ఫోన్ ట్యాపింగ్ విచారణ: ‘ఆ వార్తలు పచ్చి అబద్ధం’.. లీకులపై కేటీఆర్ ఫైర్!

ఫోన్ ట్యాపింగ్ వ్యవహారంలో తనపై వస్తున్న వార్తలను బీఆర్ఎస్ వర్కింగ్ ప్రెసిడెంట్ కేటీఆర్ తీవ్రంగా ఖండించారు. విచారణ సమయంలో మాజీ డీసీపీ రాధాకిషన్ రావును తన ముందుకు తీసుకొచ్చారనే ప్రచారంలో ఏమాత్రం వాస్తవం లేదని ఆయన స్పష్టం చేశారు. ప్రభుత్వ పెద్దలు కావాలనే తప్పుడు సమాచారాన్ని లీక్ చేస్తున్నారని, రాజకీయంగా తనను ఇబ్బంది పెట్టడానికే ఇదంతా చేస్తున్నారని ఆయన మండిపడ్డారు. మీడియా సంస్థలు కూడా ఇలాంటి సున్నితమైన అంశాలలో వాస్తవాలను సరిచూసుకోకుండా వార్తలు ప్రసారం చేయవద్దని ఆయన విజ్ఞప్తి చేశారు.
విచారణ గదిలో కేవలం అధికారులు, తాను తప్ప మరెవరు లేరని కేటీఆర్ ఈ సందర్భంగా క్లారిటీ ఇచ్చారు. "అక్కడ తారకరామారావు తప్ప మరే 'రావు' లేడు" అంటూ ఆయన సెటైరికల్‌గా వ్యాఖ్యానించారు. సిట్ (SIT) అధికారులు అడిగిన ప్రశ్నలకు తాను సహకరించలేదని, అంతా కింది స్థాయి అధికారులే చూసుకున్నారని తాను సమాధానం ఇచ్చినట్లు జరుగుతున్న ప్రచారాన్ని ఆయన కొట్టిపారేశారు. ఇలాంటి కట్టుకథలు అల్లి ప్రజలను తప్పుదోవ పట్టించాలని చూడటం సరికాదని కేటీఆర్ హితవు పలికారు.
గత కొద్దిరోజులుగా విచారణకు సంబంధించి సోషల్ మీడియాలోనూ, కొన్ని ప్రధాన మీడియా సంస్థలలోనూ రకరకాల కథనాలు వెలువడ్డాయి. ముఖ్యంగా రాధాకిషన్ రావును, కేటీఆర్‌ను ఎదురెదురుగా కూర్చోబెట్టి అధికారులు విచారించారని, ఆ సమయంలో కేటీఆర్ నీళ్లు నమిలారని కొన్ని వర్గాలు ప్రచారం చేశాయి. ఈ ప్రచారాన్ని కేటీఆర్ గట్టిగా తిప్పికొడుతూ, అదంతా ఒక పక్కా ప్లాన్ ప్రకారం జరుగుతున్న కుట్రగా అభివర్ణించారు. ఆధారాలు లేని వార్తలను వండివార్చడం వల్ల వ్యవస్థల మీద నమ్మకం పోతుందని ఆయన ఆవేదన వ్యక్తం చేశారు.
ప్రభుత్వ యంత్రాంగం ఇచ్చే అనధికారిక లీకులను నమ్మి ప్రజలు అయోమయానికి గురికావొద్దని కేటీఆర్ కోరారు. కేసు విచారణలో భాగంగా తాను చెప్పాల్సింది చెప్పానని, చట్టం తన పని తాను చేసుకుపోతుందని పేర్కొన్నారు. రాజకీయ కక్ష సాధింపులో భాగంగానే ఈ ఫోన్ ట్యాపింగ్ కేసును వాడుకుంటున్నారని ఆరోపిస్తూ, ఏ విచారణకైనా తాను సిద్ధమని పునరుద్ఘాటించారు. తప్పుడు వార్తలు రాసే వారిపై చట్టపరమైన చర్యలకు కూడా వెనకాడబోమని ఈ సందర్భంగా కేటీఆర్ సంకేతాలిచ్చారు.