అల్లు అర్జున్ మా బంధువు.. అరెస్ట్ దురదృష్టకరం: ఎమ్మెల్యే దానం నాగేందర్

జాతీయ అవార్డు గ్రహీత, ఐకాన్ స్టార్ అల్లు అర్జున్‌ అరెస్ట్ వ్యవహారం ఇప్పుడు రెండు తెలుగు రాష్ట్రాల్లోనే కాదు.. దేశవ్యాప్తంగా తీవ్ర చర్చనీయాంశంగా మారింది. సంధ్య థియేటర్ తొక్కిసలాట ఘటనలో ఓ మహిళ మరణించిన ఘటనలో చిక్కడపల్లి పోలీసులు అల్లు అర్జున్‌ను అరెస్ట్ చేసిన సంగతి తెలిసిందే. అయితే.. అల్లు అర్జున్ అరెస్ట్ ఘటనపై ఖైరతాబాద్ ఎమ్మెల్యే దానం నాగేందర్ స్పందించారు. హీరో అల్లు అర్జున్ తమ బంధువని దానం నాగేందర్ తెలిపారు. అల్లు అర్జున్ అరెస్ట్ కావడం బాధాకరమన్నారు. అల్లు అర్జున్‌ను అరెస్ట్ చేయడంపై విచారం వ్యక్తం చేస్తున్నానని తెలిపారు. అయితే.. వెంటనే బెయిల్ దొరకడం సంతోషకరమని చెప్పుకొచ్చారు.

అల్లు అర్జున్.. తెలుగు సినిమాతో పాటు తెలంగాణ, ఆంధ్రప్రదేశ్ పేర్లను జాతీయ, అంతర్జాతీయ స్థాయికి తీసుకెళ్లి.. మంచిపేరు తీసుకొచ్చారని దానం నాగేందర్ కొనియాడారు. అల్లు అర్జున్ పాన్ ఇండియా హీరోనే కాదు పాన్ వరల్డ్ హీరో అంటూ ప్రశంసించారు. అరెస్ట్ కావడం దురదృష్టకరమైన సంఘటనగా తాను భావిస్తున్నట్టు ఎమ్మెల్యే దానం నాగేందర్ తెలిపారు. ప్రభుత్వమే అల్లు అర్జున్‌ని అరెస్ట్ చేయించిందని ప్రతిపక్షాలు ఆరోపించటం భావ్యం కాదని దానం అన్నారు.

అయితే.. సంధ్య థియేటర్ ఘటనలో పలు సెక్షన్ల కింద కేసులు నమోదు చేసిన చిక్కడపల్లి పోలీసులు శుక్రవారం (డిసెంబర్ 13న) రోజు అల్లు అర్జున్‌ను అరెస్ట్ చేశారు. మొదట పోలీస్ స్టేషన్‌కు తరలించి.. స్టేట్‌మెంట్ రికార్డు చేసిన పోలీసులు.. అనంతరం గాంధీ ఆస్పత్రికి తీసుకెళ్లి వైద్య పరీక్షలు చేశారు. అటు నుంచి నేరుగా నాంపల్లి కోర్టు ఎదుట హాజరుపర్చగా.. 14 రోజులు రిమాండ్ విధించింది. దీంతో.. అల్లు అర్జున్‌ను వెంటనే చంచల్‌గూడ జైలుకు తరలించారు.

అదే సమయంలో.. హైకోర్టులో దాఖలు చేసిన క్వాష్ పిటిషన్ మీద విచారణ జరిపిన ధర్మాసనం.. మధ్యంతర బెయిల్ మంజూరు చేసింది. అయితే.. సాంకేతిక కారణాలతో హైకోర్టు ఆర్డర్ జైలు అధికారులకు చేరటం ఆలస్యం కావటంలో.. సుమారు 12 గంటల పాటు అల్లు అర్జున్ జైలులోనే ఉండాల్సి వచ్చింది. కాగా.. అల్లు అర్జున్ ఈరోజు ఉదయం 6.40 గంటలకు చంచల్‌గూడ జైలు నుంచి విడుదలైన విషయం తెలిసిందే.