రాత్రి దంచుడే దంచుడు.. ఈ జిల్లాల్లో భారీ వర్షాలు

తెలంగాణ రాష్ట్రంలో వాతావరణ మార్పుల ప్రభావం స్పష్టంగా కనిపిస్తోంది. ముఖ్యంగా ఉత్తర, మధ్య, పశ్చిమ తెలంగాణ జిల్లాల్లో నేడు తీవ్రమైన వర్షాలు కురిసే అవకాశం ఉందని వాతావరణ శాఖ అంచనా వేస్తోంది. ఈ వర్షాలు పిడుగులు, బలమైన ఈదురుగాలులతో కూడి ఉండే అవకాశం ఉందని అధికారులు హెచ్చరించారు.

పశ్చిమ తెలంగాణ జిల్లాల్లో రాత్రి నుంచి భారీ వర్షాలు కురిసే అవకాశం ఉందని నిపుణులు హెచ్చరిస్తున్నారు. ఉరుములు, మెరుపులతో కూడిన జల్లులు, కొన్ని చోట్ల వడగళ్ల వాన కూడా పడవచ్చు. గత కొన్ని రోజులుగా పడుతున్న వర్షాలు వాతావరణాన్ని చల్లబరుస్తున్నప్పటికీ, కొన్ని ప్రాంతాల్లో సాధారణ జనజీవనానికి అంతరాయం కలిగిస్తున్నాయి. రహదారులపై నీరు నిలబడటం, లోతట్టు ప్రాంతాలు జలమయం కావడం వంటివి జరగవచ్చు. ఈ నేపథ్యంలో రైతులు తమ పంటల విషయంలో తగిన జాగ్రత్తలు తీసుకోవాలని, లోతట్టు ప్రాంతాల ప్రజలు అప్రమత్తంగా ఉండాలని సూచించారు.

గత మూడు రోజుల నుంచి వర్షాలు కూరుస్తున్నా.. చాలా ప్రాంతాల్లో ఉదయం నుండి మధ్యాహ్నం వరకు వాతావరణం పొడిగానే ఉంది. అయితే.. రాబోయే రెండు గంటల్లో నిజామాబాద్, కామారెడ్డి, మెదక్, సిరిసిల్ల, పెద్దపల్లి, నిర్మల్, సంగారెడ్డి జిల్లాల్లో అక్కడక్కడ జల్లులు కురిసే అవకాశం ఉందని వాతావరణ శాఖ తెలిపింది. ఈ ప్రాంతాల్లో ఉరుములు, మెరుపులతో కూడిన తేలికపాటి జల్లులు కురిసే అవకాశం ఉంది. వాతావరణంలో అకస్మాత్తుగా వచ్చే మార్పులు, ఈదురుగాలులు, పిడుగుల పట్ల జాగ్రత్త వహించాలని ప్రజలకు సూచించారు.

రాష్ట్ర రాజధాని హైదరాబాద్‌లో కూడా నేడు వాతావరణం మారింది. సాయంత్రం 6 గంటల వరకు పొడిగా ఉన్నప్పటికీ.. ఆ తర్వాత నగరంలోని ఉత్తర, పశ్చిమ ప్రాంతాల్లో రాత్రి సమయంలో ఒక వర్షపు జల్లు కురిసే అవకాశం ఉంది. పగటి ఉష్ణోగ్రతలు కాస్త పెరిగినప్పటికీ, సాయంత్రానికి వాతావరణం చల్లబడి, తేలికపాటి వర్షం నగరవాసులకు కొంత ఉపశమనాన్ని కలిగించగలదు. మొత్తంగా.. రాబోయే 24 గంటలు తెలంగాణలో వాతావరణ పరంగా కీలకం కానున్నాయి. అకాల వర్షాలు, ఈదురు గాలుల పట్ల ప్రజలు జాగ్రత్తగా ఉండాలని, వాతావరణ శాఖ జారీ చేసే హెచ్చరికలను ఎప్పటికప్పుడు గమనించాలని సూచించారు. అత్యవసరం అయితే తప్ప ఇళ్ల నుంచి భయటకు రావొద్దని వాతావరణ శాఖ అధికారులు హెచ్చరిస్తున్నారు.