫిక్ సమస్యలు ఎదురవుతున్నాయని అన్నారు. ట్రాఫిక్ సమస్యలు చెక్ పెట్టేందుకు ట్రాఫిక్ నిబంధనలు పాటించడంతో పాటుగా ప్రజాప్రతినిధులు కూడా ముందుకు రావాల్సి ఉందని సీవీ ఆనంద్ అభిప్రాయపడ్డారు.