రూ.30కే కిలో గోధుమ పిండి.. రూ.34కే బియ్యం.. 'భారత్ బ్రాండ్' మళ్లీ తెచ్చిన కేంద్రం

పెరుగుతున్న ధరలతో సామాన్యులపై పెను భారం పడుతోంది. నిత్యావసర సరుకులు సరిపడా కొనుగోలు చేయలేని వారు చాలా మంది ఉన్నారు. అలాంటి వారందరికీ ఊరట కల్పిస్తూ కేంద్ర ప్రభుత్వం కీలక నిర్ణయం తీసుకుంది. మరోసారి భారత్ బ్రాండ్ విక్రయాలను తీసుకొచ్చింది. భారత్ బ్రాండ్ ద్వారా గోధుమ పిండి, బియ్యం విక్రయాలను మళ్లీ తెచ్చింది. రెండో దశ భారత్ బ్రాండ్ విక్రయాలను మంగళవారం నవంబర్ 5వ తేదీన ప్రారంభించింది. రూ. 34కే కిలో బియ్యం, రూ. 30కే గోధుమ పిండి కొనుగోలు చేయవచ్చు. మరి వీటిని ఎక్కడ కొనుగోలు చేయాలి?

  భారత్ బ్రాండ్ ద్వారా తక్కువ ధరకే విక్రయిస్తున్న గోధుమ పిండి, బియ్యం కొనుగోలుకు వివిధ వేదికలు ఉన్నాయి. నాఫెడ్ కేంద్రాలు, ఎన్‌సీపీఎఫ్, కేంద్రీయ భండార్, ఈ-కామర్స్ సంస్థల ద్వారానూ వీటిని కొనుగోలు చేయవచ్చని కేంద్రం తెలిపింది. ధరల భారం నుంచి ఉపశమనం కల్పించేందుకే తాత్కాలిక విక్రయాలు చేపట్టినట్లు కేంద్ర మంత్రి ప్రహ్లాద్ జోషి తెలిపారు. ఈ రెండో దశలో భాగంగా 3.69 లక్షల టన్నుల గోధుమలు, 2.91 లక్షల టన్నుల బియ్యాన్ని ఎఫ్‌సీఐ నుంచి సేకరించామని తెలిపారు. ఈ స్టాక్ మొత్తం పూర్తయ్యే వరకు విక్రయాలు ఉంటాయన్నారు. అవసరమైతే అదనపు కేటాయింపులు చేసేందుకు కేంద్రం సిద్ధంగా ఉందని కేంద్ర మంత్రి అన్నారు.

భారత్ బ్రాండ్ ద్వారా రూ. 30కే కిలో గోధుమ పిండి విక్రయిస్తామని కేంద్ర మంత్రి ప్రహ్లాద్ జోషి తెలిపారు. ఈ పండి 5 కిలోలు, 10 కిలోల ప్యాకెట్ల రూపంలో లభిస్తాయన్నారు. ఇక రూ. 34కే కిలో బియ్యం ఇస్తున్నామని, ఇవి సైతం 5 కిలోలు, 10 కిలోల ప్యాకెట్లు లభిస్తాయన్నారు. గత ఏడాది 2023, అక్టోబర్ నెలలో తొలి ఫేజ్ భారత్ బ్రాండ్ విక్రయాలు ప్రారంభించింది కేంద్రం. 2024, జూన్ నెల వరకు విక్రయాలు చేపట్టింది. మొత్తం 15.20 లక్షల టన్నుల గోధుమలు, 14.58 లక్షల టన్నుల బియ్యాన్ని విక్రయించింది.

ఫేజ్-1 లో భాగంగా గోధుమ పిండిని కిలోకు రూ.27.5కే విక్రయించడం గమనార్హం. కిలో బియ్య రూ.29కే అందించింది. గతంతో పోలిస్తే ఇప్పుడు వాటి ధరలను కాస్త పెంచింది. అయితే, భారత్ బ్రాండ్ ద్వారా విక్రయించాలనే ఉద్దేశం వ్యాపారం కాదని, వినియోగదారులకు ఊరట కల్పించాలన్న సదుద్దేశమేనన్నారు. వినియోగదారులు కోరుకుంటే మరిన్ని చిన్న ప్యాకెట్లలోనూ వీటిని అందిస్తామని ఫేజ్- 2 ప్రారంభం సందర్భంగా తెలిపారు. ప్రజలు ఈ అవకాశాన్ని సద్వినియోగం చేసుకోవాలని సూచించారు.