అప్పటికీ చేయకపోతే.. వందల్లో వేలల్లో కాదు లక్షల్లోనే

తెలంగాణ సీఎం రేవంత్ రెడ్డికి బీఆర్ఎస్ ఎమ్మెల్సీ కల్వకుంట్ల కవిత డెడ్ లైన్ పెట్టారు. మార్చి 8న మహిళా దినోత్సవం వరకే రేవంత్ రెడ్డికి డెడ్ లైన్ అని.. అప్పటివరకు.. మహిళలకు ఇచ్చిన హామీలపై ప్రకటన చేయకపోతే.. ఉద్యమాన్ని మొదలుపెట్టనున్నట్టు హెచ్చరించారు. మహిళల విషయంలో సీఎం రేవంత్ రెడ్డి మానవీయంగా ఆలోచించడం లేదని కవిత ఆగ్రహం వ్యక్తం చేశారు. ఆడబిడ్డల పట్ల కాంగ్రెస్ ప్రభుత్వానికి నిర్లక్ష్యం తగదని హెచ్చరించారు. సోనియా గాంధీ, ప్రియాంకా గాంధీ మాట్లాడక ముందే మహిళా బిల్లు కోసం తెలంగాణ జాగృతి ఢిల్లీలో ధర్నా చేసిందని కవిత గుర్తుచేశారు.

ఎన్నికల్లో మహిళలకు కాంగ్రెస్ పార్టీ ఇచ్చిన హామీల సాధనకై ఎమ్మెల్సీ కవిత పోస్టు కార్డు ఉద్యమాన్ని మొదలుపెట్టారు. తెలంగాణ జాగృతి ఆధ్వర్యంలో మహిళా కార్యకర్తల నుంచి 10 వేల పోస్టుల కార్డులు సేకరించారు. మహిళల నుంచి సేకరించిన ఆ పోస్టు కార్డులను సీఎం రేవంత్‌ రెడ్డికి పంపించారు. ఈ సందర్బంగా మాట్లాడిన కవిత.. హమీల అమలుపై మహిళా దినోత్సవం (మార్చి 8) లోపు సీఎం రేవంత్ రెడ్డి స్పష్టమైన ప్రకటన చేయకపోతే.. 10 వేల మంది మహిళలు 10 వేల గ్రామాల్లోకి వెళ్తారని.. లక్షలాది పోస్టు కార్డులు తయారు చేసి డైరెక్టుగా సోనియా గాంధీకే పంపిస్తామని కవిత హెచ్చరించారు.

మహిళల విషయంలో సీఎం రేవంత్ రెడ్డి మానవీయంగా ఆలోచించడం లేదని కవిత అసహనం వ్యక్తం చేశారు. మహిళా బిల్లు రావడంలో కాంగ్రెస్ పార్టీ పాత్ర లేదని తెలిపారు. మహిళా రిజర్వేషన్ చట్టం అమలు కోసం కేంద్ర ప్రభుత్వంపై కాంగ్రెస్ పార్టీ ఎందుకు ఒత్తిడి చేయడం లేదని ప్రశ్నించారు. వరంగల్ ఎయిర్‌పోర్టుకు రాణి రుద్రమాదేవి పేరు పెట్టాలని కవిత డిమాండ్ చేశారు. ఈ విషయంలో తాము కూడా కేంద్రానికి లేఖ రాస్తామని చెప్పుకొచ్చారు.

మరోవైపు.. తెలంగాణలో కోటి మంది మహిళలను కోటీశ్వరులను చేస్తామన్న ముఖ్యమంత్రి ప్రకటనకు.. ఆయన ప్రారంభించిన పెట్రోల్ బంకులకు ఏమాత్రం పోలిక లేదని కవిత ఎద్దేవా చేశారు. ప్రభుత్వం ప్రతిపాదించిన పథకాలు కేవలం పదుల సంఖ్యలో మహిళలకు తప్ప.. పెద్ద ఎత్తున ప్రయోజనం కలిగే అవకాశం లేదని చెప్పుకొచ్చారు. మహిళలకు నెలకు రూ.2500 ఇచ్చే కార్యక్రమాన్ని వెంటనే మొదలుపెట్టాలని డిమాండ్ చేసిన కవిత.. అప్పుడే ఎక్కువ మంది మహిళలకు ప్రయోజనం కలుగుతుందని వివరించారు. 18 ఏళ్లు నిండిన ఆడపిల్లలకు స్కూటీలు పంపిణీ చేస్తామన్న హామీని కూడా వెంటనే అమలు చేయాలని కవిత డిమాండ్‌ చేశారు.