తెలంగాణలో రాగల మూడు రోజులు కొన్నిచోట్ల భారీ వర్షాలు

అల్పపీడన ద్రోణి ప్రభావంతో తెలంగాణ రాష్ట్రంలో రాగల మూడు రోజుల పాటు పలు జిల్లాల్లో అక్కడక్కడా భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది. నైరుతి రుతుపవనాలు దేశవ్యాప్తంగా చురుగ్గా కదులుతూ మరిన్ని ప్రాంతాలకు విస్తరించడం, దీనికి తోడు అల్పపీడనం ఏర్పడటంతో రాష్ట్రంలో వర్షాలు ఊపందుకోనున్నాయి.ప్రస్తుతం మరఠ్వాడ, దాని పరిసర ప్రాంతాలు, ఉత్తర అంతర్గత కర్ణాటక ప్రాంతాల్లో ఉపరితల ఆవర్తనం కొనసాగుతోంది. ఇది సముద్ర మట్టానికి 0.9 కిలోమీటర్ల నుంచి 4.5 కిలోమీటర్ల ఎత్తు వరకు విస్తరించి ఉంది. ఈ ఆవర్తనానికి అనుబంధంగా ఉన్న అల్పపీడనం రానున్న 24 గంటల్లో నెమ్మదిగా తూర్పు వైపు కదిలి క్రమంగా బలహీనపడే అవకాశం ఉందని వాతావరణ శాఖ సంచాలకులు తెలిపారు.ఈ అల్పపీడన ప్రభావంతో తెలంగాణ రాష్ట్రంలో రాగల మూడు రోజుల పాటు  పలు జిల్లాల్లో అక్కడక్కడా ఉరుములు, మెరుపులతో కూడిన భారీ వర్షాలు కురిసే అవకాశం ఉందని అధికారులు అంచనా వేశారు. ఆదిలాబాద్, కొమరంభీం ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, రాజన్న సిరిసిల్ల, కరీంనగర్, పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం జిల్లాల్లో ప్రధానంగా భారీ వర్షాలు కురిసే సూచనలున్నాయి. మిగిలిన జిల్లాల్లో తేలికపాటి నుంచి మోస్తరు వర్షాలు పడవచ్చు.ఈ మూడు రోజుల పాటు రాష్ట్రంలోని అన్ని జిల్లాల్లోనూ గంటకు 30 నుంచి 40 కిలోమీటర్ల వేగంతో బలమైన ఈదురు గాలులు వీచే అవకాశం ఉందని, ప్రజలు అప్రమత్తంగా ఉండాలని వాతావరణ కేంద్రం అధికారులు సూచించారు. ముఖ్యంగా లోతట్టు ప్రాంతాల ప్రజలు, రైతులు తగిన జాగ్రత్తలు తీసుకోవాలని, పాత భవనాలు, చెట్ల కింద నిలబడరాదని హెచ్చరించారు. అవసరమైతే తప్ప ప్రయాణాలను వాయిదా వేసుకోవడం మంచిదని తెలిపారు.దేశంలోకి ప్రవేశించిన నైరుతి రుతుపవనాలు వేగంగా విస్తరిస్తున్నాయి. పశ్చిమ మధ్య, తూర్పు మధ్య అరేబియా సముద్రంతో పాటు కర్ణాటకలోని కొన్ని ప్రాంతాలు, గోవా మొత్తం, మహారాష్ట్రలోని కొన్ని ప్రాంతాలకు నైరుతి పవనాలు విస్తరించినట్లు వాతావరణ శాఖ అధికారులు తెలిపారు. వీటితో పాటు పశ్చిమ మధ్య, ఉత్తర బంగాళాఖాతంలోని మరికొన్ని ప్రాంతాలు, ఈశాన్య రాష్ట్రాలైన మిజోరాం, మణిపూర్‌, నాగాలాండ్‌లోని కొన్ని ప్రాంతాలకు కూడా రుతుపవనాలు ప్రవేశించాయని పేర్కొన్నారు.