చీపెస్ట్ హోమ్ లోన్స్.. రూ. 75 లక్షల రుణంపై ఎస్బీఐ సహా ఏ బ్యాంకులో ఈఎంఐ ఎంత కట్టాలంటే?

సొంతిల్లు ఉండాలనేది ప్రతి ఒక్కరి కల. కష్టపడి సంపాదించిన డబ్బును కూడబెట్టుకొని ఇళ్లు కట్టుకుంటుంటారు. ఇటీవలి కాలంలో ఇంటి నిర్మాణం కూడా చాలా ఖర్చుతో కూడుకున్నదిగా మారిపోయింది. అన్ని ముడిసరకుల ఖర్చులు పెరిగిపోవడం ఇందుకు ప్రధాన కారణంగా చెప్పొచ్చు. అయితే.. ఈ విషయంలోనే అందరికీ ఎదురయ్యే ప్రధాన సమస్య ఆర్థిక ఇబ్బందులు. అవును.. ఇంటి కోసం ఒకేసారి పెద్ద మొత్తంలో ఖర్చు చేయడం కష్టమే. అందుకే.. కచ్చితంగా లోన్లు తీసుకుంటారు. ఇప్పుడు దేశంలోని దాదాపు అన్ని బ్యాంకులు కూడా హోమ్ లోన్స్ మంజూరు చేస్తున్నాయి. ఇంకా ప్రస్తుతం దీపావళి పండగ సీజన్ నేపథ్యంలో.. బ్యాంకులు కస్టమర్ల కోసం మంచి ఆఫర్లు ప్రకటిస్తున్నాయి.

అంటే.. ఇందులో తక్కువ ప్రాసెసింగ్ ఫీజు లేదా తక్కువ వడ్డీ రేటుకే హోమ్ లోన్స్ అందిస్తున్నాయి. పరిమిత కాల వ్యవధితో 20 ఏళ్లకు సుమారు చాలా బ్యాంకులు రూ. 75 లక్షల వరకు గృహ రుణం మంజూరు చేస్తున్నాయి. ఇప్పుడు పండగ వేళ ఏ బ్యాంకు తక్కువ వడ్డీ రేటుతో లోన్లు ఇస్తోంది. దేంట్లో వడ్డీ రేట్లు ఎలా ఉన్నాయి.. ఇంకా ఎలాంటి ప్రయోజనాలు ఉన్నాయో తెలుసుకుందాం.

>> 75 లక్షల లోన్‌పై చాలా వరకు ప్రముఖ బ్యాంకుల్లో వడ్డీ రేట్లు 8.35 శాతం నుంచి 8.7 శాతం వరకు ఉన్నాయి. ఇక్కడ బ్యాంక్ ఆఫ్ ఇండియా, బ్యాంక్ ఆఫ్ మహారాష్ట్ర, యూనియన్ బ్యాంక్ ఆఫ్ ఇండియాలో 8.35 శాతం ప్రారంభ వడ్డీ రేటుతోనే హోమ్ లోన్లు ఉన్నాయి. ఇక్కడ 20 ఏళ్లకు 75 లక్షలపై నెలకు రూ. 64,376 చొప్పున చెల్లించాల్సి వస్తుంది.

బ్యాంక్ ఆఫ్ బరోడా, కెనరా బ్యాంక్, ఇండియన్ బ్యాంకు, ఇండియన్ ఓవర్సీస్ బ్యాంకు, పంజాబ్ నేషనల్ బ్యాంకుల్లో చూస్తే వడ్డీ రేట్లు 8.40 శాతం నుంచి ప్రారంభం అవుతున్నాయి. మంచి క్రెడిట్ స్కోరు ఉన్న వారికి.. తక్కువ వడ్డీకే హోం లోన్ వస్తుందని చెప్పొచ్చు. ఇక్కడ 20 సంవత్సరాలకు గానూ ఈఎంఐ నెలకు రూ. 64,613 చొప్పున చెల్లించాలి.

యూకో బ్యాంకు, పంజాబ్ అండ్ సింద్ బ్యాంకులో 8.45 శాతం వడ్డీ రేటుతో లోన్లు ప్రారంభం అవుతున్నాయి. దీంట్లో ఈఎంఐ నెలకు రూ. 64,850 చొప్పున పడుతుంది. స్టేట్ బ్యాంక్ ఆఫ్ ఇండియా, కర్ణాటక బ్యాంకు, హెచ్‌ఎస్‌బీసీ బ్యాంకుల్లో 8.50 శాతం ప్రారంభ వడ్డీ రేటుగా ఉంది. దీంట్లో ఈఎంఐ రూ. 75 లక్షలపై అయితే నెలకు రూ. 65,087 చొప్పున పడుతుంది. పండగ వేళ ఆఫర్లు ఉన్నప్పటికీ.. లోన్ తీసుకునేటప్పుడు బ్యాంక్ పాలసీల్ని, రుణ నిబంధనల్ని గురించి పూర్తిగా అర్థం చేసుకోవాలి.