రేపే లాస్ట్ డేట్.. మిస్సైతే రూ.1.5 లక్షల పెనాల్టి.. ట్యాక్స్ పేయర్లూ చూసుకోండి

ఆర్థిక సంవత్సరం 2023-24 (అసెస్మెంట్ ఇయర్ 2024-25)కి సంబంధించి ఇన్‌కమ్ ట్యాక్స్ ఆడిట్ రిపోర్ట్ సమర్పించేందుకు గడువు అక్టోబర్ 7, 2024తో ముగియనుంది. ఇప్పటికే ఈ గడువు సెప్టెంబర్ 30తో ముగియగా మరో 7 రోజులు సమయం ఇచ్చింది కేంద్ర ప్రత్యక్ష పన్నుల బోర్డు. ఇప్పుడు ఈ కొత్త గడువు సైతం ముగియనుంది. మరోసారి పొడిగించే అవకాశాలు కనిపించడం లేదు. అందుకే ఇంకా ఎవరైనా ట్యాక్స్ పేయర్లు, వ్యాపారస్తులు ట్యాక్స్ ఆడిట్ రిపోర్ట్ సమర్పించనట్లయితే వెంటనే ఆ పని పూర్తి చేయడం ద్వారా ఊరట పొందవచ్చు. లేదంటే భారీగా పెనాల్టీ కట్టాల్సి వస్తుంది. ఆ వివరాలు ఇప్పుడు మనం తెలుసుకుందాం.

సెప్టెంబర్ 30తో గడువు ముగుస్తున్న క్రమంలోనే అసోసియేటెడ్ చాంబర్ ఆఫ్ కామర్స్ అండ్ ఇండస్ట్రీస్ ఉందపూర్ కేంద్ర మంత్రి జితెంద్ర సింగ్‌కు లేఖ రాసింది. ఈ క్రమంలో కేంద్ర ఆర్థిక మంత్రి నిర్మలా సీతారామన్‌కు గడువు పెంచాలని కోరుతూ లేఖ రాసినట్లు కేంద్ర మంత్రి జితేంద్ర సింగ్ సోషల్ మీడియా ఎక్స్ వేదికగా వెల్లడించారు. గడువు పెంచుతున్నట్లు కేంద్ర ఆర్థిక శాఖ నిర్ణయం తీసుకుందని, అందుకు ఆర్థిక మంత్రి నిర్మలా సీతారమన్‌కు కృతజ్ఞతలు తెలిపారు.

గడువు మిస్సైతే ఏమవుతుంది?

ఇప్పటికే పెంచిన గడువు అనేది ట్యాక్స్ ఆడిట్ రిపోర్ట్ ఎలక్ట్రానిక్ ఫార్మాట్‌లో సమర్పించేందుకేనని ట్యాక్స్ నిపుణులు చెబుతున్నారు. సెప్టెంబర్ 30, 2024లోపు ట్యాక్స్ ఆడిట్ పూర్తయి ఉండి రిపోర్ట్ సబ్మిట్ చేసే వారికి మాత్రమే అక్టోబర్ 7వ తేదీ వరకు అవకాశం ఉంటుందని తెలిపారు. ఒక వేళ ఆడిట్ పూర్తియినప్పటికీ రిపోర్ట్ సమర్పించడంలో గడువు దాటితే వారు ఆదాయపు పన్ను చట్టం 1961లోని సంబంధిత సెక్షన్ల ప్రకారం పర్యావసనాలు ఎదుర్కోవలసి వస్తుందంటున్నారు. సెక్షన్ 44ఏబీ (ట్యాక్స్ ఆడిట్) ఉల్లంఘించినట్లు తెలితే మొత్తం సేల్స్ లేదా టర్నోవర్‌లో 0.5 శాతం లేదా రూ.1.5 లక్షల వరకు ఏది తక్కువ అయితే అది పెనాల్టీగా చెల్లించాల్సి వస్తుందని హెచ్చరిస్తున్నారు.

మరోవైపు.. ఇన్‌కమ్ ట్యాక్స్ ఆడిట్ అవసరమైన ట్యాక్స్ పేయర్లు ముందుగా ఆడిట్ రిపోర్ట్ సమర్పించి ఆ తర్వాత ఐటీఆర్ ఫైల్ చేయాల్సి ఉంటుంది. ఈ రెండు ప్రక్రియలు ఒకదానికొకటి లింక్ అయి ఉంటాయి. దేనినీ విస్మరించేందుకు వీలు లేదు. మీరు ట్యాక్స్ ఆడిట్ పరిధిలోకి వస్తున్నట్లయితే మీకు ఇన్‌కమ్ ట్యాక్స్ రిటర్న్స్ ఫైలింగ్ కోసం గడువు అక్టోబర్ 31, 2024 వరకు ఉంటుంది. అంటే మీరు ఆడిట్ పూర్తి చేసుకున్నట్లయితే అక్టోబర్ 7వ తేదీలోపు రిపోర్ట్ సమర్పించి అక్టోబర్ 31వ తేదీ లోపు ఐటీఆర్ దాఖలు చేయాల్సి ఉంటుంది. ఐటీఆర్ దాఖలు చేయడంలో విఫలమైతే రూ.5 వేల వరకు పెనాల్టి కట్టాల్సి వస్తుంది. అలాగే బకాయిలపై వడ్డీ సైతం పడుతుంది. దీంతో ఎక్కువ మొత్తంలో చెల్లించుకోవాల్సి వస్తుందని ట్యాక్స్ పేయర్లు గుర్తుంచుకోవాలి.