తెలంగాణ మున్సిపల్ ఎన్నికల్లో పవన్ కళ్యాణ్ ప్రచారం

తెలంగాణలో మున్సిపల్ ఎన్నికల్లో భాగంగా కీలక ఘట్టమైన నామినేషన్ల విత్ డ్రా గడువు ముగియడంతో.. పార్టీలు, అభ్యర్థులు పూర్తి స్థాయి ప్రచారంపై దృష్టి సారించారు. ఈ క్రమంలోనే వీలైనన్ని ఎక్కువ మున్సిపాలిటీలను దక్కించుకోవాలని అన్ని పార్టీలు ప్రయత్నాలు చేస్తున్నాయి. ఇక ఈ మున్సిపల్ ఎన్నికల్లో జనసేన పార్టీ కూడా పోటీలో నిలిచింది. ఈ నేపథ్యంలోనే తెలంగాణలో జనసేన పార్టీ అభ్యర్థుల తరఫున ప్రచారం చేసేందుకు ఆ పార్టీ అధినేత, ఆంధ్రప్రదేశ్ ఉప ముఖ్యమంత్రి పవన్ కళ్యాణ్ రంగంలోకి దిగనున్నారు. జనసేన అభ్యర్థులను గెలిపించడమే లక్ష్యంగా ఆయన ఆయా ప్రాంతాల్లో ప్రచారం నిర్వహించనున్నారు. మరోవైపు.. బీజేపీ కూడా తమ అభ్యర్థుల తరఫున ప్రచారం చేయాలని పవన్ కళ్యాణ్‌ను కోరడం విశేషం.

ఈ నేపథ్యంలోనే ఈనెల 7, 8వ తేదీల్లో తెలంగాణలో పవన్ కళ్యాణ్ ప్రచారం చేయనున్నట్లు జనసేన కేంద్ర కార్యాలయం తెలిపింది. జనసేన, బీజేపీ అభ్యర్థుల తరఫున తెలంగాణ మున్సిపల్ ఎన్నికల ప్రచారంలో జనసేనాని పాల్గొంటారని ఆ పార్టీ వెల్లడించింది. అయితే ఏ ఏ ప్రాంతాల్లో పవన్‌ కళ్యాణ్ ప్రచారం చేస్తారు అనేది మాత్రం ఇంకా ప్రకటించలేదు. పవన్ కళ్యాణ్ ఎన్నికల ప్రచారానికి సంబంధించిన పూర్తి షెడ్యూల్.. రూట్ మ్యాప్‌ను త్వరలో ప్రకటిస్తామని జనసేన పార్టీ స్పష్టం చేసింది.

మరోవైపు.. ఏపీ డిప్యూటీ సీఎం పవన్ కళ్యాణ్‌ను.. తెలంగాణ బీజేపీ అగ్రనేతలు కలిశారు. పవన్ కళ్యాణ్‌ను కలిసిన తెలంగాణ బీజేపీ అధ్యక్షుడు రామచందర్ రావు, కేంద్రమంత్రి కిషన్ రెడ్డి.. కొద్దిసేపు భేటీ అయ్యారు. తెలంగాణ మున్సిపల్ ఎన్నికల్లో తమ పార్టీకి పవన్ కళ్యాణ్ మద్దతు ప్రకటించారని.. బీజేపీ అభ్యర్థుల తరపున ప్రచారం చేయడానికి అంగీకరించినట్లు వెల్లడించారు.

 ఈ భేటీ తర్వాత దీనికి సంబంధించి తెలంగాణ బీజేపీ చీఫ్ రామచందర్ రావు ట్వీట్ చేశారు. కేంద్ర బొగ్గు, మైనింగ్ శాఖ మంత్రి కిషన్ రెడ్డితో కలిసి పవన్ కళ్యాణ్‌ను కలిసినట్లు తెలిపారు. తెలంగాణలో త్వరలో జరగనున్న మున్సిపల్ ఎన్నికలు సహా కీలక అంశాలపై విస్తృత చర్చలు జరిపామని.. భారతీయ జనతా పార్టీకి పవన్ కళ్యాణ్ తన పూర్తి మద్దతును పలికి.. ఈ మున్సిపల్ ఎన్నికల్లో బీజేపీ తరపున ప్రచారం చేయడానికి అంగీకరించారని పేర్కొన్నారు. ఇది తెలంగాణలో బీజేపీ వేగంగా బలోపేతం అవుతోంది అనడానికి సంకేతమని తెలిపారు.