తెలంగాణలో ఆ కులాలు ఎస్టీ జాబితా నుంచి తొలగింపు..?

లంబాడీలు, బంజారాలు, సుగాలి కులాలను ఎస్టీ జాబితాలో చేర్చడం రాజ్యాంగానికి విరుద్ధమని ఆరోపిస్తూ దాఖలైన పిటిషన్‌పై సుప్రీంకోర్టు తాజాగా విచారణ జరిపింది. ఈ కేసులో కేంద్రం, తెలంగాణ ప్రభుత్వాలతో పాటు ఇతర సంబంధిత పక్షాలకు నోటీసులు జారీ చేసింది సుప్రీం కోర్టు. సమగ్ర నివేదికలు సమర్పించాలని ఆదేశిస్తూ.. తదుపరి విచారణను సెప్టెంబర్ 9కి వాయిదా వేసింది.

పిటిషన్ వివరాలు..

భద్రాచలం ఎమ్మెల్యే తెల్లం వెంకట్రావ్, మాజీ ఎంపీ సోయం బాపూరావుతో పాటు మరికొందరు ఈ పిటిషన్‌ను దాఖలు చేశారు. సీనియర్ న్యాయవాది అల్లంకి రమేశ్ వారి తరఫున వాదనలు వినిపించారు. 1976లో అమలులోకి వచ్చిన ఎస్సీ, ఎస్టీ ఆర్డర్ సవరణ చట్టం ప్రకారం ఈ మూడు వర్గాలను ఎస్టీలుగా చేర్చడం ఆర్టికల్ 342 ఉల్లంఘనగా పేర్కొన్నారు. పిటిషనర్ల వాదన ప్రకారం 1976 వరకు ఉమ్మడి ఆంధ్రప్రదేశ్‌లోని తెలంగాణ జిల్లాల్లో లంబాడా, సుగాలీలను ఎస్టీలుగా పరిగణించలేదు.

 అంతకుముందు వారు బీసీ జాబితాలో ఉన్నారని గుర్తు చేశారు. హైదరాబాద్‌ రాష్ట్రం భారత యూనియన్‌లో విలీనమైన సమయంలో ఆంధ్రా ప్రాంతం మద్రాసు రాష్ట్రంలో ఉండేది. ఆ ప్రాంతంలో లంబాడా, సుగాలీలకు ఎస్టీ హోదా కల్పించారు. కానీ హైదరాబాద్ రాష్ట్రంలో మాత్రం వారిని ఎస్టీలుగా గుర్తించలేదు. తరువాత కాలంలో రాష్ట్ర ప్రభుత్వం వారిని ఎస్టీ జాబితాలో చేర్చిందని పేర్కొన్నారు.

పిటిషనర్ల వాదన..

ఈ వర్గాలు గిరిజనులుకాదని, ఇతర రాష్ట్రాల నుంచి వలస వచ్చి ఇక్కడి అసలైన ఆదివాసీలకు కేటాయించిన హక్కులను స్వాధీనం చేసుకున్నారని వాదించారు. ఎస్టీ జాబితాలో కొనసాగడం వల్ల విద్య, ఉద్యోగాలు, సంక్షేమ పథకాల్లో నిజమైన గిరిజన వర్గాలు అన్యాయం ఎదుర్కొంటున్నాయని తెలిపారు.

ఈ కేసును జస్టిస్ జె.కె. మహేశ్వరి, జస్టిస్ విజయ్ బిష్ణోయ్‌లతో కూడిన ద్విసభ్య ధర్మాసనం విచారించింది. అన్ని పక్షాలు తమ వాదనలు స్పష్టంగా సమర్పించాలని ఆదేశించింది. పిటిషనర్ల అభ్యర్థన ప్రకారం తెలంగాణలో లంబాడా, బంజారా, సుగాలీలను తిరిగి బీసీ జాబితాలో చేర్చే అంశంపై తుది తీర్పు వెలువడనుంది.

ఈ కేసు తెలంగాణ రాజకీయ, సామాజిక వర్గాల్లో చర్చనీయాంశంగా మారింది. ఎస్టీ హోదా కొనసాగించాలా లేక బీసీ జాబితాలో చేర్చాలా అన్నదానిపై సుప్రీంకోర్టు తీర్పు ప్రభావం భారీగా ఉండనుంది. నిజమైన గిరిజన హక్కులు కాపాడబడతాయా లేదా అన్న ప్రశ్నకు సమాధానం కోసం అందరి దృష్టి సెప్టెంబర్ 9న జరగబోయే తదుపరి విచారణపై ఉంది.