ఖైరతాబాద్ గణేశ్ నిమజ్జనం తేదీ ప్రకటన.. ఎప్పుడంటే

హైదరాబాద్ నగరంలోని ఖైరతాబాద్ మహా గణపతి ప్రతీ ఏటా ప్రత్యేక ఆకర్షణగా నిలుస్తుంది. నేడు ఆదివారం కావడంతో భక్తుల రద్దీ మరింత ఎక్కువగా కనిపిస్తోంది. ఈ రోజు ప్రభుత్వ, ప్రైవేటు కార్యాలయాలకు సెలవు కావడం వల్ల భక్తుల రద్దీ మరింత ఎక్కువగా ఉంటుందని అంచనా. అందువల్ల పోలీసులు పలు జిల్లాల నుంచి అదనపు బలగాలను రప్పించి బందోబస్తు ఏర్పాట్లు చేస్తున్నారు. ట్రాఫిక్ జామ్‌లు కాకుండా ఇప్పటికే ప్రత్యేక రూట్ మ్యాప్ విడుదల చేసి.. శనివారం రాత్రి నుంచే ట్రాఫిక్ ఆంక్షలు అమల్లోకి తీసుకువచ్చారు.

అయితే.. సెప్టెంబర్ 7న చంద్రగ్రహణం ఉండటం వల్ల గణేశ్ నిమజ్జనం ఎప్పుడు జరుగుతుందో అనేది చాలా మందికి అనుమానంగా మారింది. దీనికి స్పష్టతనిస్తూ ఉత్సవ సమితి సెప్టెంబర్ 6వ తేదీనే విశ్వశాంతి మహా గణపతిని నిమజ్జనం చేయనున్నట్లు అధికారికంగా ప్రకటించింది. భక్తుల సందేహాలకు సమాధానం లభించడంతో అందరిలోనూ సంతృప్తి నెలకొంది. ముఖ్యంగా హైదరాబాద్ నగర వాసులతో పాటు ఇతర ప్రాంతాల భక్తులు కూడా ఈ మహా నిమజ్జనాన్ని ప్రత్యక్షంగా చూసేందుకు ఎదురుచూస్తున్నారు.

ప్రభుత్వం, జీహెచ్ఎంసీ మరియు పోలీస్ శాఖలు కలిసి ఏర్పాట్లు చేస్తున్నారు. పాడైన రహదారులను మరమ్మతు చేస్తూ.. ట్యాంక్ బండ్ ప్రాంతంలో ప్రత్యేక క్రేన్లను ఏర్పాటు చేస్తున్నారు. భారీ సంఖ్యలో విగ్రహాలు అక్కడికి చేరతాయని అంచనా. భక్తులకు తాగునీరు, వైద్య సేవలు, భద్రతా బందోబస్తు, ట్రాఫిక్ నియంత్రణ వంటి అన్ని చర్యలు అమల్లోకి తీసుకొస్తున్నారు.

ఖైరతాబాద్ గణేష్ చరిత్ర..

ఖైరతాబాద్ మహా గణపతికి సుమారు సగం శతాబ్దం చరిత్ర ఉంది. 1954లో 5 అడుగుల విగ్రహంతో ప్రారంభమైంది. ఆ తరువాత ప్రతీ సంవత్సరం 1 అడుగు చొప్పున విగ్రహం ఎత్తును పెంచుతూ వచ్చారు. 2014లో గణేష్ విగ్రహం 60 అడుగుల ఎత్తుకు చేరుకుంది. భద్రతా కారణాల వల్ల తరువాత ఎత్తును తగ్గించారు. ఈ సంవత్సరం 69 అడుగుల ఎత్తుతో విశ్వశాంతి మహా గణపతిని అలంకరించారు.

ప్రతి ఏడాది ప్రత్యేక నామకరణం చేస్తారు. ఈసారి ‘విశ్వశాంతి మహా గణపతి’ పేరుతో ప్రతిష్టించారు. ఖైరతాబాద్ గణేష్ విగ్రహం ప్రపంచంలోనే ఎత్తైన క్లే గణపతులలో ఒకటిగా ప్రసిద్ధి చెందింది. ప్రతీ ఏడాది విగ్రహం కోసం ప్రత్యేక కళాకారులు, ఇంజనీర్లు, శిల్పులు కలిసి 3 నెలలపాటు శ్రమిస్తారు. దాదాపు 50–60 టన్నుల మట్టి, 20 టన్నుల ఐరన్ రాడ్లు ఉపయోగించి ప్రతిష్టిస్తారు. ప్రతి ఏడాది లక్షలాది మంది భక్తులు ఖైరతాబాద్ గణపతిని దర్శించుకుంటారు.