విద్యార్థులకు అలర్ట్.. రేపటి ఆ పరీక్షలు అన్నీ వాయిదా

తెలంగాణ రాష్ట్ర వ్యాప్తంగా మొన్నటి వరకు కాస్త శాంతించిన వర్షాలు.. రెండు మూడు రోజు నుంచి దంచికొడుతున్నాయి. తీవ్ర వర్షాల ప్రభావంతో తెలంగాణలో అనేక ప్రాంతాలు నీటమునిగాయి. ఈ నేపథ్యంలో తెలంగాణ విశ్వవిద్యాలయ పరిధిలో ఆగస్టు 28న జరగాల్సిన పీజీ, బీఎడ్, ఎమ్మేడ్ పరీక్షలను వాయిదా వేస్తున్నట్లు పరీక్షల నియంత్రణాధికారి ప్రొఫెసర్ కే. సంపత్ కుమార్ ప్రకటించారు. బుధవారం విడుదల చేసిన ప్రకటనలో ఆయన ఈ నిర్ణయాన్ని వెల్లడించారు. వాయిదా పడిన పరీక్షలకు కొత్త తేదీలను త్వరలో ప్రకటిస్తామని తెలిపారు. అయితే మిగిలిన అన్ని పరీక్షలు ముందుగా నిర్ణయించిన షెడ్యూల్ ప్రకారం కొనసాగుతాయని స్పష్టం చేశారు.

విద్యార్థుల సమస్యలు..

భారీ వర్షాలతో రవాణా సౌకర్యాలు దెబ్బతిన్నాయి. రైళ్లు రద్దు కావడం, రోడ్లు జలమయం కావడంతో విద్యార్థులు పరీక్ష కేంద్రాలకు వెళ్లే పరిస్థితి లేకుండా పోయింది. ముఖ్యంగా హాస్టళ్లలో చిక్కుకుపోయిన విద్యార్థులు బయటకు రావడం కష్టంగా మారింది. ఈ పరిస్థితుల్లో విశ్వవిద్యాలయం తీసుకున్న నిర్ణయం విద్యార్థులకు ఉపశమనం కలిగించింది. అయినప్పటికీ, పరీక్షలు వాయిదా కారణంగా విద్యా ప్రణాళికల్లో అంతరాయం కలుగుతుందనే ఆందోళన విద్యార్థుల్లో వ్యక్తమవుతోంది.

విద్యార్థుల భద్రతను దృష్టిలో ఉంచుకుని విశ్వవిద్యాలయం అత్యవసరంగా ఈ నిర్ణయం తీసుకుంది. వాతావరణ శాఖ హెచ్చరికల మేరకు మరో రెండు రోజులపాటు వర్షాలు కొనసాగే అవకాశం ఉండటంతో పరీక్షలను కొనసాగించడం సురక్షితం కాదని అధికారులు భావించారు. పీజీ, బీఎడ్, ఎమ్మేడ్ పరీక్షలకు రాష్ట్రవ్యాప్తంగా వేలాది మంది అభ్యర్థులు హాజరయ్యే నేపథ్యంలో ఈ నిర్ణయం తీసుకోవడం తప్పనిసరి అయింది.

ఈ పరీక్షలు రాసే అభ్యర్థులు ఎప్పటికప్పుడు వెబ్ సైట్ చూడాలని.. ఏ అప్ డేట్ ఉన్నా.. అందులోనే పొందుపరుస్తామని తెలిపారు. ప్రస్తుతం విద్యార్థులు కొత్త షెడ్యూల్ కోసం ఎదురు చూస్తున్నారు. పరీక్షల తేదీలు త్వరగా ప్రకటిస్తే తమ ప్రిపరేషన్‌లో అంతరాయం కలగదని భావిస్తున్నారు. విద్యార్థుల భవిష్యత్తు దృష్ట్యా సరైన ప్రణాళికతోనే పరీక్షల షెడ్యూల్‌ను ప్రకటిస్తామని అధికారులు భరోసా ఇచ్చారు.