పందెం వేసుకుని మోతాదుకు మించి ఆ మాత్రలు మింగిన హాస్టల్ విద్యార్థులు

పల్నాడు జిల్లా ఈపూరులో ప్రభుత్వ హాస్టల్‌లోని ఇద్దరు విద్యార్థులు అస్వస్థతకు గురయ్యారు. ఈపూరులోని సాంఘిక సంక్షేమ బాలుర వసతి గృహంలో ఈ ఘటన జరిగింది. హాస్టల్‌లో ఉన్న ఇద్దరు విద్యార్థులు అస్వస్థతకు గురయ్యారు. హాస్టల్ వార్డెన్ వెంకటేశ్వర్లు నాయక్ వెంటనే వారిని సమీపంలోని ఆస్పత్రికి తరలించారు. ప్రస్తుతం ఇద్దరు విద్యార్థుల ఆరోగ్య పరిస్థితి నిలకడగా ఉన్నట్లు వైద్యులు తెలిపారు. అయితే అసలు విషయం ఏమిటంటే వీరేమీ కలుషితాహారం తినో.. హాస్టల్‌లో ఆహారం తినో అనారోగ్యానికి లోనుకాలేదు. వీరి అస్వస్థతకు వేరే కారణం ఉంది. పందెం తెచ్చిన తంటా వీరిద్దరినీ ఆస్పత్రి పాలు చేసింది.

వివరాల్లోకి వెళ్తే.. చల్లా సతీష్ కుమార్, మక్కెన హనిగురు అనే ఇద్దరు విద్యార్థులు ఈపూరు సాంఘిక సంక్షేమ బాలుర వసతి గృహంలో ఉంటూ చదువుకుంటున్నారు. అయితే శుక్రవారం ఇద్దరు విద్యార్థులు ఓ పందెం వేసుకున్నారు. ఐరన్ మాత్రలు ఎవరు ఎక్కువ మింగుతారనే విషయంలో ఇద్దరు విద్యార్థులు పోటీపడ్డారు. ఈ క్రమంలోనే ఒకరు పది ఐరన్ మాత్రలు వేసుకుంటే.. మరో విద్యార్థి 20 ఐరన్ మాత్రలు ఒకేసారి మింగేశాడు. దీంతో మోతాదు ఎక్కువ కావటంతో ఇద్దరు విద్యార్థులు అస్వస్థతకు గురయ్యారు. ఈ విషయాన్ని హాస్టల్ సిబ్బంది.. వార్డెన్‌కు చేరవేయగా.. ఆయన వారిని ఆస్పత్రికి తరలించారు. అయితే విద్యార్థులకు ఎలాంటి ప్రమాదం జరగకపోవటంతో అందరూ ఊపిరి పీల్చుకున్నారు. పందెం పేరుతో ఇలాంటి పనులు ఎవరూ చేయవద్దంటూ హాస్టల్ వార్డెన్.. వసతి గృహంలోని విద్యార్థులకు సూచించారు.

మరోవైపు అల్లూరి సీతారామరాజు జిల్లాలో విషాదకర ఘటన చోటుచేసుకుంది. అడ్డతీగల మండలం తిమ్మాపురంలో ఇసుక కోసం నలుగురు యువకులు వాగులోకి దిగారు. అయితే ప్రవాహంలో గల్లంతయ్యారు. కాకినాడ జిల్లా ఏలేశ్వరం వాసులు భూషణం, బాబు, గొంతయ్య, శ్రీను ఇసుక కోసం వాగులోకి దిగి గల్లంతయ్యారు. స్థానికులు ఈ విషయాన్ని పోలీసులకు చేరవేయటంతో.. పోలీసులు ఘటనాస్థలికి చేరుకొని గాలింపు చర్యలు చేపట్టారు. అయితే ఆచూకీ తెలియకపోవటంతో ఎన్డీఆర్ఎఫ్ బలగాలను రంగంలోకి దింపారు. గాలింపు చర్యలు కొనసాగుతున్నాయి.