మళ్లీ వచ్చేది బీఆర్‌ఎస్‌ ప్రభుత్వమే,,,,'మీ డైరీల్లో రాసిపెట్టుకోండి.. కేసీఆర్

వరంగల్ జిల్లా ఎల్కతుర్తి బీఆర్ఎస్ రజతోత్సవ సభ వేదికగా.. గులాబీ అధినేత కేసీఆర్ కాంగ్రెస్ పార్టీకి ఆల్టిమేటం జారీ చేశారు. తెలంగాణలో వచ్చేది బీఆర్ఎస్ ప్రభుత్వమేనని పునురుద్ఘాటించారు. కాంగ్రెస్ ప్రభుత్వం అన్ని విషయాల్లో విఫలమైందని ఫైరయ్యారు. 20-30 శాతం కమీషన్లు తీసుకుంటూ సంచులు మోస్తోందని తీవ్ర ఆరోపణలు చేశారు. బీఆర్‌ఎస్‌ సభ పెట్టుకుంటే ఆటంకాలు సృష్టించారన్నారు. ఎన్ని అడ్డంకులు సృష్టించినా.. బీఆర్‌ఎస్‌ ప్రభంజనాన్ని ఎవరూ ఆపలేరన్నారు.

ప్రభుత్వాన్ని సామాజిక మాధ్యమాల్లో ప్రజలు ప్రశ్నిస్తున్నారని.. సోషల్ మీడియాలో ప్రశ్నించిన వారిపై పోలీసు కేసులు పెడుతున్నారన్నారు. ఇది సరైంది కాదని ఫైరయ్యారు. మళ్లీ వచ్చేది బీఆర్‌ఎస్‌ ప్రభుత్వమేమనని అవసరమైతే డైరీల్లో రాసిపెట్టుకోవాలని ప్రజలపై కేసులు పెడుతున్న పోలీసులకు సూచించారు. పోలీసులకు రాజకీయాలు ఎందుకని కేసీఆర్ ప్రశ్నించారు. బీఆర్ఎస్ కార్యకర్తలకు పార్టీ లీగల్ సెల్‌ అండగా ఉంటుందన్నారు. ఇప్పటి నుంచి తాను సైతం బయటికి వస్తాని... అందరి తరఫున పోరాడుతానని చెప్పారు.

'పదేళ్ల పాలనలో తెలంగాణను అనేక రంగాల్లో అభివృద్ధి పథంలో నడిపాం. తెలంగాణ అంటే ఒక్కప్పుడు వెనకబడిన ప్రాంతం. మన పాలనలో రూ.90 వేలు ఉన్న తలసరి ఆదాయం మూడున్నర లక్షలకు పెంచుకున్నాం. మూడేళ్లలో కాళేశ్వరం కట్టుకున్నాం. పంజాబ్‌ను తలదన్నే పంటలను పండించుకున్నాం. గోల్‌మాల్‌ చేయడంలో అబద్ధాలను చెప్పడంలో కాంగ్రెస్‌ను మించినవారు లేరు. మాట్లాడితే కేసీఆర్‌పై నిందులు వేస్తున్నారు.

ఇక్కడ ఉన్నవాళ్లు చాలరని.. ఢిల్లీ నుంచి గాంధీలు వచ్చి డ్యాన్స్‌లు చేసి హామీలు ఇచ్చారు. కల్యాణ లక్ష్మికి కేసీఆర్‌ లక్ష రూపాయలే ఇస్తున్నారు.. మేము వస్తే తులం బంగారం కూడా ఇస్తామన్నారు. పెన్షన్లు పెంచుతామన్నారు.. స్కూటీలు కొనిస్తామన్నారు.. జాబ్‌ కార్డులు ఇస్తామన్నారు.. ఇచ్చారా?. తెలంగాణ ఆర్థిక పరిస్థితిని దెబ్బతీశారు.. పరిపాలన చేయడం రాక రాష్ట్రాన్ని ఆగమాగం చేశారు. తెలంగాణను నంబర్‌వన్‌ స్థానంలో నిలబెడితే.. ఇప్పుడు 14వ స్థానానికి తీసుకెళ్లిపోయారు. హైడ్రా పేరు చెప్పి పేదల ఇళ్లు కూలగొడుతున్నారు.

బీజేపీ వైఖరి అంతా భభ్రజమానం.. భజగోవిందం.. శుష్కప్రియాలు.. శూన్యహస్తాలు. ఆపరేషన్‌ కగార్‌ అనే పేరుతో గిరిజనులు, యువతను ఊచకోత కోస్తున్నారు. ఆపరేషన్‌ కగార్‌ను వెంటనే నిలిపివేయాలి. చర్చలకు పిలవాలను నక్సలైట్లు కోరుతున్నారు. బలగాలు ఉన్నాయని అందరినీ చంపుకుంటూ పోతే ప్రజస్వామ్యం అనిపించుకోదు. ఆపరేషన్‌ కగార్‌ ఆపాలని తీర్మానం చేసి ఢిల్లీకి పంపుదాం. మీరు ఇంత పెద్ద ఎత్తున సభకు వచ్చారంటే ఒక నిర్ణయానికి వచ్చినట్లు తెలుస్తోంది. వచ్చేది బీఆర్ఎస్ ప్రభుత్వమే' అని కేసీఆర్‌ తన ప్రసంగాన్ని ముగించారు.