హైటెక్ సిటీ తరహాలో.. హైదరాబాద్‌ శివార్లలో మరో 2 కొత్త ఐటీ పార్కులు

హైదరాబాద్‌ శివార్లలో కొత్తగా 2 ఐటీ పార్కులను ఏర్పాటు చేసేందుకు ప్రణాళికలు రూపొందిస్తున్నట్లు మంత్రి శ్రీధర్‌ బాబు తెలిపారు. హైదరాబాద్‌లో రూ.100 కోట్ల పెట్టుబడి పెట్టేందుకు ముందుకొచ్చిన "డ్యూ" సాఫ్ట్‌వేర్‌ కంపెనీ ప్రతినిధులతో మంగళవారం (జనవరి 30న) సచివాలయంలో మంత్రి శ్రీధర్ బాబు ప్రత్యేకంగా సమావేశమయ్యారు.

ఐటీ రంగంలో దూసుకెళ్లిపోతున్న హైదరాబాద్‌లో పెట్టుబడుల కోసం ప్రముఖ కంపెనీలు ముందుకు వస్తున్నాయని.. ఇందులో భాగంగానే హైటెక్‌ సిటీ తరహాలో నగర శివార్లలో కొత్తగా మరో రెండు ఐటీ పార్కులను ఏర్పాటు చేస్తామని మంత్రి శ్రీధర్ బాబు ప్రకటించారు. ఈ ఐటీ పార్కుల ఏర్పాటుకు అనుకూలంగా ఉన్న ప్రాంతాలపై అధికారులు అధ్యయనం చేస్తారన్నారు. ఐటీ పార్కుల్లో పనిచేసే ఉద్యోగులకు అవసరమైన మౌలిక సదుపాయాల అభివృద్ధితో పాటు మెరుగైన రవాణా సౌకర్యాలు కూడా కల్పిస్తామని చెప్పుకొచ్చారు. నగరంలోని నలుమూలల నుంచి ఈ పార్కులకు చేరుకునేలా ఏర్పాట్లు చేస్తామని మంత్రి వెల్లడించారు.

ఈ పార్కుల్లో కొత్తగా పెట్టుబడులు పెట్టేందుకు ముందుకొచ్చే సాఫ్ట్‌వేర్‌ కంపెనీలకు అవకాశం కల్పిస్తామని మంత్రి శ్రీధర్‌బాబు ప్రకటించారు. పెట్టుబడులతో ముందుకొచ్చే పరిశ్రమలకు భూకేటాయింపులపై ఇప్పటివరకు ప్రత్యేక పాలసీ లేకపోవడంతో పారిశ్రామికవేత్తలు ఇబ్బంది పడుతున్నారని అభిప్రాయపడిన మంత్రి శ్రీధర్ బాబు.. ప్రత్యేక పాలసీని రూపొందించి పెట్టుబడి, కల్పించే ఉద్యోగాల సంఖ్య ఆధారంగా భూమిని కేటాయిస్తామని చెప్పుకొచ్చారు. హైదరాబాద్‌లో రూ.100 కోట్లు పెట్టుబడి పెట్టేందుకు ముందుకొచ్చిన డ్యూ సాఫ్ట్‌ వేర్‌ కంపెనీకి ప్రభుత్వం తరఫున అన్ని రకాలుగా సహకరిస్తామని శ్రీధర్‌బాబు తెలిపారు.

మరోవైపు.. రాష్ట్ర ప్రభుత్వ పన్నుల వసూలు, ఇతర రాబడి మార్గాల్లో ఆదాయం నష్టపోకుండా "అలెరియా ఏఐ" టెక్నాలజీ దోహదపడుతుందని శ్రీధర్‌బాబు పేర్కొన్నారు. అలెరియా ఏఐ సంస్థ ప్రతినిధులు మంగళవారం (జనవరి 30న) సచివాలయంలో మంత్రి శ్రీధర్ బాబు ఎదుట "అలెరియా ఏఐ" సాంకేతికతపై ప్రజెంటేషన్‌ ఇచ్చారు. ఆఫ్‌లైన్‌లో పనిచేసే ఈ టూల్‌ను ప్రభుత్వ విభాగాలతో అనుసంధానం చేస్తే పన్ను, ఆదాయ రాబడిలో నష్టపోతున్న 30 శాతాన్ని తిరిగి పొందవచ్చని సంస్థ ప్రతినిధులు వివరించారు. ప్రభుత్వం అమలు చేస్తున్న వివిధ పథకాల్లో కూడా లబ్దిదారుల ఎంపికలో అర్హులు మాత్రమే ప్రయోజనం పొందేలా అలెరియా ఏఐ సహాయం చేస్తోందని వెల్లడించారు.