ఆ కారణంతోనే పడిపోయిన బంగారం ధరలు

మల్టీ కమొడిటీ ఎక్స్చేంజీలో (MCX) బంగారం ధరలు బుధవారం సెషన్లో పడిపోయాయని చెప్పొచ్చు. అంతర్జాతీయ మార్కెట్లో బలహీనతల కారణంగా.. బులియన్ ధరలు పడిపోవడం ఇందుకు కారణమని తెలుస్తోంది. ఇదే సమయంలో యూఎస్ డాలర్ విలువ చాలా రోజుల తర్వాత పుంజుకుంది. ఇదే సమయంలో సిల్వర్ ధరలు కూడా పెద్ద మొత్తంలో దిగొచ్చాయి. సాధారణంగా డాలర్, గోల్డ్‌కు విలోమ సంబంధం ఉంటుంది. అంటే.. డాలర్ పెరిగితే బంగారం ధర తగ్గుతుంటుంది. డాలర్ పడిపోతుంటే.. అప్పుడు బంగారం ధర పెరుగుతుందని చెప్పొచ్చు. ఇదే ఫెడ్ వడ్డీ రేట్లకు కూడా అన్వయించుకోవచ్చు. ఫెడ్ వడ్డీ రేట్లు పెంచితే గనుక అప్పుడు యూఎస్ డాలర్, బాండ్ ఈల్డ్స్ డిమాండ్ పెరిగి.. బంగారం విలువ తగ్గుతుంది. ఇదే ఫెడ్ వడ్డీ రేట్లను తగ్గిస్తే.. అప్పుడు బంగారానికి డిమాండ్ పెరిగి.. విలువ పెరుగుతుందని చెప్పొచ్చు.

ఇప్పుడు అమెరికాలో ద్రవ్యోల్బణానికి సంబంధించిన గణాంకాల కోసం ఇన్వెస్టర్లు ఎదురుచూస్తున్నారు. ఈ వారంలోనే ఈ డేటా విడుదల కానుంది. ఇక దీనిని బట్టే.. సెప్టెంబర్ సమీక్షలో ఫెడ్ వడ్డీ రేట్లు ఏ స్థాయిలో తగ్గించాలనేది ఒక అంచనాకు వస్తుందని తెలుస్తోంది. ఈ క్రమంలోనే ఇన్వెస్టర్లు అప్రమత్తత పాటించగా.. డాలర్ విలువ ఎగబాకింది. బంగారం ధరలు తగ్గుముఖం పట్టాయి. ఇంటర్నేషనల్ మార్కెట్లో కిందటి సెషన్లో స్పాట్ గోల్డ్ రేటు ఔన్సుకు 2530 డాలర్ల స్థాయిలో ఉండగా.. ఇప్పుడు అది తగ్గి 2506 డాలర్ల లెవెల్స్‌కు పడిపోయింది. స్పాట్ సిల్వర్ ధర 30 డాలర్లపైనుంచి ఒక్కసారిగా 29.30 డాలర్లకు చేరింది. ఇక డాలర్‌ విలువ పెరగ్గా.. రూపాయి విలువ పతనమైంది. ప్రస్తుతం డాలర్‌తో పోల్చితే రూపాయి మారకం విలువ రూ. 83.959 వద్ద కొనసాగుతోంది.

ఇక ఎంసీఎక్స్ మార్కెట్లో బంగారం ధర ఇవాళ రూ. 201 పతనమై 10 గ్రాములకు రూ. 71,921గా ఉంది. ఇక వెండి ధరలు రూ. 388 పతనంతో కేజీకి రూ. 87,950 వద్ద ఉంది. స్పాట్ గోల్డ్ 0.4 శాతం పడిపోగా.. యూఎస్ గోల్డ్ ఫ్యూచర్స్ 02 శాతం తగ్గింది. ఇక డాలర్ ఇండెక్స్ 0.1 శాతం పెరిగింది. ఇది ఫారెన్ కరెన్సీ హోల్డర్స్‌కు బంగారం ఆకర్షణను తగ్గిస్తుంది.

 ఫెడ్ వడ్డీ రేట్లను 25 బేసిస్ పాయింట్ల మేర తగ్గిస్తుందని 67 శాతం వరకు అంచనాలు ఉండగా.. ఇదే సమయంలో 50 బేసిస్ పాయింట్ల కోత ఉంటుందని 33 శాతం అంచనా వేస్తున్నారు. అయితే ప్రస్తుతానికి బంగారం ధర తగ్గినప్పటికీ.. రానున్న రోజుల్లో ఇంకా పెరిగే అవకాశాలే ఉన్నాయని నిపుణులు చెబుతున్నారు. ఇన్వెస్టర్లకు మాత్రం ఇప్పుడు రేటు తగ్గినప్పుడల్లా ఇన్వెస్ట్ చేస్తే మంచి రిటర్న్స్ ఉంటాయని అంటున్నారు.