రాజీవ్​ యువవికాసం స్కీంపై కీలక అప్డేట్,,,,పూర్తయిన బ్యాంక్ వెరిఫికేషన్

తెలంగాణ ప్రభుత్వం ప్రతిష్టాత్మకంగా అమలు చేస్తున్న రాజీవ్ యువ వికాసం స్వయం ఉపాధి పథకానికి భారీగా దరఖాస్తులు వచ్చాయి. ముఖ్యంగా మైనార్టీ, బీసీ వర్గాల నుంచి తీవ్ర పోటీ నెలకొనగా, ఎస్సీ, ఎస్టీ యువత కూడా ఉపాధి కోసం ఈ పథకం కింద అధిక సంఖ్యలో దరఖాస్తు చేసుకున్నారు. దరఖాస్తుల బ్యాంకు వెరిఫికేషన్ ప్రక్రియ పూర్తవ్వగా, నెలాఖరులో లబ్దిదారుల ఎంపిక చేసి, జూన్ మొదటి వారంలో ప్రొసీడింగ్స్ ఇవ్వనున్నారు. యువతకు స్వయం ఉపాధి అవకాశాలు కల్పించాలనే లక్ష్యంతో రాష్ట్ర ప్రభుత్వం ఈ పథకాన్ని ప్రవేశపెట్టింది. రేషన్ కార్డులున్న బలహీన వర్గాలకు చెందిన వారితో పాటు ఈబీసీ, మైనార్టీ యువతకు రూ. 50 వేల నుంచి రూ. 4 లక్షల వరకు లోన్లు అందిస్తారు.

యాదాద్రి జిల్లా విషయానికొస్తే.. జిల్లాలో మొత్తం 39,141 దరఖాస్తులు అందాయి. వీటిలో 38,900 మంది మీ సేవా కేంద్రాల ద్వారా దరఖాస్తు చేసుకోగా, 241 మంది ఇతర జిల్లాల్లో ఉంటూ ఆన్‌లైన్‌లో దరఖాస్తు చేసుకున్నారు. జిల్లాకు మొత్తం 7,041 యూనిట్లు మంజూరయ్యాయి. ఇందులో రూ. 50 వేల విలువైన 2,600 యూనిట్లు ఉన్నాయి, వీటికి 100 శాతం సబ్సిడీ లభిస్తుంది. బీసీలకు 2,500 యూనిట్లు మంజూరు కాగా.. 23,578 మంది దరఖాస్తు చేసుకున్నారు. ఒక్కో యూనిట్‌కు కనీసం 9 మంది పోటీ పడుతున్నారు. మైనార్టీలకు 291 యూనిట్లు మంజూరు కాగా.. 1,714 మంది దరఖాస్తు చేసుకున్నారు. ఒక్కో యూనిట్‌కు ఐదుగురి కంటే ఎక్కువ మంది పోటీ పడుతున్నారు. ఎస్సీలు 2,937 యూనిట్లు మంజూరు కాగా.. 10,209 మంది దరఖాస్తు చేసుకోగా.. ఎస్టీలకు 705 యూనిట్లకు గాను 2,536 మంది దరఖాస్తు చేసుకున్నారు. ఈబీసీలు 608 యూనిట్లు మంజూరు కాగా.. 836 మంది మాత్రమే దరఖాస్తు చేసుకున్నారు. ఈబీసీల్లో పోటీ కాస్త తక్కువగా ఉంది.

ఇక దరఖాస్తులకు సంబంధించిన బ్యాంక్ వెరిఫికేషన్ ప్రక్రియ ముగిసింది. వచ్చిన దరఖాస్తుల్లో 5 శాతం వరకు రిజెక్ట్ చేశారు. మిగిలిన దరఖాస్తుల నుంచి లబ్ధిదారులను ఎంపిక చేయాల్సి ఉంది. ఈ నెల 25లోగా మండల కమిటీలు లబ్ధిదారుల జాబితాను జిల్లా కమిటీకి పంపించనున్నాయి. ఆ జాబితా జిల్లా కమిటీ నుంచి ఎమ్మెల్యేల చేతికి చేరుతుంది. నెలాఖరుకు ఎంపిక ప్రక్రియ పూర్తవుతుంది. అనంతరం జూన్ 2 నుంచి 9వ తేదీ వరకు లబ్దిదారులకు ప్రొసీడింగ్స్ అందించనున్నారు. ఈ పథకం ద్వారా తెలంగాణ యువత స్వయం ఉపాధి పొంది ఆర్థికంగా స్థిరపడతారని ప్రభుత్వం ఆశిస్తోంది.