వినాయకుడితో పాటు రూ.5 లక్షల విలువైన బంగారం నిమజ్జనం

వినాయక నవరాత్రి ఉత్సవాలు ఊరూరా.. వాడవాడలా వైభవంగా జరుగుతున్నాయి. వీధులన్నీ గణనాథుల మండపాలతో శోభాయమానంగా మారిపోయాయి. 'గణపతి బప్పా మోరియా..' నినాదాలతో, భక్తుల సందడితో పండగ వాతావరణం నెలకొంది. ఇక పలు ప్రాంతాల్లో మూడో రోజు నిమజ్జనాలు ప్రారంభమయ్యాయి. ఎక్కడ చూసినా గణనాథుని విగ్రహాలను తీసుకెళ్తున్న వాహనాలు, భక్తుల కోలాహలం కనిపిస్తున్నాయి. ఇలాంటి సమయంలో హైదరాబాద్ శివారు తుర్కయంజాల్ మున్సిపాలిటీ పరిధిలోని మాసబ్ చెరువు వద్ద ఒక ఆసక్తికరమైన ఘటన చోటు చేసుకుంది.

మాసబ్ చెరువు వద్ద వినాయక విగ్రహాల నిమజ్జనాలు మెుదలయ్యాయి. హస్తినాపురం నివాసితులైన గిరిజ కుటుంబం కూడా తమ వినాయక విగ్రహాన్ని నిమజ్జనం చేయడానికి చెరువు వద్దకు చేరుకున్నారు. భక్తి శ్రద్ధలతో పూజలు చేసి గణనాథుడిని నీటిలోకి వదిలారు. కానీ.. ఒక్కసారిగా వారికి ఏదో గుర్తొచ్చినట్లు అయింది. వారి ముఖాల్లో సంతోషం స్థానంలో ఆందోళన, భయం చోటుచేసుకున్నాయి. విషయం ఏంటని ఆరా తీయగా.. వారు నిమజ్జనం చేసిన వినాయక విగ్రహానికి ఐదు తులాల బంగారాన్ని అలంకరణగా ఉంచారని, పొరపాటున దాన్ని తీయడం మర్చిపోయి అలాగే నిమజ్జనం చేసేశారని తెలిసింది. వారి ఆనందం ఆవిరై కళ్లు కన్నీటితో నిండిపోయాయి. 'అయ్యో.. దేవుడా ఎంతపైనైపాయే' అంటూ తలలు పట్టుకున్నారు.

వెంటనే మున్సిపాలిటీ నోడల్ అధికారికి ఈ విషయం తెలియజేశారు. అధికారి సత్వరమే స్పందించి పరిస్థితిని అర్థం చేసుకుని.. సిబ్బందిని అప్రమత్తం చేశారు. జేసీబీ డ్రైవర్ సహాయంతో నిమజ్జనం చేసిన విగ్రహాలను వెలికి తీసే ప్రయత్నం మొదలు పెట్టారు. అయితే అది చాలా కష్టమైన పని. చెరువులో చాలా విగ్రహాలు ఉన్నాయి. అయినప్పటికీ, మున్సిపల్ సిబ్బంది విగ్రహాలను వెతకడం మొదలుపెట్టారు. భక్తులు, స్థానిక ప్రజలు కూడా ఈ సంఘటనను ఆసక్తిగా గమనిస్తున్నారు. 'బంగారం దొరుకుతుందా..?' అని అనుమానంగా చూస్తున్నారు.

ఆ తర్వాత కాసేపటికి నిమజ్జనం చేసిన విగ్రహాన్ని గుర్తించి చాకచక్యంగా బయటకు తీశారు. విగ్రహాన్ని తరచి చూడగా.. ఐదు తులాల బంగారు ఆభరణం భద్రంగా ఉంది. మున్సిపల్ అధికారులు ఆ బంగారాన్ని గిరిజ కుటుంబానికి అప్పగించారు. వారి ముఖాల్లో ఆందోళన స్థానంలో ఊహించని సంతోషం, కృతజ్ఞత భావం వెల్లివిరిసింది. 'చాలా ధన్యవాదాలు సార్.. మేము ఆశ వదులుకున్నాం.. కానీ మీరు మాకు చాలా సాయం చేశారు' అంటూ భావోద్వేగంతో మున్సిపల్ సిబ్బందికి కృతజ్ఞతలు తెలిపారు.