అభివద్ది చేసి ‘అందోలు’ రుణం తీర్చుకుంటా

అందోలు నియోజకవర్గాన్ని అన్ని విధాలుగా అభివద్ది చేసి రుణం తీర్చుకుంటానని రాష్ట్ర వైద్య ఆరోగ్యశాఖా మంత్రి సి.దామోదర్‌ రాజనర్సింహ అన్నారు. అందోల్‌లో 100 బెడ్ల హాస్పిటల్, 50 బెడ్ల మదర్‌ అండ్‌ చైల్డ్‌ హెల్త్‌ కేర్‌ సేంటర్, నర్సింగ్‌ కాలేజీ, నర్సింగ్‌ విద్యార్థుల హాస్టల్‌ భవనాల నిర్మాణానికి స్థానిక ఎమ్మెల్యే, ఆరోగ్యశాఖ మంత్రి దామోదర రాజనర్సింహ గురువారం  శంకుస్థాపన చేసారు. ఈ హాస్పిటల్‌తో ఆందోల్‌ నియోజకవర్గ ప్రజలకు మెరుగైన వైద్య సేవలు అందుతాయని మంత్రి అన్నారు. డిస్ట్రిక్ట్‌ హాస్పిటల్‌ స్థాయిలో అభివద్ది చేసి, ఏడాదిలో  సర్వీసులు ప్రారంభిస్తామన్నారు.కొత్త ఆసుపత్రిలో  అన్ని రకాల స్పెషాలిటీ వైద్య సేవలు, ఎక్విప్‌మెంట్‌ అందుబాటులోకి తీసుకొస్తామన్నారు. యాంటి నాటల్‌ చెకప్, డెలివరీల కోసం ఇకపై గర్భిణులు సంగారెడ్డి వరకూ వెళ్లాల్సిన అవసరం ఉండదన్నారు. ఆందోల్‌ ఎంసీహెచ్‌లోనే మహిళలు, పిల్లలకు  అన్ని రకాల వైద్య సేవలు అందిస్తామన్నారు. నర్సింగ్‌ విద్యను అభ్యసించాలని ఆశిస్తున్న విద్యార్థుల కలను నెరవేరుస్తూ ఆందోల్‌లో నర్సింగ్‌ కాలేజీని ప్రారంభించామన్నారు.
60 బీఎస్సీ నర్సింగ్‌ సీట్లతో కాలేజీని ప్రారంభించామని, ప్రస్తుతం డిగ్రీ కాలేజీ భవనంలో  తరగతులు నిర్వహిస్తున్నామని చెప్పారు.వచ్చే అకాడమిక్‌ ఇయర్‌ నుంచి కాలేజీకి నూతన భవనాన్ని, నర్సింగ్‌ విద్యార్థులకు హాస్టల్‌ భవనాన్ని అందుబాటులోకి తీసుకొస్తామన్నారు.కాలేజీ, హాస్పిటల్స్‌తో ఆందోల్‌ నియోజకవర్గ యువతకు ప్రత్యక్షంగా, పరోక్షంగా ఉద్యోగాలు, ఉపాధి దొరుకుతాయన్నారు. ఏడాది కాలంలోనే ఆందోల్‌ నియోజకవర్గానికి సుమారు రూ.600 కోట్ల నిధులు తీసుకొచ్చామన్నారు. ఈ కార్యక్రమంలో ఎంపీ సురేష్‌ షెట్కార్, సంగారెడ్డి కలెక్టర్‌ క్రాంతి వల్లూరు,  వైద్య విధాన పరిషత్‌ కమిషనర్‌ అజయ్‌ కుమార్,మెడికల్‌ ఎడ్యుకేషన్‌ డైరెక్టర్‌ డాక్టర్‌ వాణి,  ఆర్డీఓ పాండు, జోగిపేట్‌ మునిసిపల్‌ చైర్మన్‌ గూడెం మల్లయ్య,   కౌన్సిలర్‌లు సురేందర్‌గౌడ్, చిట్టిబాబు, రేఖా ప్రవీణ్, సురేష్, నాగరాజు, చందర్, దుర్గేష్‌లతో పాటు పలువురు పాల్గొన్నారు.