రోజుకు రూ.8 వేలు సంపాదన.. మహిళలకు ఆ ట్రిక్ చెప్పిన మంత్రి సీతక్క

తెలంగాణ ప్రభుత్వం మహిళల ఆర్థిక స్థితిని బలోపేతం చేయాలనే లక్ష్యంతో విస్తృతమైన పథకాలు చేపడుతోంది. ముఖ్యమంత్రి రేవంత్ రెడ్డి నాయకత్వంలో ప్రతి మహిళను ఆర్థికంగా ముందుకు నడిపించి కోటీశ్వరురాలిని చేయాలన్నది ఈ ప్రభుత్వ సంకల్పమని పంచాయతీరాజ్, గ్రామీణాభివృద్ధి శాఖ మంత్రి సీతక్క స్పష్టం చేశారు. ప్రజాభవన్‌లో నిర్వహించిన సంచార చేపల విక్రయ వాహనాల పంపిణీ కార్యక్రమంలో మంత్రి సీతక్కతో పాటు పశుసంవర్ధక శాఖ మంత్రి వాకిటి శ్రీహరి పాల్గొన్నారు.

ప్రభుత్వం ఇప్పటికే మొదటి విడతలో 31 వాహనాలను పంపిణీ చేసి మంచి ఫలితాలను సాధించింది. ఆ విజయాన్ని కొనసాగిస్తూ తాజాగా మరో 36 వాహనాలను మహిళా సంఘాలకు అందజేసింది. ఈ వాహనాల ద్వారా మహిళలు ప్రతిరోజూ రూ. 8 వేల వరకు సంపాదిస్తున్నారని మంత్రి అన్నారు. కేవలం లైవ్ ఫిష్ మాత్రమే కాకుండా, చేపల ఫ్రై, పచ్చళ్ళు, వేపుడు వంటకాలను కూడా విక్రయించి అదనపు ఆదాయం పొందుతున్నారన్నారు. రుచికరమైన వంటకాలకు ఎప్పుడూ డిమాండ్ ఉంటుందని.. ఇటువంటి వంటకాలు విక్రయించి రోజుకు దాదాపు రూ.10 వేలు సంపాదించుకోవచ్చన్నవారు.

మంత్రి సీతక్క మాట్లాడుతూ.. 20కి పైగా రంగాల్లో మహిళలను ప్రోత్సహిస్తున్నామనే విషయంను గుర్తుచేశారు. పెట్రోల్ బంకులు, సోలార్ కంపెనీలు, ఈవెంట్ మేనేజ్మెంట్ సంస్థలు, ఇందిరా మహిళా శక్తి క్యాంటీన్లు వంటి విభిన్న వ్యాపార రంగాల్లో మహిళలకు అవకాశాలు కల్పించామని వివరించారు. ముఖ్యంగా ‘అమ్మ చేతి వంట’ రుచిని ప్రతిబింబించే విధంగా ఇందిరా మహిళా శక్తి క్యాంటీన్లు విజయవంతంగా నడుస్తున్నాయని, ఇవి బ్రాండ్ అంబాసిడర్‌లుగా నిలుస్తున్నాయని ఆమె హర్షం వ్యక్తం చేశారు.

మహిళా సంఘాల్లో సభ్యత్వం కలిగి ఉంటే ఆర్థిక ధీమా కలుగుతుందని మంత్రి సీతక్క పేర్కొన్నారు. సభ్యులకు అత్యవసర పరిస్థితుల్లో రెండు లక్షల వరకు లోన్ బీమా సౌకర్యం కూడా అందిస్తున్నామని తెలిపారు. ‘మహిళా సంఘం అనేది కేవలం ఆర్థిక సహకారమే కాదు, ఒక భరోసా, ఒక అండ’ అని మంత్రి పేర్కొనడం విశేషం. ప్రభుత్వం చేపడుతున్న ఈ చర్యలు గ్రామీణ మహిళలకు ఉపాధి మాత్రమే కాకుండా.. ఆత్మవిశ్వాసాన్ని కూడా పెంపొందిస్తున్నాయి. గృహిణులుగా పరిమితం కాకుండా, వ్యాపార రంగంలోనూ నిలబడగలమనే ధైర్యాన్ని ఇస్తున్నాయి. చిన్న వ్యాపారాలను పెద్ద స్థాయికి తీసుకెళ్లే దిశగా మహిళలు ముందుకు సాగుతున్నారని నిపుణులు పేర్కొంటున్నారు.

భవిష్యత్తులో మహిళల ఆధారిత వ్యాపారాలు మరింత విస్తరించి, సమాజంలో సమాన అవకాశాల దిశగా ముందడుగు వేయగలవని ఈ పథకాలు నిరూపిస్తున్నాయి. రాష్ట్ర ప్రభుత్వం మహిళా సాధికారతను నినాదంగా కాకుండా.. వాస్తవ రూపంలో అమలు చేస్తోందని చెప్పవచ్చు.