కూలి పనులకు వెళ్తున్న గిరిజన యోధుడి వారసుడు

నిజాం పాలనపై తిరుగుబాటు బావుటా ఎగురవేసి.. గిరిజనుల హక్కుల కోసం పోరాడిన కుమురం భీం వీరత్వం గురించి.. ఎంతో గొప్పగా చెప్పుకుంటాం. "జల్, జంగల్, జమీన్" అనే నినాదంతో ఆయన చేసిన పోరాటాలు ఇప్పటికీ చరిత్ర పుటల్లో పదిలం. గిరిజనులకు ఈనాడు హక్కులు అందుతున్నాయన్నా.. పోడు భూములకు పట్టాలు మంజూరవుతున్నాయన్నా.. అది కుమురం భీం ఆనాడు చేసిన పోరాటాల ఫలమే. ఎంతో మంది గిరిజనులు.. సొంత భూముల్లో వ్యవసాయం చేసుకుంటూ, మంచి మంచి చదువులు చదివి గొప్ప గొప్ప ఉద్యోగాలు చేస్తూ.. ఆయా రంగాల్లో ఉన్నత స్థాయిల్లో ఉన్నారంటే.. ఆయన వేసిన అడుగుల తాలుకూ ఫలితాలే. ఇలా కుముర భీం వీరత్వాన్ని.. ఆయన జయంతి రోజునో లేదా వర్ధంతి రోజునో నెమరువేసుకుని, గ్రామాల్లో ఉన్న విగ్రహాలకు పూలమాలలు వేసి నివాళులర్పించటం ఒక ఆనవాయితీ మాత్రమే. ఎంతో మంది గిరిజనుల జీవితాల్లో వెలుగులు నిండేందుకు కారణమైన ఆ గిరిజన వీరుని కుటుంబం ఎలా ఉంది.. ఏం చేస్తుంది.. ఆయన వారసులు ఎలాంటి పరిస్థితుల్లో బతుకుతున్నారు అన్నది ఏ ఒక్కరికీ పట్టకపోవటం, ప్రభుత్వాలు కూడా పట్టించుకోకపోవటం శోచనీయం.

గిరిజన వీరుడు కుమురం భీం మనవడు కుమురం సోనేరావు నిరుపేదరికంతో పోరాడుతున్న ఘటన చాలా ఆలస్యంగా వెలుగులోకి వచ్చింది. కుమురం భీం ఆసిఫాబాద్ జిల్లా సిర్పూర్ (యు) మండలం దోబే గ్రామంలో నివాసముంటున్న సోనేరావు.. ఆర్థిక ఇబ్బందులు తట్టుకోలేక భార్య గౌరుబాయితో కలిసి గత 15 రోజులుగా ఉపాధి హామీ పథకం కింద కూలి పనులకు వెళ్తున్నారు. చేతిలో డబ్బుల్లేని దుస్థితిలో సోనేరావు కుటుంబం జీవనం సాగిస్తుండటం.. ఇప్పుడు అందరినీ కలచివేస్తోంది.

ప్రభుత్వం గతంలో ఐదెకరాల సాగుభూమిని మంజూరు చేసినప్పటికీ.. కుమురం సోనేరావుకు ఇప్పటివరకు సొంతిల్లు లేదు. తలదాచుకోవడానికి గూడు లేకపోవడంతో తీవ్ర ఇబ్బందులు పడుతున్నారు. ఈ సమస్యను పరిష్కరించాలని కోరుతూ ఆయన పలుమార్లు స్థానిక ఎమ్మెల్యే, జిల్లా కలెక్టర్‌కు దరఖాస్తు చేసుకున్నా.. ఇప్పటివరకు ఎలాంటి సహాయం అందకపోవటం గమనార్హం.

గతంలో గుస్సాడీ రాజుకు ప్రభుత్వం అందించిన గౌరవాన్ని గుర్తుచేసుకుంటూ.. తనను కూడా గుర్తించి ఆదుకోవాలని ప్రభుత్వానికి కుమురం సోనేరావు విజ్ఞప్తి చేస్తున్నారు. తన జీవనోపాధి కోసం ప్రతి నెల ఆసరా పింఛను మంజూరు చేయాలని ప్రభుత్వాన్ని వేడుకుంటున్నారు. గిరిజన పోరాట యోధుడి వారసుడి ఈ దుర్భర పరిస్థితి ఇప్పుడు స్థానికంగా చర్చనీయాంశంగా మారింది. ప్రభుత్వం తక్షణమే స్పందించి సోనేరావు కుటుంబానికి సహాయం అందించాలని ప్రజలు ప్రభుత్వాన్ని కోరుతున్నారు.