ఆకట్టుకుంటున్న టాటా నెక్సాన్ నయా ఎడిషన్.

భారతదేశంలో ఇటీవల కాలంలో ఎలక్ట్రిక్ వాహనాలకు డిమాండ్ భారీగా పెరుగుతుంది. ముఖ్యంగా ఈవీ స్కూటర్లు ప్రజల ఆదరణ పొందగా, ఈవీ కార్లు ఇప్పుడిప్పుడే ప్రజల మనస్సును దోచుకుంటున్నాయి.ప్రముఖ కార్ల తయారీ కంపెనీ టాటా తన నెక్సాన్ ఈవీను గతంలో రిలీజ్ చేసిన విషయం తెలిసిందే. సేల్స్‌పరంగా ఆకట్టుకుంటున్న టాటా మోటార్స్ తన నెక్సాన్ ఈవీ లైనప్‌ను పునరుద్ధరించింది. ఆల్-ఎలక్ట్రిక్ ఎస్‌యూవీకు మరింత శ్రేణి, వేగవంతమైన ఛార్జింగ్, ఆల్-బ్లాక్ డార్క్ ఎడిషన్‌ను అందిస్తుందని మార్కెట్ నిపుణులు చెబుతున్నారు. నెక్సాన్ ఈవీ తాజాగా 45 కేడబ్ల్యూహెచ్ బ్యాటరీ ప్యాక్‌తో వస్తుంది. ఇది మూడు వేరియంట్‌లలో విస్తరించి ఉంది. దీని ధర రూ. 13.99 లక్షలుగా నిర్ణయించారు. ఈ నేపథ్యంలో టాటా నెక్సాన్ ఈవీ నయా వెర్షన్ గురించివివరాలను తెలుసుకుందాం.

టాటా నెక్సాన్ ఈవీ నయా వెర్షన్ 45 కేడబ్ల్యూహెచ్ బ్యాటరీ ప్యాక్ క్రియేటివ్, ఫియర్‌లెస్, ఎంపవర్డ్, ఎంపవర్డ్ ప్లస్, డార్క్ ఎడిషన్ వేరియంట్‌లతో అందుబాటులో ఉంది. టాటా 45 కేడబ్ల్యూహెచ్ బ్యాటరీ ప్యాక్‌పై పూర్తి ఛార్జ్‌తో 489 కిలోమీటర్ల పరిధిని అందిస్తుందని కంపెనీ ప్రతినిధులు చెబుతున్నారు. ఇది 60 కేడబ్ల్యూ ఛార్జర్‌ని ఉపయోగించి 40 నిమిషాల్లో 10 శాతం నుంచి 80 శాతం వరకు ఛార్జ్ చేస్తుందని వివరిస్తున్నారు. నెక్సాన్ ఈవీ వీ2వీ, వీ2ఎల్ ఛార్జింగ్ ఎంపికలను కూడా పొందుతుంది. ఈ కారు బ్యాటరీ ప్యాక్‌ని ఉపయోగించి ఇతర ఉపకరణాలను ఛార్జ్ చేయడానికి అనుమతిస్తుంది. నెక్సాన్ ఈవీ 30 కేడబ్ల్యూహెచ్, 40 కేడబ్ల్యూహెచ్ బ్యాటరీ ప్యాక్‌లతో కూడా విక్రయిస్తున్నారు.

నెక్సాన్ ఈవీ ఇప్పటికే ఫుల్లీ లోడెడ్ ఫీచర్లతో ఆకట్టుకుంటుంది. ఎలక్ట్రిక్ ఎస్‌యూవీ పనోరమిక్ సన్‌రూఫ్, ముందు భాగంలో ఫ్రంక్, స్మార్ట్‌ఫోన్ కనెక్టివిటీతో కూడిన 12.3 అంగుళాల ఇన్ఫోటైన్‌మెంట్ సిస్టమ్, వైర్‌లెస్ ఛార్జింగ్, డిజిటల్ ఇన్స్ట్రుమెంట్ కన్సోల్, 9-స్పీకర్ జేబీఎల్ సిస్టమ్ ఉన్నాయి. వెంటిలేటెడ్ ఫ్రంట్ సీట్లు, క్రూయిజ్ కంట్రోల్‌తో పాటు స్టాండర్డ్‌గా ఆరు ఎయిర్‌బ్యాగ్‌లు, ఈబీడీతో కూడిన ఏబీఎస్, ట్రాక్షన్ కంట్రోల్, స్టెబిలిటీ కంట్రోల్, ఎలక్ట్రానిక్ పార్కింగ్ బ్రేక్, పార్కింగ్ సెన్సార్లు, 360-డిగ్రీ కెమెరా వంటి భద్రతా ఫీచర్లు ఆకట్టుకుంటున్నాయి.