ఆ జిల్లాలో హైడ్రా తరహా కూల్చివేతలు

తెలంగాణ రాష్ట్రంలో అక్రమ నిర్మాణాల నియంత్రణపై ప్రభుత్వం కఠినంగా వ్యవహరిస్తోంది. ఈ క్రమంలో.. పెద్దపల్లి జిల్లాలోని రామగుండం మున్సిపల్ కార్పొరేషన్ పరిధిలో అధికారులు అక్రమ నిర్మాణాలపై కొరడా ఝళిపించారు. రోడ్డుకు అడ్డుగా నిర్మించిన పలు భవనాలను కూల్చివేశారు. ముఖ్యంగా మార్కండేయ కాలనీ పరిధిలోని రాజేష్ టాకీస్ సమీపంలో ఒక భారీ భవనాన్ని కూల్చివేస్తుండగా, ఊహించని పరిణామం చోటుచేసుకుంది.

కూల్చివేతలో పెను ప్రమాదం తప్పింది: స్థానికుల్లో ఆందోళన

మున్సిపల్ అధికారుల పర్యవేక్షణలో చేపట్టిన ఈ కూల్చివేత ప్రక్రియ ఉద్రిక్తంగా మారింది. భవనం ముందు భాగాన్ని జేసీబీతో కూల్చివేస్తుండగా.. ఒక్కసారిగా భవనం పక్కకు ఒరిగి, కుప్పకూలిపోయింది. ఈ ఘటనతో అక్కడున్న వారంతా ఒక్కసారిగా ఉలిక్కిపడ్డారు. అదృష్టవశాత్తు.. కూల్చివేతకు ముందుగానే అధికారులు ఆ ప్రాంతంలో వాహనాల రాకపోకలను నిలిపివేయడంతో పెద్ద ప్రమాదం తప్పింది. జేసీబీ డ్రైవర్‌కు స్వల్పగాయాలు కావడంతో చికిత్స నిమిత్తం వెంటనే ఆసుపత్రికి తరలించారు.

భవనం కూలిన సమయంలో పెద్ద ఎత్తున దుమ్ము లేచి ఆ ప్రాంతమంతా కమ్ముకుంది. దట్టమైన ధూళి మేఘాలతో కనుచూపు మేర ఏమీ కనిపించకపోవడంతో స్థానికులు భయాందోళనకు గురయ్యారు. కొద్దిసేపటి తర్వాత పరిస్థితి కుదుటపడటంతో అంతా ఊపిరి పీల్చుకున్నారు. ఈ ఘటన అక్రమ నిర్మాణాల కూల్చివేతలో ఎదురయ్యే సవాళ్లను, భద్రతాపరమైన అంశాలను మరోసారి గుర్తు చేసింది.

రాష్ట్రంలో ప్లానింగ్ లేకుండా నిర్మించిన భవనాలు, ప్రభుత్వ భూముల్లో అక్రమ కట్టడాలు ఒక పెద్ద సమస్యగా మారాయి. ఇవి ట్రాఫిక్ సమస్యలకు, పౌర సౌకర్యాల కొరతకు, అగ్నిప్రమాదాలు వంటి విపత్తులు సంభవించడానికి దారితీస్తున్నాయి. ఈ నేపథ్యంలో.. తెలంగాణ ప్రభుత్వం పట్టణ ప్రాంతాల్లో అక్రమ నిర్మాణాల నిర్మూళనకు పకడ్బందీ చర్యలు చేపట్టింది. ఇటువంటి కూల్చివేతల ద్వారా ప్రజలకు, ముఖ్యంగా వాహనదారులకు మెరుగైన రహదారి సౌకర్యాలు, సురక్షితమైన వాతావరణం కల్పించాలని అధికారులు లక్ష్యంగా పెట్టుకున్నారు.

అధికారులు చేపట్టిన ఈ కూల్చివేతలు ప్రజలకు అప్రమత్తత సందేశాన్ని ఇస్తున్నాయి. నిర్మాణాలను చేపట్టే ముందు అన్ని అనుమతులు తీసుకోవాలని.. నిబంధనలను తప్పకుండా పాటించాలని పురపాలక శాఖ పదేపదే సూచిస్తోంది. భవిష్యత్తులో ఇలాంటి ప్రమాదకర సంఘటనలు పునరావృతం కాకుండా.. కూల్చివేత ప్రక్రియలను మరింత జాగ్రత్తగా, పటిష్టమైన భద్రతా చర్యలతో నిర్వహించాల్సిన అవసరం ఉందని ఈ ఘటన నిరూపించింది. స్థానికులు కూడా అధికారులకు సహకరించి, అక్రమ నిర్మాణాలను ప్రోత్సహించకుండా ఉండటం ద్వారా సురక్షితమైన, ప్రణాళికాబద్ధమైన పట్టణాభివృద్ధికి తోడ్పడగలరని ఆశిస్తున్నారు