డైరెక్టుగా డాక్టర్ డ్రెస్సింగ్‌ రూంలో.. గ్యాప్ దొరికినప్పుడల్లా

 హైదరాబాద్‌లోని సోమాజిగూడ యశోద ఆస్పత్రిలో బుధవారం (ఫిబ్రవరి 26న) మధ్యాహ్నం ఓ ఆగంతకుడు బీ-1 సెల్లార్‌ నుంచి డాక్టర్లు వినియోగించే లిఫ్ట్‌లో నేరుగా ఐదో అంతస్తులోకి వెళ్లాడు. అక్కడ ఓ వైద్యుడి గదిలోకి దర్జాగా వెళ్లాడు. అక్కడితో ఆగాడా అంటే.. డాక్టర్‌కు సంబంధించిన డ్రెస్సింగ్‌ రూంలోకి దూరాడు. డ్రెస్సింగ్ రూంలో దూరి ఏం చేశాడబ్బా అంటే.. అక్కడ సదరు డాక్టర్ విడిచి వెళ్లిన.. 15 వేల రూపాయలు విలువ చేసే షూస్ వేసుకుని దర్జాగా వెళ్లిపోయాడు.

కట్ చేస్తే.. తన విధులు పూర్తి చేసుకుని డ్రెస్సింగ్ రూంలోకి వెళ్లి.. తమ సాధారణ దుస్తులు ధరించిన తర్వాత.. షూ వేసుకుందామని చూస్తే కనిపించకపోయేసరికి.. తన గది అంతా వెతికాడు. ఎక్కడా కనిపించకపోయేసరికి.. సెక్యూరిటీని పిలిచి అడిగాడు. వాళ్లు కూడా అంతా వెతికారు ఎక్కడా కనిపించలేదు. సాధారణంగా.. ఎవరైనా వచ్చినా డాక్టర్ గదిలోకి మాత్రమే వస్తారు. డ్రెస్సింగ్ రూంలోకి ఎవరూ రారు. అయితే.. డ్రెస్సింగ్ రూంలో ఉన్న షూస్ కనిపించట్లేదంటే.. అది కచ్చితంగా ఎవరో దొంగ పనే అయ్యుంటుందని భావించిన.. ఆస్పత్రి సెక్యూరిటీ ఆఫీసర్‌ కృష్ణ పంజాగుట్ట పోలీసులకు ఫిర్యాదు చేశారు. ఫిర్యాదు మేరకు పంజగుట్ట పోలీసులు కేసు నమోదు చేసుకుని దర్యాప్తు చేపట్టారు.

 ఈ క్రమంలో.. ఆస్పత్రిలోని సీసీ ఫుటేజీ పరిశీలించగా.. ఓ వ్యక్తి బీ-1 సెల్లార్‌ నుంచి ఐదో అంతస్తుకు వెళ్లి.. డైరెక్టుగా డాక్టర్‌ డ్రెస్సింగ్‌ రూంలోకి దూరాడు. అక్కడే షూస్‌ తొడుక్కుని రూం బయటకు వచ్చిన ఆ వ్యక్తి.. దర్జాగా నడిచి వెళ్తున్నట్లు గుర్తించారు. ఆస్పత్రి నుంచి బయటికి వచ్చిన ఆ దుండగుడు.. రాజ్‌భవన్‌‌వైపు నడిచి వెళ్తున్నట్లు గుర్తించిన పోలీసులు.. నిందితుడిని పట్టుకున్నారు.

సూర్యాపేటకు చెందిన మహేష్‌ (22) ఐదేళ్ల క్రితం నగరానికి వచ్చి.. సోమాజీగూడలోని దక్కన్‌ ఆస్పత్రిలో పని చేస్తూ హాస్టల్‌లో ఉండేవాడు. అక్కడ పనిచేస్తున్న సమయంలో ఎదురుగా ఉన్న యశోద ఆస్పత్రి సిబ్బందితో పరిచయాలు పెంచుకుని గ్యాప్ దొరికినప్పడల్లా వచ్చి పోతుండేవాడు. ఈ నేపథ్యంలోనే.. బుధవారం (ఫిబ్రవరి 26) మధ్యాహ్నం నేరుగా ఆస్పత్రి ఐదో అంతస్తుకు వెళ్లి.. వైద్యుడి డ్రెస్సింగ్‌ రూంలోకి వెళ్లి షూస్‌ దొంగిలించి పరారయ్యాడు. నిందితుడి గదిలో సోదాలు చేయగా ఒక ఐఫోన్, ట్యాబ్‌తో పాటు షూస్‌ దొరికాయి.