ట్రంప్ గెలుపుతో మారిన లెక్కలు.. డాలర్ దెబ్బకు బంగారం ధరలు భారీ పతనం

అమెరికా అధ్యక్ష ఎన్నికల్లో మాజీ ప్రెసిడెంట్, రిపబ్లికన్ పార్టీ అభ్యర్థి డొనాల్డ్ ట్రంప్ జయకేతనం ఎగురవేసిన సంగతి తెలిసిందే. 270 ఎలక్టోరల్ ఓట్లు గెలవాల్సి ఉండగా.. ట్రంప్ మేజిక్ ఫిగర్ దాటేశారు. దీంతో విజయం ఖరారైంది. అయితే.. ట్రంప్ మళ్లీ అమెరికా అధ్యక్షుడిగా ఎన్నిక కానున్న నేపథ్యంలో.. అంతటా జోష్ నెలకొంది. ఇప్పటికే బుధవారం రోజు ప్రపంచ స్టాక్ మార్కెట్లు భారీగా పుంజుకున్నాయి. దేశీయ స్టాక్ మార్కెట్లు కూడా లాభపడ్డాయి. ముఖ్యంగా ఐటీ స్టాక్స్ 4 శాతం వరకు పెరిగాయి. దీనికి అంతటికీ ప్రధాన కారణం.. కొద్ది రోజులుగా పతనం అవుతున్న డాలర్ ఒక్కసారిగా పుంజుకోవడం. అవును.. డాలర్ ఇవాళ భారీగా పెరిగి 4 నెలల గరిష్టానికి చేరింది. దీంతో సాధారణంగా దీనితో సంబంధం ఉన్నవన్నీ ప్రభావితం అవుతున్నాయి.

డాలర్ పుంజుకుంటుండటంతో.. రూపాయి విలువ ఆల్ టైమ్ కనిష్ట స్థాయికి పడిపోయింది. ఇదే సమయంలో సాధారణంగానే డాలర్, గోల్డ్‌కు అవినాభావ సంబంధం ఉంటుంది. డాలర్ విలువ పెరిగితే.. ఈక్విటీ మార్కెట్లు, బాండ్ ఈల్డ్స్‌కు జోష్ వస్తుంది. పెట్టుబడిదారులు వీటిపై ఆసక్తి చూపిస్తుంటారు. ఇదే సమయంలో బంగారంపై ఆసక్తి తగ్గుతుంది. పెట్టుబడులు తగ్గుతాయి. దీంతో బంగారం ధర తగ్గుతుంది.

ఇక ఇటీవల భారీగా పెరిగిన బంగారం ధరలు.. ఒక్కసారిగా డాలర్ రికార్డు స్థాయికి ఎగబాకడంతో ఇంటర్నేషనల్ మార్కెట్లో కుప్పకూలింది. సాయంత్రం 6.50 గంటల సమయంలో స్పాట్ గోల్డ్ రేటు ఔన్సుకు 2675 డాలర్లకు పడిపోయింది. కిందటి రోజు ఇది 2740 డాలర్ల స్థాయిలో కదలాడిన సంగతి తెలిసిందే. అంటే ఏకంగా 65 డాలర్లకుపైగా పతనమైందని చెప్పొచ్చు. పూర్తి ట్రేడింగ్ ఇదే విధంగా ఉంటే.. దేశీయ మార్కెట్లలో కూడా బంగారం ధరలు భారీ స్థాయిలో పడిపోయే అవకాశాలు ఉన్నాయి. ఇంటర్నేషనల్ మార్కెట్ల తీరును బట్టే.. దేశీయంగా కూడా మారుతుంటాయి. టైమ్ జోన్ కారణంగా మరుసటి రోజు ఈ ఎఫెక్ట్ కనిపిస్తుంది. ఈ లెక్కన గురువారం ఉదయం 10 గంటల తర్వాత.. భారత మార్కెట్లలో బంగారం రేట్లు భారీ స్థాయిలో క్షీణించనున్నాయని చెప్పొచ్చు.

సిల్వర్ రేటు కూడా భారీ స్థాయిలో దిగొచ్చింది. స్పాట్ సిల్వర్ ధర 32.50 డాలర్లపైన ఉండేది. ఇప్పుడు అది 31.40 డాలర్లకు దిగొచ్చింది. ప్రస్తుతం హైదరాబాద్ మార్కెట్లో 22 క్యారెట్స్ గోల్డ్ రేటు తులం రూ. 73,650 వద్ద ఉండగా.. 24 క్యారెట్ల పసిడి ధర రూ. 80,350 వద్ద ఉంది. ఇదే వెండి ధర రూ. 1.05 లక్షల వద్ద ఉంది.

అప్డేట్- బుధవారం రాత్రి 7.15 గంటల సమయంలో స్పాట్ గోల్డ్ ధర మరింత తగ్గి ఔన్సుకు 2665 డాలర్లకు చేరింది. అంటే ఒక్కరోజులో 75 డాలర్లకుపైగా పడిపోయింది.  బుధవారం రాత్రి 8.20 గంటల సమయంలో బంగారం ధర మరింత పతనమై ఔన్సుకు 2555 డాలర్లకు దిగొచ్చింది. ఇక్కడ చూస్తే ఒక్కరోజులో 85 డాలర్లకుపైగా పడిపోయినట్లు లెక్క. ఈ లెక్కన దేశీయ మార్కెట్లలో గురువారం రోజు రేటు భారీగానే దిగొచ్చే ఛాన్స్ ఉంది. కొనుగోలుదారులకు పెళ్లిళ్ల సీజన్లో ఈ ధరల తగ్గింపు భారీ ఊరట కలిగిస్తుందని చెప్పొచ్చు.