హెచ్‌డీఎఫ్‌సీ బ్యాంక్ నుంచి మరో ఐపీఓ.. రూ.12,500 కోట్లు లక్ష్యం

హెచ్‌డీఎఫ్‌సీ బ్యాంక్ అక్టోబర్ 19 శనివారం రోజున కీలక ప్రకటన చేసింది. తమ అనుబంధ సంస్థ హెచ్‌డీబీ ఫైనాన్షియల్ సర్వీసెస్ లిమిటెడ్‌లో ఆఫర్ ఫర్ సేల్ కింద రూ.10 వేల కోట్లు విలువైన ఈక్విటీ షేర్లను విక్రయించనున్నట్లు తెలిపింది. హెచ్‌డీబీ ఫైనాన్షియల్ సర్వీసెస్ తొలి పబ్లిక్ ఆఫర్‌కు హెచ్‌డీఎఫ్‌సీ బ్యాంక్ బోర్డు ఆమోదం తెలిపినట్లు వెల్లడించింది. ఈ పబ్లిక్ ఇష్యూ మొత్తం విలువ రూ.12,500 కోట్లుగా ఉందని తెలిపింది. ఇందులో ఆఫర్ ఫర్ సేల్ కింద రూ.10 వేల కోట్లు విక్రయిస్తుండగా.. రూ.2,500 కోట్లు విలువైన తాజా షేర్లు జారీ చేయనుంది.

ఈ ఐపీఓ ధర, సబ్‌స్క్రిప్షన్ తేదీల వంటి వివరాలను త్వరలోనే వెల్లడించనుంది హెచ్‌డీబీ ఫైనాన్షియల్ సర్వీసెస్ లిమిటెడ్. ప్రతిపాదిత ఇనీషియల్ పబ్లిక్ ఆఫర్ తర్వాత సైతం హెడ్‌డీబీ ఫైనాన్షియల్ సర్వీసెస్.. హెడ్‌డీఎఫ్‌సీ బ్యాంకు అనుబంధ సంస్థగానే కొనసాగుతుంది. ప్రస్తుతం హెచ్‌డీబీ ఫైనాన్షియల్ సర్వీసెస్ సంస్థలో హెచ్‌డీఎఫ్‌సీ బ్యాంకు 94.64 శాతం వాటా ఉంది. జూన్ త్రైమాసికంలో ఆ సంస్థ నికర విలువ రూ.13,300 కోట్లుగా ఉంది. ఈ పబ్లిక్ ఇష్యూ ఈ ఆర్థిక ఏడాది చివరి నాటికి పూర్తయ్యే అవకాశాలు ఉన్నాయని మార్కెట్ నిపుణులు అంచనా వేస్తున్నారు. ఆఫర్ ఫర్ సేల్ కింద విక్రయిస్తున్న షేర్లు అనేవి మార్కెట్ పరిస్థితులు, రెగ్యులేటరీ అప్రూవల్స్, ఇతర అంశాలపై ఆధారపడి ఉంటుందని తమ స్టాక్ ఎక్స్చేంజీ ఫైలింగ్‌లో తెలిపింది హెచ్‌డీఎఫ్‌సీ బ్యాంక్.

ప్రస్తుత ఆర్థిక సంవత్సరం 2024- 25 జులై- సెప్టెంబర్ త్రైమాసికంలో హెచ్‌డీఎఫ్‌సీ బ్యాంక్ ఏకీకృత నికర లాభం రూ. 17,825.91 కోట్లుగా నమోదు చేసింది. అంతకు ముందు ఏడాది ఇదే త్రైమాసికంతో పోలిస్తే 6 శాతం వృద్ధి నమోదు చేసింది. స్టాండలోన్ ప్రాతిపదికన బ్యాంక్ నికర లాభం రూ. 16,820.97 కోట్లుగా నమోదైంది. ఇక బ్యాంక్ నికర వడ్డీ ఆదాయం 10 శాతం వృద్ధితో రూ. 30,010 కోట్లుగా నమోదైంది. రుణాల్లో 7 శాతం వృద్ధి నమోదు కాగా.. డిపాజిట్లు 15 శాతం మేర పెరిగాయి. వచ్చే నాలుగు సంవత్సరాల్లో బ్యాంక్ పరిమాణాన్ని రెట్టింపు చేయనున్నట్లు సీఎఫ్ఓ ఎస్ వైద్యనాథన్ తెలిపారు. గత మూడు నెలల్లో బ్యాంక్ 241 కొత్త బ్రాంచీలు తెరవడం ద్వారా మొత్తం శాఖల సంఖ్య 9,092కు చేరినట్లు చెప్పారు. స్థూల నిరర్థక ఆస్తులు స్థిరంగా 1.36 శాతంగా ఉన్నాయి.