దీపావళి వేళ.. రిలయన్స్ ఉద్యోగులకు అంబానీ స్పెషల్ గిఫ్ట్.. వీడియో వైరల్!

దీపావళి పండగ సెలబ్రేషన్స్ దేశవ్యాప్తంగా మొదలైపోయాయి. ఈ క్రమంలో ప్రముఖ కంపెనీలు తమ సంస్థలో పని చేసే ఉద్యోగులకు దీపావళి కానుకలు అందిస్తుంటాయి. స్వీట్ బాక్సులు, గిఫ్ట్ హ్యాంపర్లు, క్యాష్ బోనస్ వంటివి ఇచ్చి తమ ఉద్యోగుల్లో సంతోషం నింపే ప్రయత్నం చేస్తుంటాయి. అదే క్రమంలో ఈ దీపావళి పర్వదినాన్ని పురస్కరించుకుని అంబానీ ఫ్యామిలీ గ్రాండ్ సెలబ్రెషన్స్‌తో మరోసారి వార్తల్లో నిలిచింది. అలాగే ముకేశ్ అంబానీ నేతృత్వంలోని రిలయన్స్ ఇండస్ట్రీస్ సంస్థల్లో పని చేస్తున్న ఉద్యోగులకు దీపావళి స్పెషల్ గిఫ్ట్ బాక్సులు అందించింది. ఇప్పుడు ఆ గిఫ్ట్ బాక్సుకు సంబంధించిన ఓ వీడియో సోషల్ మీడియాలో చక్కర్లు కొడుతోంది.

రిలయన్స్ జియో సంస్థలో డెవలపర్‌గా పని చేసే ఓ యువతి తనకు కంపెనీ పంపించిన దీపావళి గిఫ్ట్ బాక్సుకు సంబంధించిన వీడియోను ఇన్‌స్టాగ్రామ్‌లో పోస్ట్ చేసింది. తెల్లడి బాక్సుపై బంగారం రంగులోని వినాయకుడి చిత్రపటంతో దీపావళి గ్రీటింగ్స్ అని రాసి ఉంది. దానిని చూస్తే ఏదో విలువైన వస్తువే అందులో ఉందని అందరికీ అనిపిస్తుంది. బాక్స్ ఓపెన్ చేయగానే ఓ చిన్న సంచి ఉంది. జీడిపప్పు, బాదం పప్పుతో పాటు కిస్ మిస్ ప్యాకేట్లు మూడు ఉన్నాయి. చిన్న సంచితో పాటు ప్రత్యేకంగా రూపొందించిన గ్రీటింగ్ కార్డ్ అందించారు. ముకేశ్ అంబానీ, నీతా అంబానీ, ఆకాశ్, శ్లోకా, ఇషా, అనంత్ అంబానీ, ఆనంద్ పిరామల్, రాధికా మర్చంట్ సహా మూడో తరం నుంచి సైతం ఈ గ్రీటింగ్స్ అందించినట్లు తెలుస్తోంది.

అంబానీ ఫ్యామిలీ పంపించిన స్పెషల్ దీపావళి గిఫ్ట్ బాక్సు వీడియో వైరల్‌గా మారింది. అయితే, ఈ గిఫ్ట్ బాక్సులో ఉన్న వస్తువులు చూసి నెటిజన్లు ఆశ్చర్యానికి గురవుతున్నారు. దేశంలోనే కాదు ఆసియాలోని అతిపెద్ద కంపెనీగా ఉన్న రిలయన్స్ ఈ తరహా గిఫ్డ్ ఇవ్వడం ఆశ్చర్యమేనని పలువురు కామెంట్స్ చేస్తున్నారు. బాదం, జీడిపప్పు, కిస్‌మిస్ ఉండడంపై తమదైన శైలిలో కామెంట్లు చేస్తున్నారు. హల్దీరామ్ పాపిడ్ ప్యాకెట్ ఏదీ ఎంటూ ఓ నెటిజన్ రాసుకొచ్చాడు. దీపావళికి స్వీట్ లేదంటూ ఓ వ్యక్తి కామెంట్ చేశాడు. ఇలా తమదైన శైలిలో నెటిజన్లు విమర్శలు చేశారు.